كنباوي وكنباوية.. حلقة رقم (70).. مرسي بعد النوم على البرش لابس حرير في حرير!

كنباوية: شفت المعدل مرسي كان لابس إيه؟
كنباوي: كان لابس إيه يعني طرحة؟
كنباوية: طرحة إيه يا راجل كان لابس تيشيرت كاجول مطلعه بره البنطلون.
كنباوي: هي وصلت للتيشيرتات كمان؟
كنباوية: مش قلتلك ده بكره يطلع منه ديك يقول كيك كان في جره وطلع لبره .
كنباوي: أكيد كان حران وبعدين ما يلبس اللي هو عايزه احنا كمان حنتدخل في لبسه؟ لبسه ده بتاعه إن شا الله يلبس حتي بردعة هو حر، هو مش إنسان؟ بني آدم؟ زيه زينا؟ هو أنا ولا انتي نقبل حد يفرض علينا لبسنا؟ أو أكلنا؟ أو شربنا؟ دي حرية شخصية ياكنباوية، حرية شخصية.
كنباوية: لا ياكنباوي لما الواحد يكون شخصية عامة ولها وزنها زي وزير أو سفير لازم يلبس لبس محترم يليق بيه وبمكانته علشان منظره قدام الناس فما بالك لما يكون رئيس الجمهورية اللي احنا كمان مغصوبين عليه يعني لازم يراعي حتة اللبس دي كويس أوي ما ينفعش يلبس لبس شبابي أو عيالي أو لبس بلياتشو أو بهلوانات فاهم ياكنباوي؟
كنباوي: أيوه فاهم بس الراجل ماغلطش أنه لبس تيشيرت كلنا بنلبس تيشيرتات ياكنباوية ماجاتش ع الراجل انقديه في كل حاجة إلا لبسه وأكله.
كنباوية: مافهمتنيش ياكنباوي ولا فهمت قصدي إيه أقول تاني.
كنباوي: قولي من تاني يجوز أنا فهمي على قدي .
كنباوية: حاضر ياكنباوي حقول من تاني القضية مش في لبس مرسي للتيشيرت القضية أنه بقى قابل للتغيير ماهي الحكاية بتبتدي باللبس الأول وبعد كده بتخش على حاجات تانية.
كنباوي: قصدك إيه فهميني وحياة والديكي؟
كنباوية: هو ده مرسي بتاع ميدان التحرير وفتحه لجاكتة البدلة يوم ما كسب الانتخابات من أحمد شفيق؟
كنباوي: لأ طبعا مش هو ده مرسي الأول كان مذهول مش مصدق نفسه تايه متوتر مش عارف يقول إيه أو يتكلم إزاي كان عاوز يرضي كل الناس لكن دلوقتي مرسي بقي عاوز يرضي الجماعة والمرشد والشاطر والعريان والبلتاجي وباقي الكتيبة بتاعة ألاضيشه يعني بقى مغرور واهم مستبد عنيد بيضيع نفسه بنفسه.
كنباوية: أهو انت ابتديت تفهمني صح.
كنباوي: قصدك إن التغيير بيتبعه تغيير؟
كنباوية: طبعا كل وقت وله مرسيه.
كنباوي: عندك حق يبقى التيشيرنت علامة شؤم على مرسي الراجل تحرر وتغير وتبدل .
كنباوية: لو اتحرر من كل حاجة مش حيقدر يتحرر من انتمائه لجماعة الإخوان ولا لولائه للسيد المرشد بديع الزمان.
كنباوي: ما مصر كلها عارفة كده وعلشان كده هي ماعندهاش أي أمل فيه أو في إصلاحه.
كنباوية: عليك نور يبقى الحل إيه؟
كنباوي: الحل إيه قولي انتي ياكنباوية؟
كنباوية: الحل أنه يغور، يغور.
كنباوي: يوم 30 قرب خلاص ويارب رمضان يهل وهو مش معانا .
كنباوية: دي تبقى مصيبة لو جه رمضان وده لسه رئيسنا حيبقي هو والعطش والجوع والصيام والحر ده يبقي كتير أوي وحاجة لا تطاق.
كنباوي: رمضان ده فرحتنا فرحة المسلمين ومصر بالذات في رمضان بتبقى من أحلى بلاد الدنيا همه حيعكننوا علينا بوجودهم وعمايلهم السودة.
كنباوية: ومين قالك إنهم معتبرنا مسلمين؟
كنباوي: للدرجة دي ياكنباوية؟
كنباوية: واكتر ياكنباوي دول بيقولوا علينا ضالين مارقين لا نمت للإسلام بصلة علشان رافضين رئيس إخواني وكأن الإخواني ده نازل من السما وإحنا طالعين زرع شيطاني من تحت الأرض.
كنباوي: دول يبقوا أكيد مجانين !
كنباوية: ما هم فعلا مجانين سلطه أنت أول مرة تعرف كده؟
كنباوي: ما كنتش باحسبهم مخبولين كده وبيكفروا الناس.
كنباوية: لأ احسبهم من هنا ورايح دول ألعن من كده المهم ابقي اعمل حسابك اننا عاوزين نشتري حاجات رمضان في نص الشهر خلاص أول شعبان هل .
كنباوي: حاضر وكل سنة وانتي طيبة ويعود علينا الأيام بخير من غير مرسي والإخوان.
كنباوية: آمين يارب العالمين.