كنباوى وكنباوية.. حلقة رقم (81).. كفار قريش وأصحاب النبى

كنباوية تجلس في المطبخ واضعة يدها على خدها، ساهمة تستمع إلى سيدة الغناء العربي كوكب الشرق أم كلثوم وهى تشدو برائعتها لسه فاكر قلبي يديلك أمان ولا كلمة حتعيد اللي كان كان زمان كان زمان لحظة دخول كنباوي عليها مبتسما كعادته مداعبا لها..
كنباوي: سيدي يا سيدي على المزاج الرايق إن شا الله دايما
كنباوية: لا رايق ولا حاجة بس اديني بحاول أنسي الهموم وافج عن نفسي شوية وانت عارف أني من زمان برتاح لصوت ثومة وبيهديني وبيفكرني بأيام زمان أيام الصفا والروقان وحفلة أم كلثوم أول خميس من كل شهر واللمة نحوها قدام الراديو أو التليفزيون كانت أيام جميلة أوي يا كنباوي احنا ليه يا كنباوي ماعدناش نسمع أم كلثوم زي زمان ؟
كنباوي: أنا عن نفسي لسه باسمعها إنما انتي اللي انشغلتي بأمور مصر والسياسة والإخوان ونسيتي كل لحظة حلوة كنا بنعيشها مع صوت أم كلثوم
كنباوية: أنا كنت بسمعها أيام مبارك لكن من يوم ما المنافقين مسكوا البلد وماعدش ليا نفس أسمع أي حاجة سدوا نفسنا عن كل حاجة
كنباوي: ومين سمعك دول خلوا حياتنا خل
كنباوية: انت عارف هم قلبوا الدفة وخلوا الحكاية حكاية دين علشان يكسبوها ويكسبونا مابيقولوش إن الحكاية حكاية فشل نظام وحكومة ورئيس بيقولوا إن الحكاية حكاية رفض المعارضة للدين الإسلامي والمشروع الإسلامي ورفض للشريعة زي ما يكون هم حاميين حمى الدين والمبعوثين الإلهيين لحراسة الدين وتطبيق الشريعة: شريعة إيه هو فيه شريعة تحافظ على لعب القمار وصالات القمار وتجمع ضرايب منها ده إسرائيل نفسها مفيهاش صالة قمار واحدة دول لا مؤاخذة يا كنباوية
كنباوية: ما أنا عارفة وفاهمة يا كنباوي دول إيه بالظبط لامرسي رسول ولا هو اللي حيعيد الخلافة الإسلامية ولا أعضاء الجماعة هم صحابة النبي محمد دول أفاقين كدابين اتمكنوا مننا الله يحرقهم بجاز
كنباوي: الجاز خسارة فيهم دول عايزين يتحرقوا بالحطب
كنباوية: بيقولوا علينا كفار ! كفرونا ولاد المرشد
كنباوي: واحد من الأزهر أفتي بعدم الخروج عن الحاكم
كنباوية: وهم أفتوا بوجوب قتل المتظاهرين والمتمردين
كنباوي: مرسي عايز يعلن حالة الطوارئ والسيسي منعه أنه يفكر في كده
كنباوية: مرسي دبور وزن على خراب عشه
كنباوي: الشاطر بيحاول يلم الدور والليلة قبل يوم 30 بس مش قادر
كنباوية: الجماعة بثت في شبابها أن قتل المتمردين والمعارضين لمرسي جهاد في سبيل الله وأنهم إن قتلوا سيصبحون شهداء عند ربهم أحياء يرزقون
كنباوي: شباب مغيب مضحوك عليه ومرسي ربنا يهديه ويجنبه النفاق
كنباوية: النهارده هم ناويين يستعرضوا قوتهم وعددهم في مليونية "لا للعنف"
كنباوي: مش بياكل معانا الكلام ده خالص إحنا أكتر منهم والحق معانا وإحنا المتضررين والمظلومين مش هم وعلشان كده إحنا حنقهرهم بإذن الله الواحد الأحد القهار
كنباوية: هم ناسيين أن المعارضين دول والثوار اللي هم عايزين يحاربوهم ويقتلوهم هم اللي وصلوهم للحكم بثورتهم اللي هم سرقوها
كنباوي: دول ناكرين الجميل دول نمارده وقتله ومجرمين
كنباوية: هانت وفرجه قريب ويوم 30 مابعدش كلها كام يوم بس نفسي أعرف هو مش مكسوف على دمه من رفض الناس ليه ؟
كنباوي: ده وشه مكشوف خدام الجماعة وابنها المطيع
كنباوية: فكرك الماكر خيرت الشاطر مش قلقان ؟
كنباوي: ده أكتر واحد قلقان من يوم 30 وبيحاول يراضي المعارضة بس مش عارف
كنباوية: ويعرف إزاي بعد حركة المحافظين اللي نيلت الدنيا على دماغ الإخوان
كنباوي: دي بقى القشة التي قصمت ظهر البعير
كنباوية: صدقت دول فعلا بعير
كنباوي: إيه أخبار الأكل ؟ ولا أم كلثوم نستك إننا لسه ما اتغدناش ؟
كنباوية: إيه يا راجل مانتش شامم ريحة الأكل في الفرن؟
كنباوي: والله ما أنا شامم حاجة باين عندي زكام
كنباوية: أكل كنباوية قاهر للزكام إيه حكايتك ؟ انت عيان ؟
كنباوي: باين كده
كنباوية: عيان بإيه ؟ كفى الله الشر ؟
كنباوي: عيان بالإخوان
كنباوية: مصر كلها عيانة بالإخوان مش انت لوحدك لما أقوم أطلع صينية البطاطس من الفرن وصينية الرقاق وأولع على الرز يسخن
كنباوي: البطاطس قرديحي ؟
كنباوية: بهبر اللحمة يا كنباوي وضاني كمان
كنباوي: الله عليكي يا كنباوية يا مشهيصانا ومدلعانا
كنباوية: عدوا الجمايل