حوار تخيلى بين إيهاب جلال ومشجع زملكاوى بعد السقوط بالدورى وأفريقيا

لا تزال جماهير الزمالك تعيش فترة عصيبة بسبب الاخفاقات المتتالية لفريق الكرة سواء على الصعيد الداخلى والمحلى أو الصعيد القارى رغم تفاؤل الجميع بدخول عصر جديد تحت قيادة إيهاب جلال المدير الفنى للأبيض والذى تولى المسئولية قبل نهاية الدور الأول للموسم الحالى مباشرة.
"اليوم السابع" ينشر فى السطور التالية حوار تخليل بين إيهاب جلال ومشجع زملكاوى عقب خروج النادى الأبيض من بطولة الكونفدرالية الأفريقية و تضاءل فرص المنافسة على وصافة الدورى المصرى الممتاز بالخسارة أمام المنافس الرئيسى الإسماعيلى.

مشجع :
ليه يا كابتن الزمالك بيخرج من البطولات ؟
إيهاب جلال :
عشان فى حاجات كتير جدا محتاجة تتصلح داخل الفرقة ومفيش بنى آدم يقدر يصلح كل حاجة فى وقت قليل ولازم الأمور تتعالج بالطريقة الصح عشان الأخطاء دى متتكررش تانى والزمالك يبقى فى مكانته الطبيعية .

مشجع :
هو المركز الثانى ضاع كده يا كابتن ولا الأمل موجود ؟
إيهاب جلال :
مفيش حاجة اسمها الأمل ضاع مادام الفرصة موجودة ولازم نموت نفسنا فى الماتشات الجاية عشان نفوز ومالناش دعوة بنتائج الفرقة التانية لكن نعمل اللى علينا الأول .

مشجع :
ليه يا كابتن أيمن حفنى ومحمد إبراهيم مبيلعبوش ؟
إيهاب جلال :
أيمن حفنى و محمد إبراهيم لاعيبه مهمة جدا فى الزمالك وهيلعبوا فى الوقت المناسب ومفيش مدرب هيقعد لاعب هيخليه يكسب لأن مصلحتى أن كل الناس الكويسة تلعب عشان الفريق يفوز .

مشجع :
ليه دائما بتلعب عنتر ونانا بوكو وأداؤهم وحش ؟
إيهاب جلال :
محمد عنتر و بوكو لاعيبه جامدين جدا لكن عايزين يكسبوا الثقة فى أنفسهم وده اللى أنا بحاول أعمله معاهم فى الفترة دى ومع الماتشات هيكونوا إضافة كبيرة أوى للزمالك .

مشجع :
هنفوز بكأس مصر ولا هتحصل باقى البطولات ؟
إيهاب جلال :
إن شاء الله الزمالك هيفوز بكأس مصر ونتأهل للسوبر المحلى ونفوز بيه كمان .

مشجع :
احنا مش ناقصين حرقة دم وشوفلنا حلول بسرعة ؟
إيهاب جلال :
بحاول كل يوم أعلاج كل المشاكل و السلبيات التى بتقابلنا من ساعة ما جينا وأحنا مش بنفكر غير فى كده وأنا مش شغال لوحدى معايا جهاز فنى كبير وكل الناس هدفها واحد أن الزمالك يتحسن وضعه ويرجع لمكانه الطبيعى تانى .