كنباوى وكنباوية.. حلقه رقم (85).. مرسى والخطاب الأخير

كنباوي: مالك يا كوكو مش حاسس بيكي فرحانة ليه زي إمبارح ؟
كنباوية: إمبارح حاجة والنهارده حاجة كل ما الأيام تقرب من يوم 30 كل ما قلقي بيزيد وخصوصا أن بسلامته حيلقي خطاب النهارده الساعة تسعة ونص وفيه تلميح أنه حيفرض عقوبات واعتقالات على أعضاء من حركة تمرد وسياسيين وإعلاميين ده غير أن الحرس الجمهوري ابتدا يبني الحوائط الخرسانية في الشوارع المؤدية لقصر الاتحادية والجيش ساكت والله أعلم بنية الإخوان وحشدهم في الميادين قبل يوم 30 بقى كل ده ومش عايزني أقلق وعايزني أفرح
كنباوي: تفرحي إزاي وانتي شايفة ديكتاتور جديد عاوز يحكمنا بالحديد والنار ليكي حق تزعلي وتقلقي
كنباوية: ده عاوز يحكمنا بالعافية في أكتر من كده ؟
كنباوي: هى عمر العافية جابت نتيجة مع الشعب المصري ؟
كنباوية: أبدا بس المرة دي الإخوان اشتروا ذمم ونفوس بفلوسهم ده غير المغيبين منهم ومن شبابهم المرة دي المسألة مش حتعدي على خير
كنباوي: ربنا يسترها من عنده ويتولانا برحمته بقى إحنا في أيدنا إيه نعمله أكتر من كده ؟
كنباوية: لا بأيدنا كتير بأيدنا أننا كلنا ننزل يوم 30 وقبل يوم 30 كمان علشان نعرف العالم أننا رافضين أن مرسي يكون رئيسنا ده أقل شيء ممكن نعمله علشان مصر تعيش في سلام.. دا من تاني مرسي ومكتب الإرشاد أمروا الإخوان ينزلوا بالحشود في الميادين من بكره علشان يعرفوا المصريين أن اللي عايزين مرسي كتير وطلب منهم يتجمعوا في قاعة المؤتمرات من بدري قبل الخطاب وفيه أنباء اتسربت أنه حيهدد الثوار والإعلاميين وأنه عاوز يحل المحكمة الدستورية وحيهدد سياسيين كتير بالاعتقال عجبت لك يا زمن مرسي المعتقل السابق نزيل وادي النطرون ونومة البرش بيهدد الشرفاء بالاعتقال والحبس
كنباوي: ماهى خريت خلاص والقوالب نامت والانصاص والارباع قامت
كنباوية: لسه عاصم عبد الماجد بيهدد المصريين اللي بيقول عليهم علمانيين ومتطرفين وكفرة وأنجاس أنهم نازلين يوم 30 علشان يهاجموا مش علشان يدافعوا عن نفسهم وأنهم حيقطعوا أي أيد تتمد على دقن أو حجاب أو جلابية
كنباوي: ده تطاول ودي قلة أدب وإحنا ساكتين وطبعا مرسي مبسوط ومنشكح من الكلام ده علشان هو فاكر أن الكلام في صالحه بس الحقيقة أن التصريحات دي اللي هو بيسكت عليها وبيباركها ضده وبتخلي الناس تكرهه أكتر وأكتر
كنباوية: هو مش فاهم كده بس اللي غايظني إني نفسي أدخل جوه دماغ الشاطر وأعرف هم ناويين على إيه ؟
كنباوي: ومن غير ما تدخلي في دماغ الشاطر ولا غير الشاطر أنا أقولك هم ناويين على إيه
كنباوية: قول يا كنباوي إذا كنت تعرف وريحني زي أنا على طول ما بريحك
كنباوي: حاضر يا كنباويه اسمعي.. مرسي مدرك أنه لو خسر الكرسي حيكون نصيبه زي نصيب مبارك وألعن على قتله أو مساعدته أومباركته أو طرمخته على قتل الشهدا وغيره وغيره يعني داخل السجن داخل هو جماعته يبقى عيزاه يقف يتفرج ما اظنش لا هو ولا الشاطر ولا العصابة دي بمرشدها حتسيب المصريين يرجعوهم المعتقلات من تاني بعد النعيم والعز اللي شافوه من يوم ما مسكوا الحكم دي كل الحكاية مرسي يا قاتل يا مقتول هو بيدافع عن نفسه وأهله وعشيرته وحيدافع بتضحيته بأرواح المصريين علشان يفضل باقي في الحكم
كنباوية: الله يفتح عليك يا كنباوي نورت مخي بس ما ريحتنيش لأن معني كلامك أنه مش ماشي
كنباوي: لأ ماشي بس مش بالساهل حيمشي غصب عنه بعد ما يموت ناس كتير من الناحيتين يا كنباوية
كنباوية: المشكلة أن الشعب مستني الجيش يحل له الأزمة ويقضي على الإخوان
كنباوي: والجيش برضه مستني الشعب يطلب تدخله بإصرار
كنباوية: لو نقوم من النوم نلاقي الجيش قبض على الإخوان وأعضاء الجماعة ومرسي وألاضيشه ويريح البلد من الفتنة دي
كنباوي: ده حلم لو اتحقق يبقى الدنيا بقت وردي بس برضه الإخوان مش حيستسلموا بسهولة
كنباوية: مش مهم المهم يغوروا في داهية ويمشوا من بلدنا يا يرجعوا الزنازين من تاني
كنباوي: يا ريت البلد باظت على أديهم وهم لسه عمالين يتكلموا عن الإنجازات إنجازات أونطة
كنباوية: يتوكسوا ويروحوا يشوفوا العربيات واقفة إزاي على محطات البنزين علشان تمون
كنباوي: لكن هم ماعندهمش أزمة بنزين ولا فلوس ولا أي حاجة زينا
كنباوية: لأ هم عندهم أزمة ضمير هم ماعندهمش ضمير
كنباوي: ما دي معروفة من زمان قولي حاجة جديدة يا كنباوية
كنباوية: النهارده عملالك حلة محشي وفراخ محمرة
كنباوي: أحلي كلام وأحلي أكل
كنباوية: مطرح ما يسري يمري صحة وعافية على بدنك يا كنباوي
كنباوي: تسلميلي يا كنباوية وتسلمي لعيالك !