كنباوي وكنباوية.. حلقة رقم (99).. يامتاجر بالدين ياللى لا لك ملة ولا دين

كنباوية: انا بفكر البس نقاب واروح اقعد في رابعة شوية قيمة ساعتين تلاته
كنباوي: ايه ياكنباويه ؟ ايه يامرة ؟ انتي اتجننتي ؟ دول بيقولوا انهم مدورين هناك جهاد النكاح انتي ليكي شوق في حاجة ؟
كنباوية: عيب عليك ياراجل مخك يروح للموضوع ده اتلم وخلي عندك دم وبعدين هو انت حارمني من حاجه ما انت مظبطني كويس
كنباوي: امال ايه الحكاية ؟ عايزه تروحي هناك ليه ؟
كنباوية: عايزة اروح هناك اشوف ايه حكاية الملايكة اللي بيزوروا رابعة دول صدق ولا كدب ؟
كنباوي: صدق ايه يابنت الكلب ياهبله هي دي ناس ينزل لها ملايكه من عند ربنا ؟ دول منافقين والمنافق في الدرك الأسفل من النار وكدابين جبريل ايه اللي نزل عندهم لو ربنا معاهم كده ومباركهم مابعتلهمش ليه ساعة خناقتهم مع الحرس الجمهوري طيرا أبابيل ترمي الجيش بحجارة من سجيل وكانوا خلصوا على الجيش وارتاحوا منه دول كدابين وربنا برئ منهم ليوم الدين ويوم الموقف العظيم
كنباوية: عندك حق بس دول بيقولوا كمان أن العدرا ستنا مريم ظهرت عندهم
كنباوي: ده تأثير انهم بيناموا ومؤخراتهم عريانة بياخدوا فيها برد وبتستهوي علشان كده بتجيلهم تهيؤات وأضغاث أحلام لأنهم بيناموا بالجلاليب والجلاليب بتتشلح بالليل وهمه نايمين لكن تقوليلي عدرا ومريم وكلام من ده اقولك......لا مؤاخذة ياكنباوية
كنباوية: طيب وايه حكاية اللي بيشوفوا منهم رؤيا الرسول في المنام وأن الرسول بيبارك مرسي ؟
كنباوي: رسول مين اللي يبارك مرسي ؟ ومرسي مين ده؟ علشان يباركه الرسول ؟ الرسول بيبارك العدل والحق ومرسي لا كان في يوم عادل ولا منصف ولا حقاني
كنباوية: عندك حق خلاص انا اقتنعت بكلامك لا رايحة ولا جاية ده انا كنت حاخد نقاب ام ولاء واروح بيه
كنباوي: لا نقاب ام ولاء ولا لباس ام عبير بلاش قلة قيمة دول ناس بتهرتل ناقص يقولوا إن عيسي بن مريم نزل عندهم دول معفنين اللي نزل عندهم الجرب والتيفود ده كبيرهم
كنباوية: خلاص بقي ياكنباوي فضها سيرة وتعالي نتكلم في حاجة تانية
كنباوي: حنتكلم في ايه يعني في المحشي اللي مستنيكي من أول رمضان تعمليه وانتي مطنشة
كنباوية: ومن نب النبي نبي لاعملهولك النهاردة هو انا ليا بركه غيرك وغير نفسك ومزاجك ووحمتك
كنباوي: ياوليه اتلمي
كنباوية: طيب ماتلمني انت ياخويا
كنباوي: اه هي الحكايه كده ؟ انتي ليكي شوق في حاجه، ماشي بعد السحور ولا اقولك قبل السحور علشان الواحد بيتسحر ويتقل النهاردة ياكنباوية من عيني
كنباوية: اعملك محشي ورق عنب وكرمب ولا محشي فلفل وبتنجان وكوسة ؟
كنباوي: لا اعملي محشي ورق عنب وكرنب بلاش البتنجان والفلفل انا زهقت منهم انتي عملتيهم كتير قبل كده
كنباوية: حاضر ياكنباوي انت تأمر وحعملك كمان صنية كنافة بالزبيب انا عارفة انك بتحبها وكمان ياسبعي قمر الدين مطبوخ طلباتك أوامر واجبة التنفيذ
كنباوي: مشكلة انتي ياكنباوية لما تحبي تدلعيني ماحدش بيقف قصادك
كنباوية: طبعا ده انت روح الروح انت الحبيب الغالي
كنباوي: وانتي المزة بتاعتي والحتة الطرية اللي كلها حنية انتي طبق المهلبية
كنباوية: احبك وانت بتدلعني.
كنباوي: حبيني على قد ما تقدري حبيني بس المهم تأكليني وتشبعيني
كنباوية: من عنيا ونني عنيا ياغالي
كنباوي: يلا بقي قومي انتي اعملي الأكل وانا حقوم انام شوية
كنباوية: من عنيا ونوم الصحة والعافية على بدنك ياكنباوي !