كنباوي وكنباوية.. حلقة رقم (71) .. استعداد الإخوان ليوم الغضب والبركان

كنباوي يسير في الشقة يدندن ويغني أغنية (من حق الكبير يدلع من حق الكبير) تسمعه كنباوية وهي تعد طعام الغداء في المطبخ فتضحك وتقول: طب تعال وأنا أدلعك ولا أقولك استنى لما أخلص اللي في إيدي وأدلعك على حق
كنباوي: يا كنباوية وخبريني مالهم بيكي الإخوان دي أخبارك يا كنباوية جايبالهم جنان؟
كنباوية: إيه يا راجل إيه جرالك؟ مالك؟ حتمشي اليوم بطوله تدندن وتغني في الشقة؟
كنباوي: مش أحسن من الهم والنكد؟
كنباوية: يا راجل البنت نايمة علشان تريح جسمها علشان عريسها معزوم عندنا النهاردة على الغدا والعشا
كنباوي: الناس تعزم الناس على الغدا أو تعزمها على العشا لكن تعزمها على الغدا والعشا دي جديدة عليا ما يبات هنا بالمرة
كنباوية: إذا كان على عريس بنتك ما حبب عليا إنه يبات هنا وخاصة في حضن البت ما انت عارف إنه لما بييجي بيلزق وما بيبقاش عاوز يمشي أو يتلحلح من مكانه عايز يفضل لازق جنبها ليل ونهار فلازم نعمل حسابه على العشا كمان ماهو مش معقول ينزل متأخر ويروح لأمه من غير ما نعشيه
كنباوي: طيب ما يتنيل على عينه ويتلحلح شوية ويدخل على البت ويخلصنا من قرفه وقرفها
كنباوية: ماهو مقطع نفسه في الشغل قوي علشان يتلم هو والبت ومش مخلي على نفسه جهد حيعمل إيه أكتر من كده الدنيا غالية يا كنباوي ماعادتش زي الأول الله يكون في عونه هو واللي زيه
كنباوي: على قولك دي المعايش بقت نار إنما إيه آخر أخبار اللي مايتسموش الإخوان وإيه أخبار الريس مرسي؟
كنباويه: خايفين وميتين في جلدهم خايفين سيناريو 25 يناير يتكرر من تاني وبيعملوا احتياطاتهم من دلوقتي
كنباوي: يعني بيعملوا إيه؟
كنباوية: بيقولوا إنهم مجهزين آلاف من الجهاديين وحماس علشان يتصدوا للمتظاهرين
كنباوي: وصل الحال بيهم للدرجة دي يا كنباوية؟
كنباوية: وأكتر من كده كمان دول حيقفلوا كوبري 6 أكتوبر قبلها بيومين بحجة الإصلاحات والترميمات علشان يشلوا حركة الثوار والمتظاهرين
كنباوي: دي البلد حتبقى زحمة جدا وخنقة
كنباوية: مش مهم عندهم الزحمة أو الخنقة أو حتى البلد تولع المهم أمنهم همه وسلامتهم همه
كنباوي: مرسي بيحاول إنه يقابل أوباما قبل يوم 30 علشان يبقى في صفه ضد الثوار والمتظاهرين بس مش عارف ياخد منه ميعاد وأوباما مكبر دماغه خالص تقريبا قرفان من مرسي
كنباوي: وإيه تاني قولي نوريني؟
كنباوية: أنا سامعة إنهم حيقفلوا بعض شوارع مصر الجديدة قبلها بكام يوم بالأسلاك الشائكة والحوائط الأسمنتية
كنباوي: اشمعنى وإيه هي الشوارع دي اللي عاوزين يقفلوها؟
كنباوية: كل الشوارع المؤدية لقصر الاتحادية وزودوا الحرس الجمهوري وقطعوا الإجازات، وحينزلوا عربيات مصفحة ودبابات نحو القصر وحيستعملوا القنابل المسيلة للدموع قنابل الغاز والهراوات وغيروا البوابات وبقت أشد متانة وصلابة وبقت أعلى وبيقولوا إنه من الصعب إن الثوار يجتازوها وبيظبطوا الداخلية علشان تقف معاهم ويحموهم وبالتأكيد مرسي حيسافر قبلها بأي حجة أو حيخبوه جوه البلد في مكان الدبان الأزرق ما يعرفش طريقه وكذلك المرشد والشاطر والعريان والبلتاجي والكتاتني والشلة المهببة دي
كنباوي: ليه هي حرب؟
كنباوية: حتبقة حرب يا كنباوي وبكره تقول كنباوية قالت وخصوصا إن حركة تمرد وصلت إنها تجمع أصوات 13 مليون مصري رافضين حكم مرسي والإخوان دي حتبقى مجزرة يا كنباوي
كنباوي: لا الجيش مش حيرضى بكده أبدا الجيش واعي وعاقل وحكيم وحيحسن التصرف وحيلمها بدري بدري
كنباوية: ده بيتهيألك يا كنباوي المرة دي جلت منك وظنك خاب
كنباوي: عامة ربنا يجيب العواقب سليمة يا كنباوية
كنباوية: يا رب يا خويا، يا رب، يسمع منك ربنا
كنباوي: حيسمع ويستجيب علشان المصريين أحباب الله
كنباوية: الأطفال يا كنباوي همه اللي أحباب الله مش المصريين
كنباوي: والمصريين برضه علشان طيبين ولاد حلال
كنباوية: مش كلهم يا كنباوي، مش كلهم
كنباوي: تقصدي الإخوان؟
كنباوية: هو فيه غيرهم اللي أنا أقصده؟
كنباوي: الإخوان دول يهود أنا عارف كده بس محسوبين على المصريين نعمل إيه بقى؟ آدي الله وآدي حكمته
كنباوية: نعمل باقي الأكل علشان عريس بنتك قرب ييجي
كنباوي: على خيرة الله نعمل باقي الأكل مش عيزاني أخرطلك ملوخية أو أقوّرلك بتنجان أو أنقيلك شوية رز مساعدة مني؟
كنباوية: لأ عيزاك تخرج من المطبخ وتقعد بره كده زي الشاطر تتفرج على التليفزيون من غير دوشة لحد ما أخلص الأكل، الأمر لله يا كنباوي استعنا ع الشقا بالله
كنباوي: ونعم بالله يا كنباوية ونعم بالله