"كنباوي": إيه اللي عندك النهارده يا "كنباوية"؟ هل من خير؟ هل من شر؟ "كنباوية": الخير على قدومك والشر آتي على قدوم مرسي والإخوان. "كنباوي": أفصحي عما في جعبتك يا "كنباوية". "كنباوية": إيه يا راجل، إنت مالك بتتكلم بالفصحي ليه النهارده؟ "كنباوي": أصلي كنت قاعد مع محمد طه مدرس اللغة العربية على القهوة وهراني فصحى لما بهت على لساني. "كنباوية": طيب ماتقعدش معاه كتير، هي الحكايه مش ناقصة فصحى. "كنباوي": حاضر يا زوجتي العزيزة، إيه آخر الأخبار؟ "كنباوية": البلد مقلوبة من ساعة ما وافقت المحكمة الدستورية العليا على منح الجيش وأفراده والشرطة وأفرادها حق التصويت في الانتخابات زي أي بلد متحضر . "كنباوي": وده مزعل الناس في إيه؟ "كنباوية": ده مزعل الإخوان ومخليهم هايجين . "كنباوي": ليه؟ "كنباوية": خايفين من تصويت الجيش والشرطة ليكون موجه وضدهم وهُمه مرعوبين بعد ما أسهمهم تراجعت في الشارع المصري، وحيحاربوا القرار زي عادتهم . "كنباوي": إيه الرعب ده؟! همه مش بيقولوا إنهم واثقين من نفسهم؟ خايفين ليه بقى!! "كنباوية": خايفين لدرجة إن فيه ناس بتطالب بعمل استفتاء شعبي لحل المحكمة الدستورية العليا. "كنباوي": ده جنان رسمي، هو كل مؤسسة أو محكمة حتاخد قرار مش على هوى الإخوان حيطالبوا بحلها؟ "كنباوية": أهو ده اللي بيحصل دلوقتي يا "كنباوي". "كنباوي": دي قلة أدب وعدم استعنا بقرارات المحكمة والدستور والقانون . "كنباوية": ماحدش عارف الحكاية حتوصل لفين، ربنا يستر . "كنباوي": عندك أخبار تاني؟ "كنباوية": عندي خبر بيقول إن فيه حد رفع قضية وبيطالب وزير الداخلية بالقبض على أعضاء حركة "تمرد" لأنها بتحاول هدم الشرعية، وخبر بيقول إن المحكمة حكمت على وزير الداخلية بالحبس سنتين وغرامة في امتناعه عن تنفيذ حكم، وإن الوزير حيمارس عمله طبيعي لحد ميعاد الاستئناف . "كنباوي": إيه الأخبار اللي زي الفل دي؟!!! "كنباوية": هو أنا جايباها من عندي؟ مادي أخبار البلد اللي احنا عايشين فيها . "كنباوي": مفيش أخبار حلوه؟ "كنباوية": يعني انت عايزني أألّفلك أخبار ولا اخترعلك أخبار حلوة من عندي؟ "كنباوي": يعني في رحلة بحثك وتقصيكي للحقائق وراء الأخبار مالقتيش أي خبر حلو يفتح النفس شوية؟ "كنباوية": لا يا "كنباوي" مالقتش، أخبار حكم مرسي كلها زي الزفت، ومرسي رجع من إثيوبيا . "كنباوي": وهو إيه اللي كان ودّاه إثيوبيا من أصله ؟ "كنباوية": أهه سفرية زي بقية سفرياته الفارغة، يلا خليه يتفسح شوية قبل ما يرحل. "كنباوي": فكرك حيرحل؟ "كنباوية": اكيد يا "كنباوي"، مفيش حد بتدوم له على طول، حياخد يومينه ويمشي . "كنباوي": ياريت يا "كنباوية" يومينه دول مايطولوش، أحسن الواحد زهق خلاص . "كنباوية": ومين سمعك يا "كنباوي"، ده الواحد بقت روحه في مناخيره من قرف وحكم الإخوان . "كنباوي": طيب بلاش خبر حلو، مفيش أكل حلو؟ "كنباوية": إيه يا راجل، ما انا كل أكلي حلو. "كنباوي": وانا قلت غير كده، مفيش بقى أي حاجة من أكلك الحلو ده، أحسن أنا ميت من الجوع . "كنباوية": فيه عندي كوسة ولحمة ورز وشوربة لسان عصفور . "كنباوي": دي حاجة زي العسل، يلا قومي حضري لنا الأكل، وتسلم إيديكي مقدمًا . "كنباوية": يعني ما سألتنيش عن الحلو ؟ "كنباوي": هو فيه حلو غيرك يا حلو انت يا اللي زي القمر ليلة كماله . "كنباوية": بكّش عليا بكّش، وكُل بعقلي حلاوة، علشان ما اسألكش كنت واقف بترغي مع جارتنا العازبة ليه امبارح على السلم . "كنباوي": دي غلبانة كانت بتسألني على سباك كويس علشان السباكة عندها بايظة والبلاعة مسدودة وعايزة تتسلك . "كنباوية": وماسلكتلهاش انت البلاعه ليه؟ وأهه تبقى جميلة. "كنباوي": يا ولية دي قاعدة لوحدها ماينفعش ادخل شقتها، الناس تقول علينا إيه؟ "كنباوية": أصلي عرفاك كلك مروءة وشهامة. "كنباوي": الجيران لبعضيها يا "كنباوية". "كنباوية": الجيران لبعضيها بس مش مع العازبة، وخصوصًا لما تكون صغيرة وحلوة. "كنباوي": أنا عنيا مابتشوفش واحدة حلوة غيرك، ده انتي الأمل والمنى والحب والأحلام، وأنا من رضاكي ببتسم للغيب وللأيام . "كنباوية": إيه يا كنباوي إنت حتغني عليّا؟ "كنباوي": هو أنا اقدر، أنا بغنيلك يا حبيبتي، يلا بقى بطلي غيرة ستات وقومي حضري الأكل. "كنباوية": حاضر يا "كنباوي"، أما اشوف آخرتها معاك إيه؟ "كنباوي": آخرتها زي الفل إن شاء الله.
