كنباوي وكنباوية.. حلقة رقم (82).. ورقة التوت الأخيرة

كنباوية: اليوم قرب خلاص ياكنباوي وكله حينكشف ويبان ورقة التوت الأخيرة حتسقط عن الإخوان ومحمد مرسي!
كنباوي: يعني إيه ؟ مش فاهم؟

كنباوية: بص ياكنباوي الحكاية وما فيها إن الخلاف بينا وبين الإخوان مش خلاف ديني أبدا إحنا مسلمين وهمه مسلمين بس همه مش واخدين بالهم بالحكاية دي يجوز علشان خصوا نفسهم بجملة الإخوان المسلمين وعملوا لنفسهم خلية سرية وجماعة ومكتب إرشاد إحنا برضه مسلمين وإذا كان على الإرشاد فاحنا إرشادنا من عند ربنا والقرآن كتاب الله العزيز الكريم وسنة نبيه محمد همه عايزين يعرفوا إن الخلاف بينا ديني وإننا ضد الشريعة والحكاية غير كده خالص الحكاية إن خلافنا سياسي في المقام الأول والأخير بس علشان همه أضعف من إنهم يقارعونا الحجة بالحجة والدليل بالدليل والبرهان بالبرهان في السياسة وأصغر من إنهم يعملوا كده قلبوا الدفة وصوروا للناس إن الخلاف ديني سماوي وهو أصلا خلاف أرضي مش خلاف عقائدي علشان يلموا أنصار ومؤازرين لهم ضدنا وفهموا شبابهم إن حربنا لإعلاء شريعة الله ورفع راية الدين الإسلامي وكإننا إحنا بنكسها رغم إنهم من يوم مامسكوا الحكم ماحاولوش يطبقوا الشريعة في أي مجال وانشغلوا بتوطيد علاقاتهم في مصر وتمكين جماعتهم من مفاصل الدولة والاستحواز على الوزارات والمحليات همه أضعف من إنهم يقفوا قصادنا من غير شماعة الدين وإننا علمانيين وصليبيين وفلول وهمه الفلول همه المنافقين الكدابين الفاشلين دي آخر ورقة توت بيلعبوا بيها وحتسقط إن شاء الله وحيتفضحوا بإذن الله الواحد الأحد القهار ماعدش عندهم غيرها الورقة الأخيرة.
كنباوي: بس فيه ناس كتير مغيبة ومش فاهمة حاجة!
كنباوية: دول بقى ربنا يتولاهم برحمته الإخوان مش الإسلام، المسلم مايكفرش المسلم مايحاربهوش وهمه كفرونا وناويين يحاربونا الله يلعنهم في كل كتاب..
كنباوي: آمين ياكنباوية.. آمين.
كنباوية: مرسي محتمي في الحرس الجمهوري حيقف بيه قصاد الداخلية والجيش.
كنباوي: الحامي ربنا كفاية إنه عايش خايف ومرعوب يستحمل بقى.
كنباوية: الإخوان مقويين قلبه.
كنباوي: خلي الإخوان ينفعوه يتلفح بيهم ده المتغطي بغير الشعب عريان.
كنباوية: هو مش فاهم كده هو فاهم إن الشوية اللي وقفوا بيهم في رابعة العدوية حيحموه.
كنباوي: دول كرتون وخيش وقش ولا الكام صاعق والكام شومة همه اللي حيخوفوا المصريين إنهم ينزلوا يوم 30 مش حيحصل الشعب المصري مش شعب جبان.
كنباوية: الشعب نازل نازل يقول كلمته يقول إنه رافض لحكم مرسي.
كنباوي: مرسي وأعوانه العند راكبهم نفسي أشوف الشلة دي منورة في لومان طرة نفسي ياكنباوية.
كنباوية: حيحصل وحتشوفهم على البورش بإذن الله علشان يعرفوا إن الله حق وإنهم كانوا في نعمة ماحافظوش عليها مصر أكبر منهم ياكنباوي وربنا كبير وفوق الجميع.
كنباوي: أنا سامع إنهم بيفكروا يفرقوا شنط مكسرات وقمر الدين وتمر علشان رمضان.
كنباوية: مش حيلحقوا والشعب خلاص مابقتش تخيل عليه المحلسة والحليطة دي كان زمان.. الناس مش عايزة من وشهم حاجة عيزاهم يغوروا في داهية وبس.
كنباوي: أنا مابقتش أطيق سيرتهم ولا بقيت أطيق أسمع حد منهم أو حتى أشوف صورته.
كنباوية: تلات تربع المصريين بقوا زيك كده يطيقوا العمى ولا يطيقوا الإخوان.
كنباوي: والشيوخ المنافقين اللي بقوا معاهم معاهم عليهم عليهم!
كنباوية: دول ربنا حيحرقهم في نار جهنم اللي بيطوعوا الآيات على هواهم وحسب مصالحهم.
كنباوي: البلتاجي هان الجيش المصري في المليونية وهان رئيس المحكمة الدستورية كمان وبهدلوا كل المذيعين بتوعنا وأهانوهم !
كنباوية: المذيعين حيقدموا بلاغات فيهم للنائب العام والجيش حيعرف ياخد حقه من البلتاجي والصبر طيب وفرجه قريب بإذن الله بس إنت اصبر كلها أيام ويا خبر النهار ده بفلوس بكره حيبقى ببلاش.
كنباوي: نفسي بكره ييجي مايلاقيهمش.
كنباوية: حيحصل وحييجي بكره بإذن الله وهمه مش حيكونوا معانا على فكره همه مرعوبين من اليوم ده.
كنباوي: أنا كمان حاسس بكده وهمه بيكابروا.
كنباوية: خليهم يكابروا بكره ياخدوا فوق دماغهم.
كنباوي: إيه.. مش حناكل ؟
كنباوية: حناكل ماتخافش حقوم أولع على الأكل يسخن خش إنت غير هدومك الأول.
كنباوي: حاضر ياكنباوية.
كنباوية: يحضر لك الخير ياكنباوي.