بهجت عدلي: مراتي بتصرف على البيت واتوعدت أشتغل في مسلسلات رمضان

تحدث الفنان بهجت عدلي، عن دور نقابة المهن التمثيلية في تشغيل الفنانيين، كما كشف أنه كان من المقرر أن يشارك في مسلسلي العتاولة وصلة رحم، الذي تم عرضهما في السباق الرمضاني الجاري.
وقال بهجت عدلي: الفن مالوش أمان بمعنى أن الفن يخليك تعوز وتحتاج، أصل ده بمزاجك ومحدش غصب عليك أنك تدخل الفن، مع احترامي لكل الشخصيات اللي بتكتب أنهم مش لاقيين شغل أنا مبحبش ده، والنقابة مبتشغلش حد، أشرف زكي بيعمل حاجات تانية يشكر عليها.
وتابع: إحنا كجمعية عمومية مش عايزين غير أن النقابة تطبق القانون والشركات تشغل 10 %، ولكن في شلالية موجودة ومجموعات كتير، ولو النقابة تقول مفيش أكتر من 10 % كله هيشتغل، والقانون مبيتطبقش، ودكتور أشرف زكي بيعمل كاستينج وبيروج للممثلين تاني، في ناس قاعدة في بيوتها مش لاقية تاكل وهما أعضاء نقابة.
وأضاف خلال تصريحات تليفزيونية: أنا ملجأتش ل أشرف زكي في الوقت اللي مكنتش بشتغل فيه لأني مبحبش ده، وأنا واثق أن دكتور أشرف شايف أن في ناس كتير محتاجة أكتر مني، ولكن كنت بكلم المنتجين الكبار.
وأردف: رفضت أدوار كتير على الرغم من الحاجة المادية لأن الأدوار مكنتش مناسبة ليا، وفي منهم دور في مسلسل معروف وكنت في أشد الاحتياج.
مضيفا: أنا اتوعدت أني هشتغل في العتاولة، والمخرج تامر نادي وعدني أشتغل في مسلسل صلة رحم، ومشتغلتش فيهم، ونفسي أعمل دور قاضي فاسد.
https://youtu.be/9vuCpSH_haw?si=tqOJxJwu1v8Lk-NP
كما أكد الفنان بهجت عدلي، أنه لا يمتلك أي مصدر للدخل سوى الفن، وأن زوجته تنفق على المنزل وأبنائهم في فترة مكوثه في المنزل، موضحًا أنه لم يندم على ترك الصيدلة والاتجاه للفن.
وقال بهجت عدلي: مرة قعدت 4 سنين مشتغلتش، واتصلت بالمنتج صادق الصباح، وقولتله أنا بقالي 4 سنين مشتغلتش وبعد ساعة ونص لقيت المنتج الفني علي حسن، اتصل بيا وقال أن صادق الصباح قال يشغلوني في دور في مسلسل هيفاء وهبي كان بيتصور في لبنان، وقبل ما أتصل بيه اتصلت بمنتجين كتير ومحدش عبرني.
وتابع: أوقات كتير بيكون مفيش فلوس في البيت، ولما مبشتغلش المدام بتصرف على البيت، وبنساعد بعض والحياة كده هنعمل إيه وهشتغل إيه؟، والجيل دلوقتي غير زمان، جيل دلوقتي ربنا يزيدهم عندهم مطاعم وكافيهات اللي تغنيهم عن الفن، لكن احنا اللي معملناش ده ومحوشناش فلوس، ويمكن علشان وقتها فلوسنا كانت قليلة.
وأضاف: مندمتش أني سيبت الصيدلة لأني بحب مهنة الفن، وأنا ممكن أعيا لو قعدت فترة مبمثلش، وأنا رايح التصوير ببقى رايح مبسوط كأن عندي ميعاد مع حد بحبه، وأوعي تصدق اللي بيقول إحنا بنتعب في الشغل وبنلبس لبس تقيل في الصيف، ده كلام فاضي، أنتي رايحة تبدعي ومحدش بيغصب عليا أمثل ده أنا اللي بلح أني أشتغل، وبتضايق منهم لما بيقولوا في اللقاءات بنتعب وبننزل في المطر، ما أنتوا نازلين بمزاجكم.
ونقدم لكم من خلال موقع (فيتو)، تغطية ورصدًا مستمرًّا على مدار ال 24 ساعة ل أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري ل أخبار الفن والعديد من الأنشطة الثقافية والأدبية.