بالفيديو.. عمر جابر لرئيس الزمالك: «والله العظيم مبخافش منك»

قال اللاعب عمر جابر لاعب نادي الزمالك السابق: «حكاية الفيديو الذي هاجمني بسببه رئيس نادي الزمالك مرتضى منصور هو أنني سمعت الجمهور يشتم فريق نادي الزمالك، وسمعتهم يشجعونني لأنني لم ألعب المباراة، فذهبت إليهم لتهدئتهم لكي يتوقفوا عن شتيمة اللعيبة لأنهم إخوتي، وكنت من الممكن أن أكون مكانهم، فقلت لهم علشان خاطري متشتموش النادي، وفي النهاية قال عني أصدقائي كلام سيء ولكن والله العظيم أنا مسامحهم».
وأضاف، في لقاء مع الإعلامي وائل الإبراشي في برنامج «العاشرة مساء» على قناة «دريم2»، مساء الثلاثاء: «رئيس نادي الزمالك قال أنني بطل من ورق وأنا أقوله حاجة، أنا بحترم حضرتك جدًا عشان حضرتك في سن والدي ورئيس النادي اللي أنا بنتميله بس أنا مبخفش منك، أنا بحترم حضرتك واحمد وأمير ولادك على طول بيكلموني وزي اخواتي، بس أنا مبخفش من حضرتك، أنا بحترمك عشان أنت راجل رئيس النادي اللي أنا بنتميله وتاني حاجة عشان أنت راجل في سن أبويا، أنا مبخفش منك والله العظيم، حصل قبل كدة يا أستاذ وائل كذا موقف، بيوقفني، يعني بعد ماتش الأهلي بتاع السوبر، ممكن كابتن حسام وإبراهيم (حسن) يطلعوا في مداخلة يقولوا إن ده اللي حصل ولا لا».
وتابع: «ماتش السوبر بنلاعب النادي الأهلي اتعادلنا في الماتش وخسرنا ضربات جزاء، رئيس الزمالك طلع بعد الماتش ازاي كابتن حسام بيلعب عمر وأحمد توفيق، وطلع قرار مجلس إدارة عمر ميلعبش الماتشات، ليه ملعبش الماتشات؟ عشان أنا كنت ساعتها في مشاكل التجديد ومش عايز أجدد وهجدد ولا لا.. يعني هو عشان هيلوي دراعي هجدد؟».
واستطرد: «لو عايز اتمرد على نادي الزمالك كان يحقلي أمضي في أي حتة تانية من 1 يناير، بعد المشاكل اللي أنا شفتها وتهزيق ليا، ده عيل بكادليز، هو اسمه بامبرز مسموش كادليز، وأبوك معرفش يربيك، أنا الحمد لله أبويا ووالدتي ربوني أحسن تربية، وكلم والدي ساعتها عملت حوار في جريدة مشهورة (المصري اليوم) دافعت عن الوايت نايتس، كلم والدي وقاله أنت معرفتش تربي ابني، والدي طبعًا مربيني كويس وهو طبعًا متربي كويس قام قاله أنا مربي ابني احسن تربية، فلسة طبعًا هيتخانقوا راح رئيس الزمالك قفل التليفون في وشه».
شاهد أخبار الدوريات في يوم .. اشترك الآن