يوم الشهيد

كان يا مكان
كان في شهيد فاكرينه مات
واقف بيتفرج علينا من سُكات
يدخل علينا زي نور المشربية
يزيد له شوقنا مع حديث الذكريات
يمسح دموع الأمهات
حمال أسيَّة..
والصبر غيَّة..
صوت المظاهرة يلهمه..
طالع لجنّة ربنا على سلّمه
والكام رصاصة الدافيانين جواه .. معادش بتألمه
أيوة معادش بتألمه..
إلا لما واحد صاحبه يبكي عليه ويتشحتف
بكلمة زي الله يرحمه
..........................
خلّفتي يا مصر
واللي خلّف شهيد ما مات
سبع تلاف عام مواكب خير بتتوالى
خلّفتي فرحة
و فرحة غيرنا لسه ما جات
خلّفتي كلمة لأمه لسه أوّاله
خلّفتي راجل بيهزم جيش من الأغاوات
نعلى بأفعالنا ونفوسنا ما تتعالى
بننحسب بالغلط في لستة الأموات..
وإحنا اللي ما عشنا فوق ضهر الوجود عالة
كان يا مكان كان في شهيد..
كانت نهايته أو بدايته لما يوم حفروا القنال
خلّف شهيد
كانت حكايته لما يوم عبروا القنال
خلف شهيد عاش كالرجال
حربه اسمها اللقمة الحلال
كان في شهيد عايش سؤال..
مين اللي ماسك دفة المركب و حادف ليه شمال ؟!
مين اللي خرم مركبك يا مصر ؟!
مين اللي داس الكوخ برجل القصر ؟!
كان يا مكان
كان في شهيد رافع علامة النصر
يوم كان في عبّارة و يوم في القطر..
وليله بايت في الدويقة جوا بيت من صخر
و ليله جوا القسم أو في المعتقل راضي و سعيد
خالد سعيد ..
عاش كالرجال .. سيد بلال
.................................
كان يا مكان
كان في شهيد خلّف شهيد
جاور شهيد كان جد جده كمان شهيد
صاحب شهيد ناسب شهيد
جوّز بناته الخمسة لولاد الجيران..
طلعوا ولاد عم الشهيد... جابوا شهيد
عاشوا وما عاشوا يقاوموا القتل في الطوابير..
ماشيين على المسامير..
والكل بيعظم سلام لعصابة الخنازير
الظلم فاض..
هات طوبة ياض..
داخلين علينا البلطجية طوال عراض
راكبين جِمال شبه القُراض
هات طوبة ياض..
حصلني دوغري عند عبد المنعم رياض
بتقولي عبد المنعم رياض؟!
مش قلتلك؟
كان في شهيد..
خلّف شهيد..
خلّف شهيد..
طب إيه الجديد؟
ربك يريد
...................................
أنت الشهيد اللي جبينك ضي
واخد تلات رصاصات على شومة..
مقولتش أي
زينة ولاد الحي..
وإنتي الشهيدة عروسة ملهاش زي
أنت الشهيد و قصيدتي ماشية في موكبك بتزُك..
أنت اليقين في أُمّه عاشت عمرها بتْشُك
ماشي في طريقك محترم..
والكل ماشي يعُك
نزّلتنا بأسلوبك أنت لزحمة الميدان..
من زحمة الفيسبوك
أنت الشهيد ابن الشهيد اللي اتولد عشان يكون إبنه شهيد
و إبنه شهيد و إبنه شهيد
طب إيه الجديد؟ ربك يريد
..............................
وحياة كنائس رددت صوت الأذان..
وحياة شجاعة شعب ضد رئيس جبان
وحياة ما دمّعنا وكحّينا وخنقتنا قنابل من دخان
وحياة سلاح الأمريكان ضد الشغب..
وحياة ما شاف الكون على إيدينا العجب
وحياة ما قداسنا وصلاتنا وحدوا كل المكان...
وجمدوا جري الزمان
وحياة ما زيّنّاك يا سور البرلمان
وحياة جرايد هلّست واتريقت..
وحياة أماني اتجمعت واتفرقت
وحياة فدادين الغلابة اللي على أهل القصور اتبعزقت
وحياة إرادة اتجرأت وحياة عنين اتخزقت
وحياة عنين تانية في وشوشنا برقت
الثورة دي مش ملكنا..
إحنا اللي ملك الثورة يا جدعان.
وحياة نومتنا على الرصيف وسط الميدان
دم الشهيد ابن الشهيد اللي أكيد خلف شهيد...
لازم ينور درب مستقبل جديد
...................................
منصورة بينا يا مصر منصورة
رسمنا ثورتنا بلون العدل..
وعملنا من الدبابة سبوره..
نكتب عليها رأينا في الندل..
ونجيب ولادنا لجل ياخدوا جنبها صوره
ماشيين بقدره ربنا على الحبل..
مايهمناش السجن ولا القتل
نايمين على الأسفلت شوكه في حلق أي عصابه محشوره
منصورة بينا يا مصر منصورة