قصيدة جالك كلامي يا وطن

مفتتح
بوعزيزي وخالد سعيد وناس كتير كبد أهاليهم
أول شهيد محروق في الميدان عبده عبد المنعم محدش يعرفه بابلو نيرودا وناظم حكمت وجيفارا وماوتس تونج وميشيل عفلق وطبعاً يوسف صديق ونجم اللي قال الجدع جدع والجبان جبان بينا ياجدع ننزل الميدان أما أنا..
أنا اللي طول عمر عيني بتقدر تميز بين غنوة صبر معقودة تريد تنحل وطرف عدودة في حنك الارامل نفسها تدوب زغاريط بس النهاردة.. مين اللي رايح للجنة.. ومين اللي نازل للبحر.. يا هلتري.. الدنيا هتعيش من بعدينا قد إيه...؟!
الليل كان صعبان عليه يرحل والقمر مش مبطل عياط ولا نهنهة الضنا غالي والوطن بينا بيتعاجب بس الليل خاين والنهار شاهد عيان حتي الارض بتطرح دود فوق التراب يلقي الدم والخلا خيمة وسكن آه يا قلب العيال.. يا متحزم في الميدان والليل بياكل فيك لو تزعق بالغضب.. يجري الزمن قدامك زي الريح ما يهمكش صغير الحنش الباغي أبو الجلدخشن.. مدام بتعزم بالقسم.. جالك كلامي يا وطن.. البحر النهاردة غيركل يوم.. البحر اخطبوط والموج دراعاته عفيه.. البحر جوفه غويط اللي ينزل جواه ما يطلع غير بشهقة مهمن غالب قوة الغرق مهمن عافر وسط العشمانين.. ينشف حواليهم.. البحر شبرين يا دوب بيني وبين جنة حلمك.
يا وطن مسكون بالغريب ولا تعرف الواجب.
ماشي علي راسي وعنيا مرغرغة
علي خلق بتلف حوالين روحها والكعب داير..
تتعب وتشقي وبرضو ترجع من غير ما تتراضي
انا اللي بقول: الحزن له مطرح وناس تسكن جواه
مهمن يجور عليها الزمن ويخطف فرحتهم
عشان خاطرهم.. عنيا تبوس الشمس وصابحه بتغني
عشان خاطرهم وخاطر ربنا
من غير ما تزعل مني..
الدنيا هتعيش من بعدينا قدإيه...؟!
انطق يا وطن..
الدنيا هتعيش.. قد ايه..؟!
بعدينا!!