كنباوية تغنى: "القمح الليلة، الليلة، ليلة عيده، يا رب تبارك يا رب، يا رب تبارك وتزيده" يسمعها كنباوى فيضحك كعادته ويتوجه إليها لمعرفة سر انبساطها وغنائها كنباوى: إيه أخبار القمح؟ كنباوية: يوه انت سامعنى؟ كنباوى: أيوه سامعك من بدرى وانتى بتلعلعى بأغنية القمح كنباوية: أنا باتريق على وزير الزراعة اللى قعد يقول إنتاجنا السنة دى من القمح 10 ملايين طن والدنيا بخير الدنيا بخير ومصر بخير وإحنا حنشترى صوامع لتخزين القمح وفى الآخر مرسى شاله فى الترقيع الوزارى الجديد بقى يا راجل لو فعلا الوزير ده عمل كده وزود إنتاجية القمح بالشكل ده كان مرسى شاله؟ كنباوى: ما حدش عارف المستخبى إيه؟ كنباوية: المستخبى أنا أقولك عليه، المستخبى إن الوزير فتح صدره قوى إزاى يحسب إنتاجية القمح والقمح لسه ما اتحصدش؟ ده كله كان استنتاجات وخيال جامح وواسع من سيادة الوزير مرسى قال أحاسبه عليه قبل الحصاد علشان لو المحصول ما بقاش زى ما هو قال الشعب ما يفضحنيش وهو بيستنالى غلطة ويبقى اسمى شلت الوزير لعدم إدراكه للحقايق كنباوى: والله عنده حق بس كان لازمتها إيه الفشخرة دى من الأول؟ كنباوية: فنجرة بؤ يا خويا علشان يمرع الإخوان كنباوى: طيب وكسفتهم دلوقتى يعملوا فيها إيه؟ كنباوية: همه دول وش كسوف؟ دول عنيهم بجحة وتندب فيها رصاصة كنباوى: على قولك دول باردين وعاملين ودن من طين والتانية من عجين ولا أكنهم هنا خالص كنباوية: ربنا يريحنا منهم ومن بلاويهم قول آمين كنباوى: آمين يا رب العالمين كنباوية: أنا النهاردة عملالك محشى ورق عنب وبامية ولحمة محمرة كنباوى: الله عليكى يا كنباوية أنا فعلا من كام يوم ونفسى رايحة لمحشى ورق العنب كنباوية: وأنا قلبى دليلى ودايما حاسس بيك وادينى عملتهولك أهه علشان ما تقولش إنى حرماك من حاجة كنباوى: وأنا أقدر أقول كده عمرى؟ ده انتى مدلعانى دايما كنباوية: طيب وانت مش ناوى تدلعنى كنباوى: أدلعك؟ انتى تؤمرى، عايزة تدلعى إمته؟ كنباوية: النهاردة يا كنباوى كنباوى: غالى والطلب رخيص بعون الله، أدلعك النهاردة بالليل إيه قولك؟ كنباوية: يبقى أعملك كمان صينية بسبوسة علشان انت بتحبها كنباوى: تسلميلى وتسلملى عمايلك وجمايلك كنباوية: عيب يا راجل ما تقولش كده جمايل إيه دى؟ هو فيه جمايل بين الست وجوزها؟ كنباوى: أصلك أسرانى بكرمك وحنيتك يا كنباوية كنباوية: ده أقل حاجة ممكن أعملهالك انت تستاهل كل خير يا كنباوى كنباوى: وانتى تستاهلى إنى أشيلك فى عينيا من جوه كنباوية: ما انت شايلنى فعلا يا كنباوى فى عينيك كنباوى: أنا حدخل أظبط نفسى عقبال ما تخلصى الأكل كنباوية: وأنا على طول أهه حخلص الأكل عقبال ما تطلع من الحمام كنباوى: أنا مش حتأخر حاخد دش وأحلق دقنى واطلعلك على طول كنباوية: حمام الهنا ونعيما مقدما كنباوى: الله ينعم عليكى يا حياتى