قصيدتان

مَلِك
وشك مغير ملامحك
و الضلوع خنقاك
محبوس ف كلمة
وليها ألف معني
وطن
بيغزل وحدتك مرسي
لابن العرق
والهدوم الدايبة
والقلوب التعبانين
ضي النيون بيلسع جتتك
والذكريات دوا موصوف
رافض دخول المرحلة
داير بأحلامك
سقّا ف وادي النيل
ماحفظتش غير البسملة
وآيات الصبر
وفضل البكا
وذكر دخول المدافن
واللقا أوراد منسية
ف دفتر التواريخ
و بلاد بلا سكن
بلا عنوان
بلا وطن
حواديت وملضومة ف لسانك
والعرق بيفسد الحواديت
يا خربشات الضي
ف عيون الطيبين
مخاوي سكتكم
وشوق مسكتكم
و اللي صبر ينول
أوصاف
الحزن أبعد م الضلوع
و الذكريات مراجيح
يا معدي للجنة
ف غناوي المحرومين
الضي بيمد الجسور يمك
قنديله من دمك
يوسف طريد حلمه
و انت ف بير حلمك
سالت دموعك ملايكة
روت بلح مريم
جنة قلوب التعبانين
صوت الأدان اتأخر
واتلموا يا تايهين
رصو الصفوف و اتطوحوا
واللي انسرق
وشي
وشوية ملامح
وصال
وسط الزقايق
وف زحمة الطوابير
مشدود للمتكم
متكفونيش أحلام
لساكو بتشربوا م النيل
وف انتظار تكبيرة الاحرام
محدوف ف حواديتكم
ولا يحلي الكلام
اخرجوا
واقروا أشعاري علي روس العباد
يغيب الشيخ ولا يطولشي
وأنا طايل شواشيكم
البر انتهي
والبحر له آخر
واقف لذكراكم
بتهز علي خوفي
سامع تواشيح الجنه
بوداني
ماتسلموش السبح
الصبح ماضلش
وان ضل مايضلش
كل اللي ماتوا
علموا ف قلبي
كل اللي ماتوا
و علموا قلبي
عضوا علي
عضوا علي و اتقاسموا
واتلموا ف الحلقات
يتطوحوا ع الدق
ف سكوت
بيحدف رهبته ف النني
وعيون بتفارق ضيها
وغريب بيتسند علي غربته
والحزن بيمط الزمن
وحي ع الحيرة
واتلموا من تاني
رعشة و التانية
تنفرط حبات كهرمان
تفر من جوفي
والمح ملايكة ربنا
ماليه الحواري
وسط الزقايق
وف زحمة الطوابير