كنباوية تدخل الحجرة على كنباوى وهو نائم بعد تناول وجبة الغداء لتوقظه من نومه وتداعبه كنباوية: إيه يا راجل كل ده نوم؟! يلا قوم بقالك تلات ساعات نايم بطل وخم كنباوى: إيه يا كنباوية سبينى أنام شويه خلينى أريح جسمى أنا مبلحقش أنام إنتى عايزة منى إيه؟ كنباوية: قوم يا راجل ارغى معايا زهقانة من القعدة لوحدى وحطق قوم نتسامر ونتساير مع بعض كنباوى: إيه يا كنباوية إنتى ليكى شوق فى حاجة ومكسوفة تقولى؟ كنباوية: يا راجل شوق فى إيه ده لسه الليل ما جاش وبعدين ما إنت عارف إن أنا مبتكسفش منك لو ليا شوق فى حاجه حقول على طول مش حلف وأدور كنباوى: أمال إيه حكايتك وإيه غرضك من صحيانى؟ كنباوية: عاوزه أرغى معاك كنباوى: فى إيه؟ كنباوية: فى أى حاجة إنت عايزها كنباوى: وآدى قومة وآدى قعدة ارغى كنباوية: أيوه كده يا راجل أنا كنت حفرقع من القعدة لوحدى كنباوى: وعلى إيه تفرقعى أفرقع أنا إيه آخر أخبارك؟ كنباوية: منسق عام تيار الاستقلال أحمد الفضالى بيقول إن الإخوان والنظام الحالى خدعوا مصر والقوى السياسية والوطنية وبيطالب المصريين إنهم ينزلوا يوم الجمعة الجاية جمعة إنقاذ مصر وبيدعو للخروج والتظاهر السلمى لرفض حكم الإخوان المسلمين وقال إنهم بيستدعوا الجيش لمنع العبث بمصير البلاد وحماية الدولة المدنية. كنباوى: يعنى يوم الجمعة الجاية حيبقى فيه لبش؟ كنباوية: وحركة كفاية كمان نازلة ومش بعيد حركه تمرد تنزل هى كمان كنباوى: دى كده تبقى زاطت قوليلى أخبار توقيعات حملة تمرد إيه؟ كنباوية: عدت الاتنين مليون توقيع والإخوان خايفين منها موت كنباوى: أحسن خليهم يحسوا على دمهم عندك أخبار تانية؟ كنباوية: عندى كنباوى: طيب قولى يلا ما إنتى اللى جبتيه لنفسك مش إنتى اللى صحتينى من النوم؟ كنباوية: وماله اسمع يا سيدى مرسى يوم الأربع اللى جاى رايح الإسكندرية كنباوى: إيه رايح يصيف؟ كنباوية: يصيف إيه يا راجل ده رايح علشان عيد الحصاد كنباوى: عيد الحصاد! أنا أول مرة أسمع عن العيد ده عموما همه بيعملوا إيه فى عيد الحصاد ده؟ كعك وبسكوت؟ زى العيد الصغير ولا بيعملوا فتة ولحمه زى العيد الكبير؟ كنباوية: يا راجل كعك وبسكوت إيه وفتة ولحمة إيه؟ إنت بس همك على بطنك؟ كنباوى: طبعا عيد يعنى أكل كنباوية: ده عيد حصاد القمح مرسى رايح يحضر احتفال المزارعين بحصاد القمح وحيزور قرى بنجر السكر فى برج العرب بالإسكندرية وحيقول كلمة هناك فى حقل من حقول القمح مع المزارعين وحيشوف أماكن تشوين القمح ويطمن عليها وحيطمن إن المزارعين خدوا فلوس توريد القمح لبنك الائتمان الزراعى كنباوى: يا حلاوة ده بقى عيد الحصاد؟ كنباوية: أيوه يا سيدى ده عيد الحصاد كنباوى: مفيش بقى حاجة حلوة؟ كنباوية: فيه عملالك زلابيا بالسكر البودرة وسد الحنك كمان كنباوى: طيب يلا قومى هاتيهم كنباوية: من عنيا دقايق وأكون عندك بكل الحاجات الحلوة اللى فى البيت كنباوى: تسلميلى يا غالية كنباوية: وتسلملى يا غالى