كلام مسئول

محمد صلاح: يا مساء الخير شبهوها انها عنق الزجاجة كابوس كل بيت مصري الداخل ليها مفقود والخارج منها مولود السلعوة وغيرها من الصفات المفزعة لكن معبرة عن واقع عيشينه ولمسينه في كل بيت بعبع المصريين الثانوية العامة كان البعبع سنة دلوقت اتنين الخوف يبقوا 3 مع النظام الجديد اللي هيبدا بعد سنتين ويدخل ولادنا الجامعة من اساسه عام 2014 زمان كانوا بيقولوا من دا بكرة بقرشين لكن الثانوية العامة مش بقرشين دي الاسرة المصرية دفعت كتير فىا صرفت من الحضانة لغاية نهاية المارثون الطويل الثانوية العامة الامتحان بعد ساعات ويوم الامتحان يكرم المرء او يهان ويبان بقى الكرم دا يوم النتيجة .. يوم الفرح والاغماءات السعادة والضياع يوم ما الناجح يرفع ايده واللي مش ناجح يطاطي ايده دا بس اللي مش ناجح دا كمان اللي مجابش مجموع عدل لان الثانوية العامة مابقتش مسابقة نجاح وسقوط وبس دي بقت مسابقة مجاميع مفترية درجات متوحشة زي العولمة ايام الرئيس بوش عشان تلقى مكان في كلية محترمة السنادي رايح يمتحن حوالي 398 الف طالب وطالبة طلاب المرحلة الاولى اللي هي تانية ثانوي حوالي 37 الف طالب وطالبة وبس استلموا ارقام جلوسهم من حوالي اسبوعين اما طلاب المرحلة الثانية عددهم حوالي 360 الف طالب وطالبة هيمتحنوا بنفس ارقام جلوسهم السنة اللي فاتت لما كانوا يعني طلاب في المرحلة الاولى مفيش تغيير في ارقام الجلوس الا للي عدلوا بعض المواد الاختيارية او القدرات فنون ولاّ عمارة دول استلموا برضه ارقام جلوس جديدة الاعداد اللي رايحة تمتحن السنادي في المرحلة الاولى اقل بكتير من السنة اللي فاتت مفيش مقارنة اصلا يعني دا بسبب سنة الفراغ فاكرين زمان لما خفضوا الابتدائية سنة وخلوها 5 بدل 6 كان لازم تحصل سنة فاضية بتوع سنة الفراغ دول ممكن يكون حظهم كويس لما السنة الجاية يكونوا في المرحلة الثانية من الثانوية يخشوا كليات القمة بمجاميع متهاودة شوية يعني
امتحان الثانوية العامة الاجراءات الامنية المصاحبة لعملية نقل اوراق الاسئلة عشان ماتتسربش زي السنة اللي فاتت المراقبين تشكيلات رؤساء اللجان مستوى الامتحانات والاسئلة سهلة عادية في مستوى الطالب المذاكر ولاّ تعجيزية وعايزة اساتذة جامعة يجاوبوا عليها الثانوية العامة هيكون لينا عنها النهاردة كلام .......... مسئول
فاصل تقرير وثائقي
عرفت مصر شهادة البكالوريا عام 1887 وهي الشهادة التي تغبر اسمها مرات عدة منها التوجيهية ثم الثانوية العامة واذا كانت الغلبة في اعداد المتقدمين لامتحان الثانوية العامة هذا العام للبنات فان الفتاة المصرية كان عليها ان تنتظر حتى عام 1929 لتحصل اول دفعة طالبات على شهادة البكالوريا والتحقت لاول مرة ثلاثة عشر فتاة بالجامعة عام 1930 ، تحولت الثانوية العامة على مرور الايام الى احد اهم الازمات على اجندة الاسرة المصرية فهي السبيل الوحيد الى الجامعة في الوقت التي ضاقت به مقاعد الدراسة بالجامعة خصوصا كليات القمة احتدم صراع المجموع مما جعل الاسرة المصرية تنفق جزء كبير من دخلها في حدود 20 % على التعليم وعلى الدروس الخصوصية لصناعة مستقبل افضل لابنائها ولكن لا الانفاق ولا الدروس ولا التوسع في الجامعات الاقليمية والخاصة ساهموا في تبديد الفزع المصاحب لامتحانات الثانوية العامة كما ان اللقاء في منتصف الطريق بين جهود الاسرة الذاتية وجهود الحكومة لتخفيف هذا الكابوس لم يتم بعد بالشكل المرجو وبالطريقة المثلى فتنفق الاسرة في اتجاة وتنفق الحكومة في اتحاة اخر ولا يلتقيان وكثيرا ما يصاحب امتحانات الثانوية العامة مظاهر الصدمة من اسئلة صعبة كمادة التفاضل والتكامل في امتحانات السنة الماضبة او الشوشرة باتجاة تسرب الامتحانات ربما يجعلنا ذلك نتفهم ما اتخذته وزارة التربية والتعليم من احتياطات مشددة لمنع تسرب اوراق اسئلة الثانوية العامة كما وعد مسئولوها بامتحانات في مستوى الطالب العادي وان كان هذا الوعد متكرر الا اننا نامل ان بتحقق هذا العام جملة وتفصيلا
فاصل
محمد صلاح: عشان هي الثانوية العامة الشهادة اللي بتحدد كتير مستقبل ولادنا البوصلة اللي بترسم مكانهم ووضعهم في عالم بكرة وبعده فكلنا مشدودين التعليم قيادات التعليم في البلد كلها stand by يعني في وضع الاستعداد اذا كان الطلبة والاهالي يهمهم نتيجة تشرف فالمسئولين عن العملية التعليمية يهمهم ازاي نخرج بموسم ناجح للثانوية العامة من غير تسريب امتحانات من غير اغماءات في اللجان وشكاوى من الاسئلة من غير غش احنا حريصين على التنوع في ضيوف برنامجنا عادة لا نكرر ضيف الا في ظروف طارئة جدا وهو فى طوارئ اكتر من الثانوية العامة عشان كده هيكون لينا النهاردة مع الرجل المسئول عن الثانوية العامة مع وزير التربية والتعليم الدكتور يسري الجمل كلام ......... مسئول
ومن كلام وزير التربية والتعليم الدكور يسري الجمل "امتحانات الثانوية العامة هذا العام سوف تتفادى كل الاخطاء التي حدثت في العام السابق والكنتولات واللجان ستشهد ثورة شاملة باللجوء الى الاسلوب العلمي لاختيار القيادات واشراك المحافظات في تامين الاسئلة" ، "اسئلة امتحانات الثانوية العامة هذا العام ضد الاختراق طبقا لتوصيات النيابة الادارية باستخدام التكنولوجيا الحديثة" ، "امتحان الثانوية العامة هذا العام ليس سهلا ولا صعبا فالامتحان به جزء سهل وجزء اعلى للطالب المتميز وهو مطابق للمواصفات ومن المنهج الدراسي والجزء الخاص بالطالب المتميز لن يتجاوز ال15% من الامتحان" ، "تم وضع الاسئلة في مكان سري بعيدا عن أي اشخاص سواء العاملين بالمطبعة السرية او غيرهم وقبل مواعيد الامتحانات بوقت كاف" ، وقال الدكتور يسري الجمل "اعمال الكنترول ستتم بشكل انتقائي من خلال الكمبيوتر بهدف المزيد من الحيادية والشفافية" داخلين على امتحانات واشغال شاقة مؤقتة 24 يوم للمرحلة التانية و22 يوم للمرحلة الاولى الكل مشدود مش بس الطلبة والاسر اللي عندها السنادي ثانوية عامة الكل درجة الحرارة مرتفعة كالعادة في ايام الامتحانات ومرتفعة اكتر في البيوت وفي كل اجهزة الدولة المدارس تامين نقل الاسئلة للجان مدرسين مراقبين مصححين اعلام مسموع ومقروء مواصلات ومرور وألسنة ترتفع بالدعاء لنجاح الولاد والبنات وزير التربية والتعليم الدكتور يسري الجمل هيكون لينا معاه النهاردة كلام ........ مسئول
فاصل
محمد صلاح: ارحب بوزير التربية والعليم الدكتور يسري الجمل منور يا سيادة الوزير .. سيادة الوزير سيادتك اول ضيف يشرفنا مرتين في البرنامج شرفتنا في حلقة اذيعت في 19 مارس واتكلمنا عن امور التعليم والتربية النهاردة هنتكلم عن الثانوية العامة اللي بعد ساعات وضع الثانوية العامة ايه كله تمام كله تحت السيطرة
د/ يسري الجمل – وزير التربية والتعليم: اه كله تحت السيطرة السنة دي الشيء الغير عادي في الاعداد ان احنا نبدا المرحلة الاولى اللي هي سنة تانية طبعا عدد اقل بكتير جدا عشان سنة الفراغ فدي اول مرحلة وصول سنة الفراغ الى تانية ثانوي فالعدد المعتاد بيبقى حول 400 الف السنادي المتقدم 45 الف و500 للمرحلة التانية
محمد صلاح: سيادة الوزير تقول ايه لولادنا وبناتنا اللي بيشوفونا دلوقت واللي هيستفيدوا من الساعة دي ولادك اللي بيذاكروا دلوقت وبعد ساعات هيكونوا في لجان الامتحان؟
د/ يسري الجمل: اولا بندعو لهم باتوفيق دي الحقيقة قضية احنا بنشعر بيهم بشكل كبير جدا كاولياء امور قبل مسئولين ان هو مفيش شك انه امتحان الثانوية العامة له يعني وضع خاص لانه مرحلة الانتقال الى التعليم الجامعي من التعليم قبل الجامعي وانه فروق الدرجات البسيطة هي فروق درجات مؤثرة اللي انا عايز ااكده بس لولادنا انه دخول الجامعة ليس بالمجموع وانما بالترتيب
محمد صلاح: بترتيب المجموع؟
د/ يسري الجمل: ايوة بالترتيب في خلال المجال اللي الطالب متقدم فى بمعنى انه اللي بيتم حاليا المجلس الاعلى للجامعات بيعقد اجتماع لتحديد اعداد المقبولين قبل انتهاء الامتحان دا معناه ان الاعداد المحددة لا تعتمد على نتيجة امتحان اولادنا اماكنهم في الجامعة موجودة قبل ما يدخلوا الامتحان
محمد صلاح: لما يكون اعداد المقبولين في الجامعات متحددة هل معنى ذلك ان النتيجة محددة يعني اعداد اللي هينجحوا متحددة ؟
د/ يسري الجمل: لا .. دا معناه اولا اطمئنان ان الاماكن موجودة وطبعا مابتقلش دي بتطمن كل الناس بالذات في الجزء الاكبر من الاستيعاب اللي هو الجامعات الحكومية الحاجة التانية انه الدخول بيعتمد ليس فقط على المجموع برقمه المطلق ولكن على ترتيب الطالب بين المجموعة اللي هو متقدم من خلالها وبالتالي هنا مستوى الامتحان الحقيقة لانه امتحان بيعقد في نفس الوقت لكل الناس بشكل تنافسي الحقيقة دا موجود على الجميع دا الحقيقة بيريح الطالب وبيريح اولياء الامور ان الاماكن محددة انه مستوى الامتحان صعودا او هبوطا للجميع في نفس الوقت وبالتالي ترتيب الطالب بين اقرانه هو المحدد النهائي للوصول الى الجامعة
محمد صلاح: يعني دا كلام مطمئن لكن برضه مهما قلنا ولادنا وبناتنا منهم اللي بياخد مهدئات ومنهم اللي مرعوب ومستني لحظة الامتحان ليه الثانوية العامة هاجس دايما عند الناس بهذا الشكل ؟
د/ يسري الجمل: لانه الرغبة في دخول الجامعة مركزة على عدد معين من الكليات هذه الكليات الاعداد اللي فىا محدودة ومعنى الاعداد المحدودة ان التنافسية اللي فىا عالية جدا ودا بيسبب مباشرة ضغط عصبي ونفسي على اولادنا واولياء امورهم لان كل واحد بيتمنى ابنه يصل الى الكلية اللي على الاقل هو بيرغب فىا حتى لو في بعض الاحيان سوق العمل مش محتاج لكل دا زي مثلا كليات الطب رغم ان وزارة الصحة ونقابة الاطباء بتقول ان الاعداد الموجودة اكثر من حاجة الاحتباج لها وبيتم تقليل هذه الاعداد تدريجيا لكن مازال الاقبال عليها بدرجة عالية
محمد صلاح: حضرتك اتكلمت عن التنافسية وانت سيد العارفين ان تسرب الامتحانات يخل بمبدا تكافؤ الفرص ويضرب التنافسية بين الناس عملت ايه سيادة الوزير علشان مايتكررش اللي حصل السنة اللي فاتت في قنا وفي بعض الاماكن الاخرى ؟
د/ يسري الجمل: دي نقطة مهمة الحقيقة لان حدث الفساد اللي حصل في المنيا لكن التعامل معاه من ناحية القضاء كان صوته واضح جدا لان وصول العقوبات ل 15 سنة رادع لمن يحاول انه يعبث لان فى منظومة تكافؤ فرص مطمئن لها المجتمع كله وبالتالي أي فساد لابد ان يتم التعامل معاه بشكل واح وقاطع لكن في نفس الوقت اعطانى فرصة لعادة النظر في المنظومة كلها منظومة الاختبارات
محمد صلاح: استفدت من الخطأ اللي وقع وكان نتيجتها تسريب الامتحان عشان تحط نظام يكفل عدم تسريبه مره اخرى ؟
د/ يسري الجمل: بالتاكيد اولا كانت تعقد امتحانات الثانةية العامة والدبلومات الفنية في نفس الوقت دا معناه الموارد المتاحة على مستوى الجمهورية للتامين للنقل للتوزيع للاعمال كلها موزعة بين الامتحانين والاعداد اللي بتتقدم للدبلومات الفنية اعلى من الاعداد المتقدمة للثانوية العامة يعني هذا العام عندنا في الدبلومات الفنية 713 الف في الثانوية العمة بمرحلتيها 438 الف فطبعا كان الجزء الاول هو الفصل بين الاتنين ودا اللي تم هذا العام
محمد صلاح: يعني لما تعمل serves على 438 الف غير لما تعمل على مليون ؟
د/ يسري الجمل: بالظبط كده ، يوم 30 مايو ابتدت امتحانات الدبلومات وتنتهي هذا الاسبوع وبيبداء يوم السبت امتحانات الثانوية العامة والدبلومات لان فى جزء نظري وجزء عملي الجزء النظري انتهى خالص والجزء العملي بيكون في المداس فمالوش علاقة بالامتحانات العامة ، النقطة الاخرى اعمال التامين الخاصة بالامتحانات من اول الطباعة في المطبعة السرية .........
محمد صلاح: المطبعة السرية دي يا سيادة الوزير فى ناس اتكلمت في بعض البرامج وفي بعض الصحف ان المطبعة مش سرية ولا حاجه انا عارف المطبعة فين هب المسألة ان محدش عارف هب قين ولاّ محدش يجرؤ انه يحاول يقتحمها او انه يوصل للي بيحصل داخلها ؟
د/ يسري الجمل: فى اجراءات تامين عالي جدا للمطبعة
محمد صلاح: يعني الاجراءات هي اللي مثالية انما مكان المطبعة معروف ؟
د/ يسري الجمل: والله مش معروف بالدرجة
محمد صلاح: اقولك فين ؟
د/ يسري الجمل: لكن المهم الاجراءات الخاصة بالتامين يعني تم توقير معدات جديدة لاول مره بتستخدم قي عمليات عد الاسئلة – كانت بتتم بالوزن – دلوقتي بتتم .......
محمد صلاح: يعني كان الاول عشرة كيلو جبر ، خمسة كيلو تفاضل دلوقتي بعدد الطلبة
د/ يسري الجمل: بعدد محدد تماما واسلوب التغليف ليس الاسلوب الورقي انما الاسلوب اللي بيتم حسب المواصفات الدولية اللي هو التغليف بالبلاستك اللي لا يمكن فتحة الا بتمزيق الظرف بطريقة كاملة بعد ذلك عمليات النقل والتوزيع واشراك المحافظات مع وجود الموارد الاضافية اللي بيخلي عدد السيارات بقى اعلى وعدد وسائل التامين بقت اكتر لان المشكلة اللي حدثت في المنيا لما بيكون فى سيارة مطلوب منها التوزيع على عدد من اللجان بتقوم من مركز توزيع الاسئلة بتعمل حساب اخر لجنة وبالتالي اول لجنة بيوصلها الورق مبكرا معنى كده الفرق بين وصوا الاسئلة وفتح الاسئلة فى فترة زمنية انما النهاردة نتيجة وجود امكانيات اكتر تستطيع ان يكون قيه سيارة لكل لجنة وبالتالي بتعمل حساب وصول الورق قبل الميعاد بنص ساعة
محمد صلاح: سيادة الوزير هنا يرد للذهن سؤال الناس القائمين على العملية اللي بيغلفوا الورق بالبلاستك وبينقلوه في صناديق فولازية على حسب ما سمعت الناس اللي واقفين على الطباعة انت ازاي بتضمن ان هؤلاء الناس ليس لهم علاقة بالثانوية العامة او لهم ابناء او اقارب او واحد شاف سؤالين كده خزنهم حتى في ذهنه وطلع سربهم وحكاهم لاي حد هل عندك لائحة بالعاملين ؟
د/ يسري الجمل: اه طبعا فى لائحة وان مافيش قرايب حتى الدرجة الرابعة لكل الذي بعملوا في هذه المنظومة دا جزء اساسي من عملية التامين
محمد صلاح: انت شايف ان الاحكام اللي صدرت ضد اللي احيلوا الى القضاء مجرد صدورها رادع؟
د/ يسري الجمل: هو كان فى جزئين فى جزء عقوبة جنائية ووصولها ل 15 سنة اعتقد انها كانت صارمة فى جزء تاني اداري كل من جاء ذكره في هذه المنظومة من البداية من الوزارة وحتى اللجنة اللي حدث بها تسرب برغم عدم صدور احكام نهائية انما كل هذه الفئة تم استبعادها من المشاركة في اعمال الامتحانات هذا العام
محمد صلاح: اعتقد ان في امتحانات الاعدادية في قنا حصل مشكلة تسريب في الجبر او الدراسات الاجتماعية؟
د/ يسري الجمل: خلينا نفرق اولا امتحان الاعدادية بيتم على مستوى المحافظة اللي تم في قنا في الجبر مكنش تسريب الورقة كان تسريب المحتوى وتم اخطار الوزارة ان فى تسريب محتوى ورقة انما التعامل تم معاها مباشرة ومجموعة من المكتب وصلت لمحافظة قنا اولا كل الامتحات التالية اتغيرت كلها بالكامل وهذا الامتحان بنشتغل باسلوب التحليل انه بنبدا نشوف اوراق الاجابة في هذا المكان اللي كان واحد من المراكز كان مركز نجع حمادي وبنقارنها بكل المراكز وبنقارنها بباقي الاجابات والحقيقة اتضح انه مانم مكانش مؤثر على المركز ولا على باقي المراكز وانه مستوى الاجابة سواء الطلبة اللي اجابوا نشوف التوزيع كله سواء اللي حصل على الدرجات النهائية واللي حصل على مكانش مختلف عن أي مركز اخر وبالتالي مكانش فى أي داعي لإعادة هذا الامتحان
محمد صلاح: سيادة وزير الظاهرة التانية اللي حدثت السنة اللي فاتت وتم رصدها ظاهرة الغش ..الغش انواع فى دلوقت اللي قاعد بيعمل برشام مثلا وفى الغش الجماعي اللي كان بيحصل في بعض اللجان حد بيطلع بدري شوية ومعاه ورقة الاسئلة ومدرس ولاّ استاذ بيقف يجاوب عليها انتوا عملتوا ايه عشان هذه الظاهرة لا تتكرر ؟
د/ يسري الجمل: هو زي ما حضرتك تفضلت الان وسائل التكنولوجيا ايضا اصبح فىا وسائل غير عادية الموبايل والسماعات اللي بتشتغل بلوتوث
محمد صلاح: الموبايل ايه يعني بيكلم حد ويمليه الاجابات وكده ولاّ ايه ؟
د/ يسري الجمل: اه.. انه مممكن يستخدم انه يتصل بحد او يستخدم يديه بعض المعلومات
فاصل
ولي امر1: احنا نتمنى طبعا مايكونش فى تسريب ومفيش مجهود طالب ياخده طالب تاني يعني عايزين نبقى متقدمين حضاريا اكتر من كده يعني دا مش تقدم ولا تحضر اللي احنا بنعمله دا
ولي امر2: ناس على مستوى يعني معتقدشيكون فى تسريب ..تسريب من هنك بيبقى فى نفوس ضعيفة في حكاية الجيزة دينفوس ضعيفة
ولي امر3 : ارحموا بس ولادنا بتوع الثانوية العامة دا اللي انا عايز اقوله لان الولاد فعلا ماتوا من التعب ومن الارهاق دروس خصوصية مفيش طالب في الثانوية العامة ماياخدش دروس خصوصية او على الاقل بياخد في سنتر المواد واذا كانت لغات او تجريبي تبقى اصعب بالنسبة وبالنسبة للفيزيا بجد حقيقي حقيقي الولاد استووا استووا استووا يعني ايه رحمة بالناس وفي الاخر ايه بعد دا كله بيقعدوا ما يبيشتغلوش
ولي امر 4: الثانوية العامة دي لازم تخففها على الناس ..الناس استوت دروس خصوصية وانت اب وعارف بس انا مش عايزة اكتر من كده انك تخفف الدروس الخصوصية على الاولاد والاهالي والاسر المطحونة في المعيشة نفسها
ولي امر 5: الثانوية العامة نظام مفتوح في جميع انحاء العالم سنة معينة ومكتب تنسيق يتحدد مصير الانسان ..لا.. الطالب بيحتاج اللي هو عايز يعمله يعمله نسيبه بحريته بارادته باختياره مش باختيار الاهل باختيار الطالب نفسه وهذا النظام نظام فاشل ووزارة التربية والتعليم حقل تجارب بالنسبة للاطفال
فاصل
محمد صلاح: وزير التربية والتعليم دكتور يسري الجمل اب وعارف .. سيادة الوزير الطالب بالعدل والمساواة وفي نفس الوقت الطالب بمستوى معين وهنتكلم على مستوى الامتحان عشان ابنائنا يطّمنوا ..تفتكر الناس اللي بتطالب بالعدل والمساواة اذا اتيحت ليهم فرصة انه الامتحان يوصل لولادهم او يغشوا هيسمحوا بكده ويقبلوه سؤال محرج بس تجاوبني عليه ؟
د/ يسري الجمل: لا هو الحقيقة يمكن لاحظنا حاجتين اول متحدث بيتكلم على العدالة والمساواة وتكافؤ الفرص وانه أي نوع من التسرب دا اخلال بتكافؤ الفرص دي الغالبية العظمى حاسين انه قدامهم اه تنافسية بس تكون تنافسية عادلة لكل الناس في نفس التوقيت وبالتالي الفضل هيجد فرصة ان هو يختار احسن دي القضية الاساسية ..المتحدث الاخير فكرة ان هو طيب نخلي كل واحد يختار اللي عهو عايزه طيب كل الناس عاوزة تندخل الطب او الهندسة فلابد انه يكون فى مفاضلة ..المفاضلة طالما انها على اساس موضوعي ومطبق على كل الناس اللي موجود الان هو المجموع الكلي ودا مبدا في طريقه للتطوير هنتكلم على المشروع الجديد لكن حتى الان هذا هو مبدأ المفاضلة فإلى ان يتم تغيير هذا الموضوع هيفضل دا اللي موجود للمفاضلة بين الرغبات اللي كلها بتطلب مجالات محدة دي الاغلبية العظمى اللي هي عايزة تتجه اليها
محمد صلاح: خلينا نتكلم على مستوى الاسئلة طبعا برضه من الظواهر اللي حصلت في السنة اللي فاتت انه كان فى غش واترصد واتصور واتذاع وكان فى تسريب واتحاكموا اللي ارتكبوا هذه الجريمة كان فى ايضا ظاهرة تتعلق بصعوبة الاسئلة في بعض الامتحانات والرياضة كلها تقريبا التفاضل والتكامل الكيميا والفيزيا يعني انت بتفسر ازاي صعوبة الاسئلة دي يعني الناس بتسال بجد هل فى تعنت من اللي بيحط الاسئلة هل فى رغبة في تقليل اعداد الناجحين او الانخفاض بالمجاميع فسر لنا حكاية صعوبة الاسئلة ولاّ كل الاسئلة سهلة ولاّ ايه ؟
د/ يسري الجمل: لا ..هو دي نقطة مهمة وانما قصدت في البداية اكد على انه الاعداد المتاحة للقبول في الجامعات بتحدد قبل انتهاء الامتحانات وبالتالي الاعداد دي موجودة مالهاش دعوة بمستوى الامتحان الجزء الاخر وهو انه الامتحان لابد يكون له مستوى ..مستوى لابد ان هو يعطي فرصة للطالب المتميز والا لن استطيع ان انا افرق بين الطالب المتوسط والجيد والجيد جدا والممتاز ولابد يكون فى نسبة حددناها ب15% للطالب المتميز اذاً مش ممكن يبقى دائما الانطباع انه انا داخل امتحان لازم احل الامتحان 100 % ولو محصلش دا يحصل فى كل اللي بنتكلم عنه اللي حدث في العام الماضي كان في مادتين بالتحديد التفاضل والتكامل والفيزيا
محمد صلاح: خلينا في التفاضل والتكامل لانه بعض البرامج في التليفزيون المصري من بينها برنامج البيت بيبتك استضاف طلبة كانوا متفوقين في المرحلة التانية والناس معرفتش تحل وطبعا كله بياخد دروس وكده بس مش هنتكلم على الدروس احنا اتكلمنا في اللقاء اللي اتذاع 19 مارس وخلينا في الثانوية العامة اقصد انه كان طلبة مشهود لهم بالكفاءة وبالتفوق ايه اللي حصل بقى؟
د/ يسري الجمل: لا ما هو دايما فى اسلوب علمي للتناول اللي بيحدث اننا بناخد عينة من 5000 ورقة والحقيقة انه في كل الحالات لما بتصدر النتيجة النهائية نجد انه التوزيع الخاص بدرجات ال 5000 ورقة بيطابق تماما النتيجة النهائية فهي عينة ممثلة الحقيقة بناخدها من ال 4 قطاعات اللي عندنا من القاهرة واسكندرية والمنصورة واسيوط
محمد صلاح: دا في مرحلة التصحيح؟
د/ يسري الجمل: لا في مرحلة بعد اجراء الامتحان لو فى أي نوع شكوى من صعوبة الامتحان بدل ما نبتدي تصحيح الاوراق كلها
محمد صلاح: وليه من الاول ليه اصلا يكون فى شكوى ؟
د/ يسري الجمل: ما هو الاسئلة موجودة طبقا لمواصفات .. المواصفات فىا درجة سهولة ودرجة صعوبة
محمد صلاح: طبعا عشان الطالب المتميز
د/ يسري الجمل: اذا كان فى شكوى من درجة صعوبة معينة نتيجة زي ما ذكرت انه الاحساس انه انا ادخل اخلص الامتحان كله لو بصينا امتحان الفيزيا مثلا وكان فى شكوى من صعوبة الفيزيا لما صححنا ال 50000 ورقة وشفنا توزيع الاسئلة او توزيع الاجابات على فئات المجموعة يعني كام طالب جاب 50 من 50 كام واحد جاب من 45 الى 50 كام واحد جاب 40 من 50 لقينا ان التوزيع الحقيقة مطابق لكل ما هو موجود في الاعوام السابقة وبالتالي الحقيقة محصلش اجراء بالنسبة لامتحان الفيزيا الامتحان عادي وانه الشكوى اللي حصلت وطبعا بعد كده لما طلعت النتيجة الحقيقة لا تعكس غير انه احساس الطالب انه لابد ان هو داخل مفروض ان هو احساسه انه جميع النماذج الاسئلة حلها وبالتالي لابد انها تيجي مطابقة لهذه النماذج فى جزء من سؤال من المنهج وكل حاجة بس مش مطابق للنماذج بيسبب له مشكلة في امتحان التفاضل كان نفس الاجراء ولكن وجدنا اللي هي فى مجموعة خلصت الامتحان 100% انما المجموعة اللي هي من 100 ل95 او ال100 ل90 المفروض ان دي كانت مثلا مفروض انها 10 % كانت 6% وبالتالي الوزن الخاص بهذا السؤال بالرغم من ان فى طلبة اجابوه انه خلينا الوزن اللي عليه اقل وبالتالي دا اعاد النسبة للشكل المتاح
محمد صلاح: طب ما من الاول بدل ماتبقى النسبة 10 وبعدين نكتشف انها 6 مفيش دراسات تؤدي الى ان احنا نحط الامتحانات وفقا للقواعد اللي حضرتك قلت عليها انه فى درجة صعوبة للطالب المتميز عشان نظهر الطالب المتميز ودرجة عند المستوى المتفوق نوعا ما ثم الطالب العادي ثم الطالب اللي مش عادي خالص اللي تحت مستوى اللي هو الطالب الضعيف يعني ليه ما يكونش يه معيار لهذه الامور عشان ما تحصلش الامور اللي بنشوفها الناس ولادنا وبناتنا اللي خارجين من الامتحان ؟
د/ يسري الجمل: هو الحقيقة العام دا فى تغيير حدث
محمد صلاح: ايه بقى التغيير ما انا عايزك عشان فى ناس سامعانا دلوقت عايزين يطمنوا ؟
د/ يسري الجمل: احنا عندنا فى مركز قومي للامتحانات والتقويم التربوي بيضع مواصفات الورقة الامتحانية بيضع مواصفات الورقة بعد ذلك اللجنة اللي فىا الامتحان مفروض انها بتراعي هذه المواصفات اللجنة مكونة من مستشارين للمادة ومن اساتذة للجامعة السنة دي اولا بدينا نكون لجنتين منفصلتين كل لجنة فىا مستشارين واساتذة جامعة وعنصر من المركز القومي لتقويم الامتحان التربوي اللي هو المركز القومي اللي بيراعي مواصفات الورقة انها اسئلة للطالب المتميز 15 % زائد بقية المواصفات تكون مغطية المنهج كله وبتساوي بين الموضوعات كلها بشكل مهم وجود النهاردة هذه العناصر مشاركة بقى يعني مش بتضع المواصفات في البداية لا هي مشاركة في عملية الامتحانات وفى لجنتين وكل لجنة منفصلة بتضع امتحان ثم لجنة تانية بتختار واحد منهم يكون هو الامتحان الاصلي
محمد صلاح: انت بتقرا الامتحان يا سيادة الوزير يعني حد بيعرض عليك الامتحان؟
د/ يسري الجمل: لا ..
محمد صلاح: خالص
د/ يسري الجمل: لا لا
محمد صلاح: معندكش كده ولا سؤال نقوله للناس الي بتتفرج علينا ؟
د/ يسري الجمل: لا مفيش
محمد صلاح: سيادة الوزير ايه نظام الرأفة يعني امتى بتكون فى درجات للرافة ف امتحان معين هونظام موجود على طول حتى لو كان فى امتحانت صعبة او سهلة ؟
د/ يسري الجمل: لا مفيش نظام للرأفة في امتحان الثانوية العامة الدرجات اللي بياخدها الطالب متوزعة لان فى توزيع على الدرجات بجزء من الدرجة على كل سؤال فدا اللي بيلتزم بيه المصحح وهو
محمد صلاح: انما فهمت من كلام حضرتك ان الرأفة دي بتيجي بحسب انه اذا الامتحان زي ما حضرتك قلت انه نسبة حققت 6% بدل 10% زي ما كان مثررر وبالتالي هنا بترفعوا شوية النسبة بتاعة السؤال
د/ يسري الجمل: اه بنعيد توزيع النموذج اللي هيتم عليه التصحيح لصالح الطالب اللي هو اقل
محمد صلاح: طيب مش في عينات عشوائية المفروض بتاخد بعد الامتحان مباشرة دا اللي بنحدد على اساسه توزيع الدرجات ؟
د/ يسري الجمل: فى طبعا اللي وضع الامتحان وضع نموذج لتوزيع الدرجات طالما انه الشكل العام طبيعي هو دا نموذج اللي بيتم الالتزام بيه ودا في غالبية الحالات فيما عدا الحالات اللي بنضطر بعد تصحيح عينة عشوائية ان احنا نعيد توزيع الدرجات على النموذج اللي هيلتزم بيه المصححين
محمد صلاح: سيادة الوزير برضه من الملاحظات والكلام بقولوا ابناءنا في الثانوية العامة بيكونوا مستريحين قوي لما يكون فى اسئلة اختيارية كتير يعني المفاضلة او يركز على جزء او اللي حظه مش كويس او اللي ربنا مش موفقه في سؤال نسيه حتى لو كان مذاكره ان فى بدائل لكن دايما فى ملحوظة انه دايما السؤال الاجباري عادة بيكون هو السؤال الاصعب او بيحتاج وقت اطول في الاجابة ؟
د/ يسري الجمل: لا..هو الحقيقة السؤال الاجباري بيكون في جزء اساسي لابد الطالب يعرفه الاسئلة الاختيارية في اجزاء اخرى اقل شوية من الاهمية لكن فى جزء لابد ان الطالب يعرف الجزء دا فبيكون السؤال فى اجبار لكن طبعا وجود المزيد من الاختيارات مفيش شك انه بيسبب راحة للتلميذ
محمد صلاح: طب فى اختيرات كتير السنادي ولا ايه
د/ يسري الجمل: فى اختيارات
محمد صلاح: المناظر اللي شفناها في السنوات السابقة في السنة اللي فاتت انت متوقع انا تتكرر ولاّ لا الناس اللي بتعيط وبيغمى عليها بقى في اللجان هتصور وهتجيب تعليقات هتتكرر ولا مش هتتكرر دا فاضل ساعات والناس داخلة الامتحانات يعني متوقع ايه يا سيادة الوزير
د/ يسري الجمل: لا انا متوقع الحقيقة الاجراء اللي تم واعداد الامتحان ووجود عناصر من المركز القومي للامتحانات في كل لجنة وكل مادة الحقيقة انه اعداد هذه الاسئلة الحقيقة تم على مستوى عالي جدا من الاتقان
محمد صلاح: على أي اساس بيتم تحديد وقت الاجابة لانه برضه من الظواهر اللي اتكلمت عليها السنة اللي فاتت كتير انه بعض الامتحانات كانت محتاجة وقت اطول
د/ يسري الجمل: هو طبعا تحديد الوقت خبرة طويلة بقى على مدى السنوات انما هو الحقيقة اللي كان اكتر بقى هو انه فى اسئلة غير نمطية دا اللي كان يمكن مثار الشكوى السنة الماضية
محمد صلاح: لا ما هو يافندم انه احنا مش بنتكلم على الوقت المخصص لمادة زي الفيزيا او الكيميا او الانجليزي او العربي معروف انه الوقت 3 ساعات دا ساعتين دا كذا دا كذا انا بتكلم عن انه اذا كان فى امتحان درجة صعوبة سؤال في اعلى شوية ليه ما يكونش فى مرونة انه تغيير الوقت اللي احنا حافظينه من ايام ما كنت في كي جي وان
د/ يسري الجمل: هو طبعا فى وقت محدد يعني معروف انم الامتحان دا ساعتين او 3 ساعات بس طبعا احد النقاط الاساسية اللي بيراعيها ممثل المركز هو مناسبة السؤال مع الوقت انه الامتحان دا بيتم الاجابة عليه وبيتقاس الوقت فعلا مناسب ولاّ لا
محمد صلاح: ما هو اللي بيجاوب عليه دكتور في الجامعة مش طالب غلبان
د/ يسري الجمل: لا لا لا طبعا مش هيجاوب عليه حد عنده خبرة وبالذات مستشاري المواد عندهم خبرة كبيرة جدا في تقدير الوقت
محمد صلاح: سيادة الوزير ظروف الامتحانات عادة تاتي زي ما حضرتك عارف في الصيف وفي عز الصيف كمان السنادي عندنا موضوع انفلونزا الخنازير كلمني على التجهيزات اللوجستية اللي هي الاعداد لتهيئة المناخ لولادنا عشان يؤدوا الامتحانات في ظروف طبيعية وخصوصا الامتحانات فىا تجمعات وفىا اعداد كبيرة وعشان نتفاعل مع الوضع اللي حاصل في لبلد دلوقت بعد اكتشاف حالات انفلونزا الخنازير في مصر
د/ يسري الجمل: هودي نقطة مهمة الحقيقة لانه عايزين نؤكد ان منه اولا احد الاساسيات انه التهوية الجيدة طبعا في هذا الوقت من العام طبعا كل الشبابيك تكون مفتوحة والمسافات بين كل طالب والتاني لانه امتحان بتكون مسافات كافية
محمد صلاح: عشان ما يغشوش مش عشان انفلونزا الخنازير
د/ يسري الجمل: انما دي مناسبة جدا الحقيقة لان مفيش تكدس التكدس احد المشاكل عدم التكدس والتهوية دي احد القضايا المهمة جدا انما التعليمات الموجودة الان انه لابد من الترقب ايضا لازم الحذر والترقب بحيث لو انه فى أي مشكلة او أي حالة بيتم عزلها فورا
محمد صلاح: ايه اللي جهزتوه يا سيادة الوزير يعني ايه اللي انتوا حضّرتوه للتعامل مع الازمة اللي حاصلة الخمس ست ايام اللي فاتنوا اكتشاف الحالات الموجودة في الزمالك في الجامعة الامريكية في شركة بترول دلوقت يعني وفي اسكندرية امبارح انتوا جاهزين الان انه الامتحان كفاية وجع القلب بتاع المذاكرة والدروس والحاجات اللي انت عارفها حضرتك ما ينقلبش من الامر الى نشر لوباء يعني؟
د/ يسري الجمل: هي مهمة جدا التوعية بكل الناس القائمين على اللجان وعلى المراقبات الترقب واولا بنطمن انه فرصته مازالت موجودة اذا تم هذا العزل في الدور التاني وانها تكون من الدرجة التامنة او لو حدث هذا فدي طبعا قضية مهم جدا نرجو الله السلامة
محمد صلاح: امتحان الثانوية العامة بيكلف الدولة كام الامتحان مش العملية التعليمية يعني من ساعة طبع الاسئلة واختيار المراقبين وتسفيرهم واقامتهم ثم مرحلة التصحيح واعلان النتيجة التكلفة كام ؟
د/ يسري الجمل: الحقيقة يعني الاجمالي يمكن كرقم معرفوش انما مهما كان الرقم دا يستحق لان احنا بنتكلم على حدث هام جدا ومهما اتكلف ان احنا نوفر له كل ما هو مطلوب سواء ما يصرف للقائمين نفقات سفر او نفقات اقامة او البدلات اللي هي بياخدوها لكن يستحق لانه دا اساس في تحقيق تكافؤ الفرص
محمد صلاح: كام يعني ؟
د/ يسري الجمل: لا الرقم الحقيقة لانه طبعا موزع على حاجات كتير قوي
محمد صلاح: المهم ييجي بفايدة دا اهم حاجة يعني ؟
د/ يسري الجمل: لا ان شاء الله ييجي
محمد صلاح: زمان كنا جيلنا يعني من ايام الهكسوس كنا بنستنى امتحانات الثانوية العامة في السودان باعتبارها نموذج نحه نشوف مستوى الامتحان هيبقى عامل ايه دلوقت الصحف عادة بتعمل الحكاية دي انها تشوف نماذج الامتحانات نهاية العام في حل الثانوية العامة دا رضه اللي حاصل انت بتقيم التجربة دي ازاي شايفها مفيدة ؟
د/ يسري الجمل: والله احنا اكتر من كده احنا بنحط نماذج الامتحانات على موقعه الوزارة بما فىا امتحانات السودان كخدمة لولادنا ..ولادنا النهاردة بيتعاملوا مع الانترنت وجود نماذج من الامتحانات بتطمن اولادنا لانه اذا كان قادر على حل هذا النموذج ونموذج دا هو اللي اعدته الوزارة بنفس الشكل ونفس الظروف وان هو لما بيقدر على حله دا بيطمنه بشكل كبير قوي انه يستطيع حل هذا الامتحان
محمد صلاح: يعني مفيد دلوقت ان ولادنا يجيبوا الجرايد ويمشوا ايديهم شوية ودماغهم كده ويحلوا شوية اسئلة
د/ يسري الجمل: في المراجعات النهائية مفيش شك ان حلول الامتحانات بتدي ثقة يعني داخل انا حليت امتحان الموجود السنادي او السنة اللي فاتت
محمد صلاح: المهم يلاقي زيه مش يلاقي حاجة تانية خالص
د/ يسري الجمل: لا لا هيلاقي زيه ان شاء الله ي:
محمد صلاح: طب خليك معانا لسه الكلام مخلصش
فاصل
محمد صلاح: ولادنا اللي بيحلوا نماذج الامتحانات سيادة الوزير نصحهم انها ربما تكون خطوة اولية للدخول بعد كده للامتحان الحقيقي ويكون انه اسهل لانه مر بنفس التجربة عندنا تعليق من ولادنا اللي في الثانوية العامة سيادة الوزير تحب تشوفه
د/ يسري الجمل: اه نشوفه
محمد صلاح: نشوف ولادنا بيقولوا ايه
فاصل
طالب1: عايزين بس امتحانات الفيزيا تبقى سهلة عشان السنة اللي فاتت كانت صعبة قوي ويعني عايزين اللجان تبقى كويسة عشان بيزعقوا عالفاضي وعالمليان يعني اي حد يقعدوا يزعقوا على طول مش حلو يعني عايزين اللجان تبقى كويسة وبس الامتحانات تبقى حلوة وربنا يسهل يعني لو الامتحان على مستوى الطالب المتوسط سيقى حلو قوي
طالب2: عايزين امتحانات الفيزيا تيجي سهلة والرياضة 2 عشان امتحانات تقيلة يعني وناس كتير معرفتش تحل فىا واللجان زي الفل يعني بنشكر ربنا يعني
طالب3: بنتمنى كل الامتحانات تكون كويسة وظريفة يعني وتكون فى تهوية وتكون شمس ويكون فى دكتور عشان حتى محدش يتعب
طالب 4: يكون التاريخ في مستوى الطالب العادي اللي يعرف يحل ونتمنى ان ربنا يدخلنا الكلية اللي احنا عايزينها ونتمنى سيادة الوزير الامتحانات تيجي سهلة السنادي وفي الاخر اللجان تكون حلوة
فاصل
محمد صلاح: هو ايه معيار ان الامتحان يبقى ظريف امتحان حلو ومفهومة يعني تفتكر ازاي امتحان يبقى ظريف ياسيادة الوزير
د/ يسري الجمل: الامتحان يبقى ظريف لما يكون مناسب للوقت دا مهم جدا وبيراعي كل الفئات بمعنى انه ما يكونش فى المستوى اللي لا يستطيع التفرقة بين المتميز والي بذل مجهود واللي مستواه اعلى وبين الطالب انما لاحظت فكرة اللجان يعني مهم قوي في اللجان الهدوء الحقيقة وانا باوصي كل الزملا اللي بيعملوا في الرقابة انه لابد من انه كل ما يتم حتى من تعليمات لازم تكون بهدوء شديد جدا بدون ازعاج بدون صوت عالي لانه ما ننساش ولادنا دول اللي بيمتحنوا في حالة توتر يعني مركز عايز يحقق اكتر ما يمكن والوقت بيمر يعني كل دا لابد ان احنا نراعيه طبعا توفير المكتلبات كلها بنتكلم في حر لازم تكون المية موجودة التهوية جيدة لو فى حد ملا نتيجة فتح شباك عاوز الشمس نحاول ان احنا نتصرف بحيث ما تجيش عليه يعني فى حاجات كتيرة قوي يعني المراقبين طبعا عارفينها
محمد صلاح: بتجيلك تقارير سيادة الوزير عن الحاجات دي اثناء فترة الامتحانات اذا كان حصل بعض الخروقات او الاخطاء تصدر توجيهات او تعليمات
د/ يسري الجمل: اه طول الوقت وعشان كده الحقيقة غرفة العمليات طول الوقت لمتابعة ما يتم في 1390 لجنة بيشتغلوا في نفس الوقت لازم متابعة ان كل ما يتم في هذه اللجان لازم يكون بشكل جيد
محمد صلاح: انت قلت في تصريحات صحفية الاسبوع دا انه تم مراعاة رغبات اولياء الامور وابناءنا الطلبة والطالبات في ملاحظاتهم في جدول الامتحانات دا تم ازاي يعني
د/ يسري الجمل: هو طبعا السنتين الماضيتين الممثلين للطلاب في الادبي والعلمي وفي لما اعرض عليهم الصورة الاولانية في الامتحان دول طلبة متميزين الامتحان لابد انه يبدا في ميعاد وينتهي في ميعاد ومراعاة الفروق بين كل مادة والاخرى على اساس اننا نصل الى الشكل اللي يحصل على اغلبية وليس اجماعا لانه عمره ما بيحصل على اجماع من خلال سنتين في هذه الممارسة وصلنا الى الشكل الافضل وبالتالي افضل من انه يتم تثبيته فالجدول هذا العام هو جدول السنة اللي فاتت بس جدول السنة اللي فاتت كان مبني على مناقشة مع الطلبة وبالتالي الحقيقة بيحقق معظم الرغبات لاتاحة عدد من الايام قبل
محمد صلاح: انت لغيت اللجان الطبية بناء على ما جرى السنة اللي فاتت الامتحانات طبعا احنا بندين ونرفض ومع أي اجراء يدخل والعدل بين الناس ووجود حالات غش في هذه اللجان او استخدام النفوذ او السلطة لحد من ابناءنا فيجيله الامتحان او يتسهل له الاجابات مسالة فصلت فىا المحكمة واتاخد فىا قرارات قضائية اللي عيان بجد او اللي عامل عملية قبل الامتحان بيومين هيبقى وضعه ايه
د/ يسري الجمل: هو الطالب الي عنده عذر مرض قبل الامتحان احنا عندنا احد المميزات ان لدينا دور تاني اللي له عذر مقبول يستطيع دخول امتحان الدور التاني من الدرجة النهائية لانه المفروض الدور التاني يدخله الطالب من50% نمر النجاح فقط انما الطالب اللي لديه عذر مقبول ويستطيع دخول امتحان الدور التاني من الدرجة الكاملة ودي الحقيقة النظام اللي متبع في الجامعات الحقيقة بيتم بنفس هذا الاسلوب
محمد صلاح: المقبول دا ممكن يكون زي ايه اديني نماذج يا سيادة الوزير يعني مين اللي هيحدده مين اللي هيفصل فى .؟
د/ يسري الجمل: تقرير من مدير المستشفى والطبيب ورئيس المنطقة الطبية بيقولوا فعلا ان هذا العذر زي الحالة اللي انت قلت حالة حصلت قبل الامتحان مباشرة تمنع الطالب ان هو يحضر
محمد صلاح: ومفيش ميزة ان حد يلجا الى استخدام مسالة اعذار لانه مش هيحصل على ميزة اصلا اذا تاخر في انه يدخل الدور التاني
د/ يسري الجمل: اه بالعكس فترة الصيف هيضطر تاني يذاكر عشان
محمد صلاح: كانت الميزة في الاول في اللجان الطبية او بعضها بقى انه قاعد متروق بقى في المستشفى وفي التكييف وبتجيله الامتحان وبيجيله الاجابة الناحية التانية دا مش هيحصل خلاص ؟
د/ يسري الجمل: خلاص اتلغت كل اللجان اللي موجودة في المستشفيات تماما
محمد صلاح: طب سيادة الوزير مسالة استخدام بعض التكنولوجيا زي ما حضرتك ذكرت البلوتوث والموبايلات امتى في الوزارة واحنا بنتكلم عن الامتحان امتى التكنولوجيات اللي استخدمتها ليكون الامتحان اولا بشكل افضل ومضمون افضل ونتايج اكثر امانا واكثر عدل
د/ يسري الجمل: هوطبعا استخدام التكنولوجيا من المهمة جدا في كل المراحل احنا اتكلم احد الاستخدامات هي توزيع الكتنترول والمراقبين باستخدام الكمبيوتر بالكامل بحيث ان احنا مفيش ارتباط الان كل المراكز الخاصة بالتصحيح متصلة بالكمبيوتر والحقيقة وصلنا لها من خلال اتصال سريع للقمر الصناعي بحيث انه التصحيح لما بيتم في الاوراق بنستطيع مباشرة معرفته بالكامل على فئات الدرجات كلها على الكمبيوتر طول الوقت وبالتالي كل تصحيح بيتم ..بيتم ادخاله على الكمبيوتر وبنقدر نعرف موقف هذه المادة وتوزيع درجاتها على الفئات المختلفة
محمد صلاح: سيادة الوزير لما حد يكون كده طالب قاعد من ابناءنا دلوقت وان شاء الله بعد 3 او 4 اسابيع يلاقي معالك وزير التربية والتعليم انه من الاوائل انت ليه بتكون حريص انك تكلمهم بنفسك ؟
د/ يسري الجمل: اولا بيبقى الحقيقة الطالب المتميز واسرته كلها انا امتن انه يكون فى تسجيل من الناحية التانية قد ايه استقبال هذا الخبر لانه الوزير بيتصل دا معناه انه الابن من الاوائل على مستوى الجمهورية وشيء جيد جدا طبعا بيكون مفيش اثر ايجابي بشكل كبير جدا على الطالب وعلى اسرته
محمد صلاح: سيادة الوزير احنا عايزين نطمن ولادنا برضه تحديد ان السؤال ان الامتحان لانه طبعا فى تركيز على مستوى الامتحان سهل ولاّ صعب على أي اساس طبعا احنا شفنا الناس اللي كانت بتتكلم في التقارير وعرافين قرايبنا وابناءنا اللي لهم علاقة بالثانوية العامة من اولياء الامور او من الطلبة هنقعد نقولهم بقى اصل 15% للطالب اللي كذا و20 للتطبيق و17 لكذا ..الامتحان بيبقى سهل ولاّ صعب السنادي
د/ يسري الجمل: الامتحان مطابق لمواصفات الورقة الامتحانية فى اسئلة متدرجة في المستوى فالحقيقة منقدرش نقول امتحان سهل او صعب دي حاجة نسبية
محمد صلاح: طب سهل على مين وصعب على مين ؟
د/ يسري الجمل: انما المهم نطمن انه مغطي المنهج وفى وقت كافي للاجابة متدرج المستوى لكل طالب في كل مستوى المجال ان هو يجاوب
محمد صلاح: يعني اقدر اسالك سؤال انه الطالب اللي ذاكر كويس قوي وعقله كويس كده ومصحصح وواخد دروس في كله بالنسبة له الامتحان يبقى سهل ؟
د/ يسري الجمل: بالنسبة له الامتحان هيبقى ان شاء الله سهل
محمد صلاح: والطالب اوالطالبة يعني اللي لاقدر الله هيطلع بقى ويتمرمغ في الارض ويشتكي دا انت بتعتبره مش مذاكر ؟
د/ يسري الجمل: بعتبر ان هو كان متوقع يعني شيء اكتر بكتير قوي من قدراته انما نجد انه بالذات رد الفعل لبناتنا بيكون اكثر شوية في
محمد صلاح: طب خليك حنين عالبنات بقى ..بعد الامتحان وفى النتيجة طبعا مشكورة وزارة التربية والتعليم وبشكل سريع قبل ما تعلن النتيجة في الدارس هتعلن عبر الموقع الالكتروني في شبكة الانترنت لوزارة لكن طبعا بيكون فى ضغط شديد جدا على الموقع نتيجة الملايين اللي بتحاول في نفس التوقيت انها تشوف النتيجة اللي بيحصل سيادة الوزير انه الوزارة نتيجة لبعض المواقع الالكترونية الاخرى اللي عشان تدخل لها لابد ارقام تليفونات معينة الاخبارية على شبكة الانترنت وبالتالي بظل الاتصال بهذه الشبكة عن طريق رقم فصيلة اخرى عشان الناس تدفع تكع وهما الناس اصلا كعين في الثانوية العامة والدروس الخصوصية وحاجات لطيفة كتير يعني فايه البدائل اللي ممكن تطرح على الناس انت عارف ساعتها انه الوقت بيبقى عصبي جدا على الناس والناس مش مستحملة ضغط عصبي بعد الضغط السنتين في الثانوية العامة ..انتوا بتبيعوا النتيجة ولاّ لا في الاول
د/ يسري الجمل: لا يعني ان عايز اقول ان اول موقع هو موقع الوزارة ..موقع الوزارة دا موجود على الانترنت بدون أي تكلفة انما في نفس الوقت لانه طبعا العبء بيبقى كبير جدا فى بعض الشركات بتطلب انها تعلن النتيجة بس مش ممكن تكون قبل الوزارة فطبعا أي خدمة اخرى ..احنا بنتكلم عن الحزمة المتاحة لموقع الوزارة الان تم مضاعفتها عشان نقدر نخدم عدد اكبر والسرعة تبقى افضل والحقيقة خلال الفترة الماضية لانه كان فى عندنا مثلا كادر المعلمين لما طلعت النتيجة احنا بنتكلم على 840 الف يعني اكتر من الثانوية العامة كلهم عرفوا النتيجة من خلال موقع الوزارة
محمد صلاح: اخر كلمة تقولها لابناءنا الطلبة هما داخلين الامتحان بعد ساعات طمنهم بكلمة الله يخليك
د/ يسري الجمل: والله اهم ما اقدمه دعواتيي
محمد صلاح: لا ما احنا كلنا بندعي .. لا عايزين حاجة غير الدعوات
د/ يسري الجمل: لا بطمنهم الحقيقة ان كل ما يمكن الوزارة تقدمه في انه الامتحان جيد امتحان بيراعي كل مواصفات الورقة الامتحانية وانه كل الاجراءات اللي هي تامين الامتحان مبدا تكافؤ الفرص تم اتخاذه وتاني مرة لابد من الدعوات بالتوفيق
محمد صلاح: يارب ..امتحان الثانوية العامة بعد ساعات يارب كل اللي تعب نجح ولكل مجتهد نصيب ، استمعنا الى كلام وزير التربية والتعليم قال كلامه الدكتور يسري الجمل يارب يكون كان كلام جميل كلام معقول بس اكيد قبل ساعات من الثانوية العامة قال الوزير كلام ........... مسئول