صاحبة قصيدة «حس بينا ياريس»:محصليش حاجة لما انتقدت مبارك وأهنت من أتباع مرسي

قالت سالي السيد هاشم الطالبة بمدرسة السيدة زينب بالمحلة، وصاحبة قصيدة "حس بينا يا ريس" التي وجهتها لرئيس الجمهورية بالإذاعة المدرسية.

في طابور الصباح وتم منعها بعد ذلك من ممارسة نشاطها بالإذاعة المدرسية: "إن مديرة المدرسة تنتمي لجماعة الإخوان المسلمين، وهي تشجع المدرسين على محاولات أخونة الطلبة."
وأضافت أنها تلقت تهديدات هي وأخريات من المديرة وبعض المدرسين عبر زميلاتهن بسبب ميولهن السياسية، قائلين لهن: "أنتم مش هتحرموا إلا لما نجيب لكم عيش وحلاوة".

وأشارت إلى أن إدارة المدرسة حرمتها من نشاط الإذاعة المدرسية، وهو ما لم يحدث عندما وجهت نقدا قبل ذلك في قصيدة للرئيس المخلوع حسني مبارك، وقالت: "ساعتها شجعني الإخوان وهنؤوني في السر واعتبروني بطلة، والآن يهددونني ويطاردونني لانتقادي رئيسهم محمد مرسي."

وأضافت، في تصريحات خاصة ل«الشروق» أن الأمر لم يتوقف على حرمانها من نشاط الإذاعة، لكنها تعرضت هي وزميلتها التي ألقت مقالا للكاتب علاء الأسواني للمطاردة من قبل عدد من المدرسين عقب انتهاء البرنامج الإذاعي؛ لمعاقبتهما، إلا أنهما تمكنتا من الهروب بساحة المدرسة حتى وصلتا إلى غرفة الأخصائيين الاجتماعيين لينقذوهما من أيديهم.

وأكدت أنهم: "قالولي بالحرف الواحد أنت قليلة الأدب ومعندكيش رباية وعايزة تخربي البلد ومينفعشي تقولي مرسي."
وفي سياق متصل، قال والد الطالبة أنا أشعر بالرعب على مصير ابنتي؛ فقد كانت تنتقد مبارك ولم أكن أشعر بمثل هذا الفزع والرعب لكن دول ناس (ما يعرفوش ربنا )وممكن يعملوا في البنت أي حاجة، ولا أدري هل هذه النهضة التي وعدنا بها الرئيس مرسي؟ وهل هذه هي الحرية التي قامت الثورة من أجلها ؟!

يذكر أن الطالبة سالي قررت إعادة تجربتها وقت أن انتقدت الرئيس السابق مبارك في طابور الصباح عندما كانت بالمرحلة الإعدادية وخرجت صباح الأربعاء لتلقي على الطالبات في طابور الصباح قصيدة عنوانها «حس بينا يا ريس» قالت فيها:
حس يا سيادة الريس بينا
حس بالنار اللي والعة فينا
حس بشهيد حلمه ضاع
حس بقهرة أهالينا
ليك رب هتقابله.. طب هتقوله ايه؟ لما يسأل جنابك علينا
(حس)
حس بشوارع ماليها دم
حس بقهرة أب وأم
حس ببيوت جُواها هم
والقلوب ماليها الغم
حس ببلد بتموت
وعز شبابها بيتيتِّم
(حس)
حس بجدع عياله جاعت
نزل يوكلهم فَكَرَامته اتباعت
اتسحل واتعرى في وسط حكومتك
وبعد ده كله حقوقه ضاعت
(حس)
ده أنا المصري ابن البلد
حلمي في وسط الميدان اتولد
حلمي في بلدي تعلى لفوق
وحلمي قدامي اتعرَّى واتجلد
(حس)
يا سيادة الريس شرفك فين؟
لما اتعرى المصري الهُمام
لما اتسحل واستغليت إنه راجل جعان
وعاوز تكممه وتكتف عزته
وتهز بلدنا.. بلد الشجعان
لا مش هسكتلك ولا أسيبك تنهش
في لحم بلدي زي زمان
(حس)
ما أصلي خلاص م الموت متعودتش بخاف
عارف الموت؟ عارف معناه؟
الموت أحلام بتموت وتضيع
الموت مش بس موت الحياة
الموت صديق عمر يروح
وصاحبه يتوه مجراه
الموت مش بس روح بتطلع
الموت ابن يموت وأمه ما تقدر تنساه
الموت أب انكسر ظهره
ابنه كان ظهره وقواه
الموت يعني مستقبل بيموت ويضيع
وتموت أحلامك وياه
(حس)
حق اللَّي اتعرى يا ريس فين؟
ولا هو اللِّي عراه أصلا مين؟
اللي عراه ظلمك وكدبك
اللي عراه حكمك المهين
اللي عراه ديابة ملهاش إحساس
اللي عراه كلاب مسعورين
اللي عراه سكوت.. اللي عراه جبروت
اللي عراه سلطة بتكسر عين
(حس)
ورسالتي أخيرة لنظام جبان
نظام فاسد ملوش عنوان
لو هموت
لو دمي منك يلاقي الجحود
وتهددني بسجن ظلام
ولا لوجوده أي وجود
... مش هتْسَكَّت فيا الصوت..
... مش هتْسَكَّت فيا الصوت ..
... مش هتْسَكَّت فيا الصوت