كنباوي وكنباوية.. حلقة رقم (87).. "المارينز داخلين مصر على أيدي مرسي"

كنباوية: شايف إيه ياكنباوي ؟
كنباوي: البدر ليلة تمامه.
كنباوية: يا راجل بطل هزار، بقى ده وقت هزار ؟
كنباوي: ومين قال إني بهزر إنتي في عيني قمر وبدر منور.
كنباوية: أنا مش بتكلم على اللي إنت شايفه قدامك أنا بتكلم على اللي إنت شايفه جاي بعد مليونية رابعة العدوية بتاعة أنصار مرسي وتهديدات "البلتاجي".
كنباوي: "البلتاجي" ده سيبك منه بوء عالفاضي هو فاكر إنهم ورثوا البلد لكن ده بعدهم.
كنباوية: السيسي ساكت!
كنباوي: خليه ساكت لسه دوره ماجاش الدور دلوقتي دور المحكمة الدستورية.
كنباوية: إنت قصدك إنها قبلت ورق تمرد ؟
كنباوي: دي البداية وبعد كده حتولعها بقرارها.
كنباوية: وهمه الإخوان حيسكتوا لو أسقطت حكم مرسي؟
كنباوي: يبقى أعلى ما في خيلهم يركبوه.
كنباوية: حيولعوا البلد!
كنباوي: ماهي كده كده والعة هي موتة ولا أكتر خلي البلد تنضف من الإخوان.
كنباوية: دي مش القاهرة بس اللي والعة دي المحافظات كمان مشعللة بورسعيد والإسكندرية والشرقية والمحلة والغربية والمنوفية وهلم جر.
كنباوي: ولسه التقيل جاي ورا ده حتى أمريكا بعتت أسطول في البحر الأحمر يرابض علشان رعاياه ما يحصلهمش أي حاجة في المظاهرات وبعتت كمان 200 جندي من "المارينز" علشان يحموا السفارة ورجالتهم تحسبا من اندلاع الأوضاع يوم "30" ومرسي ولا هو هنا!
كنباوية: مرسي مدي ودنه للشاطر والمرشد.. مرسي ده منه لله على اللي بيعمله في المصريين.
كنباوي: كفايه إنه بينام في بيته وفي حمى الحرس الجمهوري مرعوب قلقان متوتر فيه إيه يستاهل الخوف ده ؟
كنباوية: فيه حكم مصر اللي ماكانش يحلم بيه ولا هو ولا ألاضيشه.
كنباوي: بكرة يندموا ندم السنين لما الثورة تنجح وينطردوا من الحكم.
كنباوية: البلتاجي بيقول إنهم مش نظام مبارك علشان إحنا نقدر عليهم.
كنباوي: ده واهم ومغرور بكرة مش بعيد علينا ولا عليهم بكرة قريب أوي كلها ساعات ويشوفوا زعل وغضب المصريين شكله إيه.
كنباوية: فكرك مصر كلها نازلة ؟
كنباوي: إوعي تشكي في كده مصر وولاد مصر رجالة وبيقفوا جنبها وقت الشدائد وده وقت مصر والمصريين.
كنباوية: وإنت شايف إن الجيش حيفضل ساكت كده كتير ؟
كنباوي: الجيش صابر وهدوءه اللي بيسبق العاصفة بس الشعب يقول كلمته الأول يوم "30" وهو أكيد حيكون ورا الشعب مش حيسيبه لوحده قدام الإخوان.
كنباوية: يسمع منك ربنا ياكنباوي أحسن الكيل طفح!
كنباوي: همه ابتدى يتقبض عليهم بالسلاح والثوار عزل ودي البداية همه ناويين على الشر وقتل المعارضين والثوار.
كنباوية: دول بيقولوا علينا صليبيين !
كنباوي: لو إحنا زي مابيقولوا صليبيين همه تجار دين وتجارة الدين ألعن من القوادة ياكنباوية.
كنباوية: الشعب المصري ابتدى يقاطع كل منتجات الإخوان وعملوا بمحلاتهم منشور ووزعوه في محطات مترو الأنفاق واللي نازل واللي طالع من المترو بيصوره بالموبايل بتاعه دي حرب حتى في الرزق!
كنباوي: الرزق ده بتاع ربنا ياكنباوية ربنا بيرزق اليهودي والكافر.. الحرب لازم تكون بالحجة والدليل والبرهان وإحنا معانا الحجة والدليل على فشلهم والبرهان على استحوازهم على مقاليد الحكم في البلد يعني مش حيقدروا يخدعونا ولا يقولوا إننا بنتجنى عليهم أو ظالمينهم.
كنباوية: دول بيفهموا أنصارهم إننا كفره وكارهين للإسلام والشريعة وده الغلط بعينه وتجارة بالدين.
كنباوي: بكرة ربنا ينتقم منهم.
كنباوية: يارب ياكنباوي أشوف فيهم يوم.
كنباوي: حتشوفي مش يوم واحد أيام ياكنباوية حيدوقوا المر اللي دوقوهولنا سنة بحالها.
كنباوية: أسوأ سنة عدت على مصر وأبو إنجازات طالع في خطابه يكدب ويتكلم عن إنجازات وهمية ده عنده تهيؤات.. ربنا يشفيه ويداويه من تهيؤاته دي.
كنباوي: ده حيفضل طول عمره مريض لأن المرشد عامله غسيل مخ.
كنباوية: الشاطر لابد في الدرة مستني يشوف آخرتها إيه.
كنباوي: عاقل ودماغ بس ده مايمنعش إنه بيخطط لمرسي من بعيد لبعيد وبيدبر له الحيل والألاعيب.
كنباوية: ربك كبير، يمكرون ويمكر الله، يلا بينا ناكل لنا لقمة علشان الكلام عن مرسي والإخوان بيسد النفس عن الأكل.
كنباوي: يلا بينا وبالمرة نفتح التليفزيون نتفرج على حلقة باسم يوسف ده واد زي العسل.
كنباوية: يلا بينا وربك يعدلها من عنده.
كنباوي: آمين يارب آمين..