كنباوي وكنباوية.. حلقة رقم (110).. الاعتصام هيتفض.. ماهيتفضش !

تجلس كنباوية مسترخية في (الليفنج روم ) تشاهد بعض البرامج التليفزيونية في شاشة ال (ال.سي. دي ) الجديدة التي اتي بها كنباوي للمنزل بمناسبة عيد الفطر كعادة المصريين كل عام في تباركهم في هذا العيد بشراء شيئا جديدا بمنازلهم ترتدي بيجامة قطنية جديدة أيضا وامامها اطباق من الكحك والبسكويت والبيتي فور واطباق أخرى مملؤة بالترمس والفول السوداني والملبس والشيكولاتة وزجاجه من المياه الغازية
يدخل كنباوي عليها مرتديا جلبابا واسعا فضفاضا جديدا يداعبها
كنباوي: احلي عيد في الدنيا على عيونك الحلوه ياحلوه
كنباوية: اية ياعبد الحليم انت شايفني مريم فخر الدين في فيلم حكاية حب ولا صباح في فيلم شارع الحب ؟
كنباوي: مريم فخر الدين مين وصباح مين.. انتي عندي احلي من الاتنين حعمل ايه انا بمريم ولا بصباح انا ماليش غيرك انتي ياقمر يابدر البدور
كنباوية: سيدي ياسيدي على الروقان ربنا يروقك كمان وكمان
كنباوي: طول ما انا شايفك رايقة وبخير والاولاد بخير انا حفضل رايق
كنباوية: طيب يلا تعالي دوق عمايل ايديا
كنباوي: هو انا حتوه عن عمايل ايديكي ما انا عارف انك عمرك مابتعملي حاجة وحشة
كنباوية: ياراجل بطل بكش ومجاملات وتعالي دوق بس دوق على مهلك دوق علشان الدنيا تروق
كنباوي: الله على مزاجك العنب ياكنباوية واديني حدوق اهه، الله على الطعامة والجمال تسلم عمايل ايديكي ياكنباوية
كنباوية: بجد عجبك ياكنباوي كعكي ؟ وبسكوتي ؟
كنباوي: مفيش احلي من كده تسلميلي ياغالية، قوليلي بقي آخر اخبار الدنيا ايه وإخوانا البعده اخبارهم ايه ؟
كنباوية: يبقي الحال على ماهو علية لحين اشعار آخر أو لأجل غير مسمي
كنباوي: طيب وده ينفع اكتر من اربعين يوم اعتصام الناس في رابعة قرفت والناس كمان في بين السرايات وكوبري ثروت مابقتش طايقة نفسها مابقتش عارفة تروح بيوتها وبتلف الكورة الارضية علشان تروح لأن الطرق مقفولة وبعدين كلها شهر ونص والدراسة حتبتدي الطلبة حتروح الجامعه ازاي والطريق مقفول
كنباوية: حتتحل ياكنباوي حتتحل
كنباوي: بأمارة اية ؟ بأمارة التفويض اللي اديناه للسيسي علشان يأنتخ ويسكت ويسيب المعتصمين زي ماهمه معتصمين فين القوة ؟ الاعتصامات دي لازم تتفض بالقوة الذوق ما عادش نافع مع الإخوان خلاص دول عيارهم فلت ومبقاش حد قادرهم ولا بقوا يعملوا حساب لحد خالص
كنباوية: ماينفعش ياكنباوي السيسي يفض الاعتصامات بالقوة
كنباوي: ليه بقي أن شاء الله ؟
كنباوية: انا افهمك ياكنباوي ليه ماينفعش الاعتصامات تتفض بالقوة.. بص ياسيدي لو قلنا أن الاعتصام بتاع رابعه فيه على اضعف الايمان 50 ألف مواطن معتصم والداخلية دبت فيهم نقول حيموت 10 آلاف معتصم وبما أن ال 10 آلاف معتصم دول مش من القاهرة وكلهم من محافظات مختلفة اذن كل محافظه حيكون فيها تقريبا 250 متوفي يعني 250 جنازة ونعش كل جنازة من دول حتتحول لمظاهرة ضد الداخلية والجيش.. يعني 250 مظاهرة في كل محافظه من محافظات مصر يعني احنا كده حنفك اعتصام ب250 مظاهره في كل محافظه.. يعنى عشرة آلاف مظاهرة تقريبا يربكو حال اجدع بلد يبقي ماعملناش حاجه وزودنا الطينة بلة ده أول مهم تاني مهم بقي أن فض الاعتصامات بالقوة بيخلف انواع من الإرهاب منها الإرهاب العقائدي المغلوط بأن الجيش والشرطه ضد الإسلام ودول عندهم استعداد انهم يفجروا نفسهم في أي حد طلبا للشهادة، تاني إرهاب هو إرهاب المأجورين بالمال اللي عندهم استعداد يتحالفوا مع الشيطان مقابل أي مبلغ مالي، تالت إرهاب الإرهاب الوافد والمدسوس للتخريب وتنفيذ مخططات دوليه من شأنها زعزعه الاستقلرار في البلد، ورابع إرهاب هو إرهاب الصدفه أن واحد لقي اخوه أو جارة أو صاحبة بيموت ويقتل امامه بيتحول بقدرة قادر إلى إرهابي في نفس اللحظه وده ماتعرفش رد فعله حيكون ايه كل ده ياكنباوي اللي حيخلفه فض الاعتصامات بالقوة ترضي بكده ؟
كنباوي: لا طبعا ما ارضاش ده خراب مستعجل
كنباوية: اديك قلتها بنفسك عرفت بقي السيسي صابر عليهم ليه ؟
كنباوي: ايوه عرفت وفهمت الله ينور عليكي ياكنباويه ياخبيرة الإستراتيجيات
كنباوية: السيسي راجل عاقل وواعي وحكيم وراجل مخابرات حربية يعني مدرك لكل ده كويس علشان كده صابر لتقليل الخسائر بس لما يفيض بيه حيولع فيهم وخاصة قبل الدراسة علشان ماتضعش سنه على طلبة مالهاش أي ذنب في اللي بيحصل ده
كنباوي: يعني لسة حنستني شهر ونص علشان يفض الاعتصامات ؟
كنباوية: لا اقل من كده بكتير ايام والاعتصامات تتفض وابقي قول كنباوية قالت
كنباوي: يسمع منك ربنا ويارب تحليلك يكون صح
كنباوية: بأذن الله صح انا نظرتي التحليليه عمرها ما بتخيب ابدا وبكره نشوف ونتفرج عليهم وهما بيجروا زي القطط والفيران في الشوارع
كنباوي: يارب ده يتحقق بسرعه
كنباوية: اطمن حيتحقق وكل عيد وانت سعيد
كنباوي: وانتي سعيدة ياكنباوية !