بالفيديو .. قصيدة 'حس بينا ياريس' لطالبة السيدة زينب

قالت سالي السيد هاشم الطالبة بمدرسة السيدة زينب بالمحلة، وصاحبة قصيدة "حس بينا يا ريس" التي وجهتها لرئيس الجمهورية بالإذاعة المدرسية.
في طابور الصباح وتم منعها بعد ذلك من ممارسة نشاطها بالإذاعة المدرسية: "إن مديرة المدرسة تنتمي لجماعة الإخوان المسلمين، وهي تشجع المدرسين علي محاولات أخونة الطلبة."
وأضافت أنها تلقت تهديدات هي وأخريات من المديرة وبعض المدرسين عبر زميلاتهن بسبب ميولهن السياسية، قائلين لهن: "أنتم مش هتحرموا إلا لما نجيب لكم عيش وحلاوة".
وأشارت إلي أن إدارة المدرسة حرمتها من نشاط الإذاعة المدرسية، وهو ما لم يحدث عندما وجهت نقدا قبل ذلك في قصيدة للرئيس المخلوع حسني مبارك، وقالت: "ساعتها شجعني الإخوان وهنؤوني في السر واعتبروني بطلة، والآن يهددونني ويطاردونني لانتقادي رئيسهم محمد مرسي."
حس يا سيادة الريس بينا
حس بالنار اللي والعة فينا
حس بشهيد حلمه ضاع
حس بقهرة أهالينا
ليك رب هتقابله.. طب هتقوله ايه؟ لما يسأل جنابك علينا
'حس'
حس بشوارع ماليها دم
حس بقهرة أب وأم
حس ببيوت جُواها هم
والقلوب ماليها الغم
حس ببلد بتموت
وعز شبابها بيتيتِّم
'حس'
حس بجدع عياله جاعت
نزل يوكلهم فَكَرَامته اتباعت
اتسحل واتعري في وسط حكومتك
وبعد ده كله حقوقه ضاعت
'حس'
ده أنا المصري ابن البلد
حلمي في وسط الميدان اتولد
حلمي في بلدي تعلي لفوق
وحلمي قدامي اتعرَّي واتجلد
'حس'
يا سيادة الريس شرفك فين؟
لما اتعري المصري الهُمام
لما اتسحل واستغليت إنه راجل جعان
وعاوز تكممه وتكتف عزته
وتهز بلدنا.. بلد الشجعان
لا مش هسكتلك ولا أسيبك تنهش
في لحم بلدي زي زمان
'حس'
ما أصلي خلاص م الموت متعودتش بخاف
عارف الموت؟ عارف معناه؟
الموت أحلام بتموت وتضيع
الموت مش بس موت الحياة
الموت صديق عمر يروح
وصاحبه يتوه مجراه
الموت مش بس روح بتطلع
الموت ابن يموت وأمه ما تقدر تنساه
الموت أب انكسر ظهره
ابنه كان ظهره وقواه
الموت يعني مستقبل بيموت ويضيع
وتموت أحلامك وياه
'حس'
حق اللَّي اتعري يا ريس فين؟
ولا هو اللِّي عراه أصلا مين؟
اللي عراه ظلمك وكدبك
اللي عراه حكمك المهين
اللي عراه ديابة ملهاش إحساس
اللي عراه كلاب مسعورين
اللي عراه سكوت.. اللي عراه جبروت
اللي عراه سلطة بتكسر عين
'حس'
ورسالتي أخيرة لنظام جبان
نظام فاسد ملوش عنوان
لو هموت
لو دمي منك يلاقي الجحود
وتهددني بسجن ظلام
ولا لوجوده أي وجود
... مش هتْسَكَّت فيا الصوت..
... مش هتْسَكَّت فيا الصوت ..
... مش هتْسَكَّت فيا الصوت