كنباوي وكنباوية.. حلقة رقم (83)..السني قتل الشيعي !!

شوفت عملت في مصر إيه يامرسي؟ السني قتل الشيعي!
كنباوية: ربنا يرحم اللي ماتوا ويتولى العايشين برحمته .
كنباوي: انا زعلان زيك واكتر على الأربعة اللي راحوا غدر في أبو النمرس وكل ده من الخطاب الديني الإخواني وتصريحات شيوخ الضلال.
كنباوية: مايلوموش بقى الإسرائيليين لما يقتلوا العرب ولا يلوموا المسيحيين في الخارج لما يقتلوا مسلم ما أهه المسلم بيقتل أخوه المسلم وعلشان الحكاية تتطرمخ عليها قالوا القاتل 5000 نمرسي والله لو مليون لازم يتقدموا للمحاكمة ويتحكم عليهم دول قتلة سفاحين هي البني آدمين دي فراخ علشان تتعامل كده وتتسحل كده، الله يلعن مرسي على اليوم اللي شوفناه فيه دي جرايره علينا.
كنباوي: شوفتي السيسي قال إيه؟
كنباوية: راجل ابن راجل من ضهر راجل ده اللي خايف على البلد مش مرسي اللي عايز يولع فيها علشان الكرسي، تصدق ياكنباوي اللي كان أحق بالسحل ده النهارده والضرب ده مرسي وجماعته مش الشيعة، الشيعة أرحم من مرسي والإخوان.
كنباوي: ده اليهود ياكنباوية أرحم من مرسي والإخوان اللي بيقولوا علينا كفره دول همه اللي أفاقين ومجرمين وتجار دين .
كنباوية: المحكمة النهارده أثبتت إن الإخوان وحماس وكتائب القسام هما اللي اقتحموا السجون وهربوا مرسي وأعوانه ومرسي مطلوب للتحقيق معاه.
كنباوي: أكيد الإخوان بيقولوا على القاضي اللي حكم بكده فلول.
كنباوية: ده أساسي ياكنباوي مصر كلها باستثناء الإخوان فلول في نظر الإخوان.
كنباوي: الدنيا قايمة والتحرير ابتدا النهارده يشعللها وتصريح حازم أبو إسماعيل ضد السيسي حيولع الدنيا على دماغ الإخوان ومش بعيد بكرة الصبح يتم القبض على أبو إسماعيل.
كنباوية: ده بيخرف، الراجل بيقول على السيسي عربيد وانه يجب ردعه إيه حيغتالوه ولا حيصفوه ولا حيجبروه أنه يقدم استقالته دي مهزلة.
كنباوي: يستاهل أبو إسماعيل بس يارب الجيش ما يتساهلش معاه تاني ماهو قبل كده غلط في الجيش والجيش سكتله وساء هو فيها وقال ما انا كل مرة بغلط فيهم وماحدش منهم بيقدر يعمل لي أي حاجة.
كنباوية: الجيش باله طويل وبيسيب الواحد من دول لحد ما يجيب آخره وأبو إسماعيل بعد تصريح النهارده كده جاب آخره ولبس نفسه في حيطة وبكرة نقعد على الحيطة ونسمع الزيطة.
كنباوي: السيسي قال إن المعارضة والإخوان قدامهم أسبوع قبل يوم 30 يحلوا فيه مشاكلهم مع بعض ويتفقوا وإلا أنا هحمي البلد من الانهيار والكلام ده مزعل الإخوان وتلاقيهم دلوقتي بيخططوا للسيسي وبيكيدوا له وبيعملوا الحيل بتاعتهم زي العادة دا شغل تعابين.
كنباوية: السيسي رفاعي وحيعرف يصرف تعابينهم وبعدين الشعب مستني الجيش يتصرف مع الإخوان وأمله في ربنا وفيهم كبير أوي.
كنباوي: الجيش مش حيخزل الشعب أبدا ياكنباوية .
كنباوية: يارب ياكنباوي الجيش يحقق لنا أمانينا يارب.
كنباوي: حيحققها ويفرحنا ورمضان حيبقي شهر الخير علينا إن شاء الله وحنعيد من غيرهم بإذن الله قولي يارب .
كنباوية: يارب ياكنباوي يارب.
كنباوي: انا اتعودت كل يوم اسمع منك نشرة الأخبار دي قبل الأكل ولو فيه يوم ماسمعتهاش ما بعرفش آكل خالص هي اللي بتفتح نفسي على الأكل.
كنباوية: هي بس؟
كنباوي: لا طبعا هي ووجهك الحسن وبسمتك والطلة في وشك اللي بتزود عمري وبتشرح صدري وتفتح نفسي للدنيا كلها وما فيها.
كنباوية: أيوه أيوه أبلفني علشان اتغر وما حدش يعرف يكلمني.
كنباوي: اتغري من حقك هي دي الحقيقة أنتي عندي بالدنيا وما فيها.
كنباوية: وأنت عندي نور عينيا وأكتر شوية.
كنباوي: يلا نقوم نتغده وملعون أبو الإخوان واليوم اللي شوفناهم فيه بكرة يغوروا في ستين داهية.
كنباوية: آمين يارب آمين.