كنباوى وكنباوية.. حلقة رقم (56).. خطاب محمد مرسى من الغيط

كنباوية تقهقه وتضحك بملء ما فيها ومن قلبها وهى تتابع خطاب مرسى أو كلمته للمزارعين من الغيط بمناسبة عيد الحصاد، يسمعها كنباوى فيدهش رغم أنه اعتاد فى الآونة الأخيرة منها على ذلك ويذهب إليها مستفسرا عن سبب تلك القهقهات
كنباوى: إدينى أكتر يا كنباوية، إدينى وكركرى وربنا يضحكك على طول يا رب
كنباوية: أنا مفيش حاجة بتضحكنى إلا مرسى
كنباوى: عمل إيه تانى هو مش بيبطل؟
كنباوية: كنت مديت شوية وانت كنت ضحكت من قلبك
كنباوى: على إيه؟
كنباوية: مرسى كان بيقول كلمة للفلاحين والمزارعين بمناسبة عيد الحصاد
كنباوى: وإيه الجديد فى كده؟
كنباوية: الجديد إنه أول رئيس مصرى يلقى كلمة من الغيط
كنباوى: غيط؟! انتى بتهرجى؟
كنباوية: الحاجات دى ما فيهاش تهريج فعلا مرسى وقف جنب القمح وفى وسط الغيط وألقى كلمة والمنظر كان عار وكان يهلك من الضحك وخصوصا لو كنت شوفت الحراسة الخاصة بتاعته وهى منتشرة حواليه
كنباوى: وقال إيه بسلامته؟
كنباوية: زى العادة هرتلة، هرتلة بس كان شكله يفطس من الضحك وهو بيقول لهم بلهجته الغريبة انتوا منى وأنا منكم وأنا بحبكم والأرض كمان بتحبكم وزى ما تدوها حتديكم والكلام ده ابن عم حديت ده اللى انت عارفه وفاهمه وحافظه حاجة كده معبرة صادقة تحسسك إنها من غير رتوش أو تزويق حاجة كده زى غسيل البرك بس بينى وبينك الكلمة دى فى الموقف ده وفى المكان ده ما كانتش تنفع معاها البدلة اللى هو كان لابسها
كنباوى: أمال كنتى عاوزة سى مرسى يلبس إيه؟
كنباوية: جلابية كانت حتبقى لايقة عليه خالص ومناسبة للموقف وكانت حتبقى أشيك وكان حيكون فيها مصداقية أكبر
كنباوى: خلاص نقوله ونبلغه إن عيد الحصاد الجاى يبقى يلبس جلابية
كنباوية: هو إحنا لسه حنصبر عليه لعيد الحصاد الجاى؟ دى تبقى داهية سوخة وسنة سودة وحوسة ما بعدها حوسة تف من بؤك يا كنباوى تف
كنباوى: حاضر، حتف، اتفوه
كنباوية: شاطر يا كنباوى أيوه كده أحبك وانت مطيع
كنباوى: إنما بجد كان منظره يضحك؟
كنباوية: يضحك إيه يا كنباوى ده كان منظره يهلك من الضحك دى مصر كلها ضحكت عليه وفشتها كانت عايمة
كنباوى: طيب هو ليه يعمل فى نفسه كده؟
كنباوية: نقصان عقل وعدم مفهومية بقى تعمل إيه؟
كنباوى: أمال فين المستشارين بتوعه؟ مش يوعوه إن اللى بيعمله ده غلط وحيضحك الناس عليه؟
كنباوية: دول باين عليهم بيودروه وسيبينه يقع فى الفخ علشان يخلصوا منه
كنباوى: هى باين عليها كده مالهاش تفسير أو تحليل تانى
كنباوية: تتغدى؟
كنباوى: ودى عايزة كلام طبعا أتغدى
كنباوية: أنا عملالك دقيه بامية ولحمة ضانى ورز، إيه رأيك؟
كنباوى: مفيش أحلى ولا أطعم من كده
كنباوية: يا رافع من معنوياتى يا مجاملنى، دقايق أسخنلك الأكل ويكون قدام عينيك
كنباوى: تسلميلى يا كنباوية
كنباوية: تسلملى انت يا كنباوى