كنباوى وكنباوية .. حلقة رقم (59) .. مخطط إسرائيل لتوطين أهل غزة فى سينا!!

كنباوي يداعب كنباوية كعادته كلما وجدها صامتة : إيه أخبارك ؟ مفيش جديد ؟
كنباوية : هي الأخبار بتخلص يا كنباوي ! الأخبار كتير بس ما تسرش عدو ولا حبيب
كنباوي : إيه اللي عندك ؟ قوللي
كنباوية : فيه مشروع كده يا خوفي لا الإخوان يوافقوا عليه
كنباوي : مشروع إيه ده اللي انتي خايفة أن الإخوان يوافقوا عليه ؟
كنباوية : مشروع منطقة تجارة حرة بين غزة وسينا
كنباوى : طب دا خير يا كنباوية !
كنباوية : وحيجي منين الخير ؟.. الموضوع ده وراه إنه من أيام جمال عبد الناصر كانت إسرائيل طلبت من جمال أنه يوطن الغزاويين في سينا وجمال رفض وطلبوا من السادات نفس الطلب والسادات في البداية كان حيوافق ولما قعد مع نفسه وفكر بعقل شوية برضه رفض واللي بيحصل دلوقتي بحكاية المنطقة الحرة دي التفاف على توطين الغزاويين في سينا
كنباوي : إزاي مش فاهم ؟
كنباوية : أنا حفهمك ماهو مش معقول تبقي جوز كنباوية الغلباوية وتبقي مش فاهم
كنباوية : بص يا سيدي الموضوع باختصار بسيط أن الإسرائيليين بيفكروا بخبث
كنباوي : إزاي ؟
كنباوية : طبيعي أن المنطقة الحرة دي لما تتعمل الغزاويين حيجوا سينا علشان يتاجروا ويشتغلوا
كنباوي : ما ده هو الطبيعي يا كنباوية
كنباوية : اللي مش طبيعي بقي هو أنهم مش حيقدروا بعد انتهاء شغلهم أنهم يرجعوا كل يوم لغزة فبالتالي حيدوروا على سكن ليهم في سينا علشان يبقوا جنب أشغالهم وبعد كده حيجيبوا عيالهم ونسوانهم علشان يبقوا جنبهم وتوتة توتة خلصت كده الحدوتة استوطان بالتلاتة وده غرض الإسرائيليين يا كنباوي
كنباوي : بقي هي الحكاية كده ؟
كنباوية : أيوه يا سيدي هي الحكاية كده تفكير أبالسة ملاعين
كنباوي : ومرسي فاهم كده؟
كنباوية : مرسي من أمتي بيفهم حاجة من أصله مرسي راجل هلهلي مش بيفكر بالشكل ده
كنباوي : والشاطر ؟
كنباوية : الشاطر شاطر وأكيد فاهم الفولة ولو ليه مصلحة مع الإسرائيليين حينفذ منطقة التجارة دي
كنباوي : يعني الإخوان فاهمين ؟
كنباوية : طبعا فاهمين ومطرمخين على الموضوع لأن لهم غرض منه
كنباوي : أخص عليهم
كنباوية : شوفت بقي أن الأخبار اللي عندي لا تسر عدو ولا حبيب
كنباوي : عندك حق سيبك من الأخبار اللي زي الزفت دي وقومي عشينا
كنباوية : عيني يا كنباوي عيني تحب تتعشي خفيف ولا تقيل ؟
كنباوي : خفيف يا كنباوية يا دوبك كده جوز حمام وسلطانية شوربة حمام ورغيفين عيش بلدي وشوية بابا غنوج على طبق رز بلبن من أيديكي الحلوين دول
كنباوية : لا كده انت عداك العيب وأزح ده أكل خفيف فعلا بس ده كده مش حيشبعك خالص أعملك جنبه طبق فتة كوارع ؟
كنباوي : ماشي يا كنباوية خلي الواحد ينام خفيف
كنباوية : روح اتعشي عند أمك يا كنباوي بقي الساعة حداشر وعايز تاكل حمام وكوارع ورز بلبن أخلص أنا الأكل ده أمتى ؟ الفجر
كنباوي : خلاص يا كنباوية عشينا اللي انتي عيزاه
كنباوية : أيوه كده ولا انت عاوز تنيمني الفجر ؟
كنباوي : لأ فجر إيه ورانا أشغال الصبح اعملي أي لقمة وخلاص
كنباوية : دقايق وأحضر لك الأكل