بالفيديو والصور ... فيتو فى منزل شهيد أحداث بورسعيد .. والدة الشهيد لمرسى : من حقنا تقعد معانا .. وتحذر: يوم 26 سيكون مذبحة لمصر كلها

قالت سريا محمد رجب والدة محمود خاطر ابن مدينة المنصورة وأحد شهداء مذبحة بورسعيد: "لسه حق ابنى مجاش مفيش أى حق لأولادنا جه ، وبنقول للرئيس مرسى : اتق الله فينا ، وبنقوله : ارحمنا شويه ، حس بينا ، حس إن ولادنا دول راحو غدر ، ما كنوش رايحين يعملو حاجة وحشة، ولا هما بلطجية ، ولو كانو بلطجية كانوا قدروا يحمو نفسهم ".
وتابعت: إحنا عايزين العدل من عند ربنا مش مستنيين العدل من أى حد ، العدل بتاع ربنا هو اللى هناخد بيه حق ولادنا ".
ووجهت رسالة للإعلام قائلة: "يا ريت الإعلام يرحمنا شويه ؛ لأن محدش حاسس بينا ، ولا حرقة الدم اللى إحنا فيها ، قاعدين مطلعين علينا إننا خدنا ملايين ، والله ماخدنا حاجة من الدولة بقالنا 11 شهر وداخلين عالسنة ، مخدناش من البلد أى حاجه ولا أى حد فى البلد قالنا سلامو عليكو " .
وأكدت سريا قائلة: " صحيح رئيس الجمهورية مكنشى موجود أيامها بس هو من المفروض مسك البلد فلازم يحافظ على شباب بلده اللى كل يوم بيموتوا ، ليه مش بتراعى ربنا فينا ، لو عيل من عيالك اللى مات ، الدنيا كلها هتتقلب ، مصر كلها هتتقلب ، ويكفينا إن الدول العربية بتسأل علينا والناس الغريبة بتسأل علينا اللى ماسكين بلدنا مش بيسألوا إنت قولت : 100 يوم وال 100 يوم عدوا عملت لينا إيه ؟ " .
وطالبت سريا من الرئيس بالسماع لأسر شهداء أحداث بورسعيد ، ومقابلتهم قبل القصاص قائله : " إسمعنا ياريس قبل ما مصر تبقى فى التدمير مع إنها بقت فى التدمير خلاص ، أنا قابلتك قبل الانتخابات فى استاد المنصورة ، وقولت لى : يا أم محمد متقلقيش ، دم ابنك والشهداء فى رقبتى ، وقبل ما هدخل القصر هتكونوا قبلى ، ومفيش حاجة من دى حصلت " .
وتساءلت سريا قائلة: " ليه يا ريس مش عاوز تعتمد أبناءنا شهداء ، ورافض تقابلنا ليه ، من حقنا تقعد معانا وتشوفنا ، والفتوى اللى جبناها من الأزهر ليه مش عاوز تعتمدها مع أن الشهداء اللى ماتوا قبلنا وبعدنا إنت مطلبتش منهم يجيبوا فتوى ، إشمعنى إحنا ولادنا ميتين غدر ومن أحسن الشباب " .
وتابعت قائلة: " يكفينا أن ولادنا شهداء عند ربنا وياريت تسمعنا قبل المحاكمة يا دكتور علشان هيحصل مجزرة تانية وإنت هتخليها تبدأ من جديد يوم 26 مش هتبقى مذبحة بورسعيد ، ولكن مذبحة مصر كلها ، اعتمدهم شهداء ياريس إحنا مش بنطلب إحسان ، راعى ربنا فينا ".