كنباوي وكنباوية.. حلقه رقم (63).. سد النهضة هو الدليل على أن إثيوبيا إخوان!!

كنباوي يغني أغنية أم كلثوم يا ظالمني وقلبي من رضاك محروم وتغضب لما أقولك يوم يا ظالمني.. تسمعه كنباويهة فتضحك وتبادره القول: إيه يا راجل اوعى تكون بتلقح عليا ده أنا عمري ما ظلمتك يوم ولا جيت عليك
كنباوي: ما أنا عارف إنتي عمرك ما ظلمتيني بس أنا الأغنية دي بحبها وكلامها حلو ولحنها حلو ولقتها بترن في وداني غنتها
كنباوية: كنت بحسب إنك قاصدني أنا
كنباوي: إنتي أنا لما أقصدك أغنيلك إنت الحب اللي أحيا بنوره وعمره مايبعد يوم عن عيني
كنباوية: أيوه أيوه ثبتني وكل بعقلي حلاوه فين يا راجل الغويشتين اللي بعتهملك من كام شهر علشان تفك بيهم زنقتك وقلت إنك حتجيبهملي في أول فرصة
كنباوي: الصبر طيب يا كنباوية ما هي أول فرصة لسه ماجتش
كنباوية: ودي حتيجي إمته إن شاء الله؟
كنباوي: لما ربنا يبعت
كنباوية: وحيبعت إمته؟
كنباوي: لما يأذن
كنباويه: هو أنا حخلص من ردودك يلا يعوض عليا ربنا فيهم
كنباوي: ما تقوليش كده بكره تفرج وأجيب لك أحسن منهم
كنباوية: سيبك إنت المهم إن أنا وإنت والعيال بخير وده بالدنيا وما فيها بلا دهب بلا ألماظ المهم الستر والرضا
كنباوي: أموت في عقلك
كنباوية: بعد الشر عليك م الموت سمعت آخر الأخبار؟
كنباوي: وحسمع من مين غيرك قولي إيه اللي عندك؟
كنباوية: فيه إشاعة بتقول إن الإخوان متوالين مع إثيوبيا في حكاية سد النهضة لإن النهضة دي بتاعة الإخوان ومشروعهم علشان كده مش راضيين ياخدوا أي قرار ضدهم وبيقولوا إنه مش حيأثر على حصتنا من الميه
كنباوي: ما يمكن كلامهم صحيح وفعلا مش حيأثر على حصتنا من الميه
كنباوية: إذا كنت إنت تصدق كلام الإخوان أنا ما أصدقهوش دول مالهمش كلمة ودايما كلامهم في مصلحتهم
كنباوي: على قولك وعندك حق دول ما يعلم بيهم إلا ربنا ملاوعين ومحدش يصدق لهم كلمة
كنباوية: عامة اللجنة اللي بتدرس مشروع سد النهضة لسه ما خدتش قرارها في تأثيره على مصر
كنباوي: لو اللجنة دي إخوان يبقى مصر راحت في خبر كان
كنباوية: يا خبر النهارده بفلوس بكره يبقى ببلاش
كنباوي: إيه عندك تاني؟
كنباوية: تمرد عملت موقع ليها ع النت
كنباوي: إيه غير كده؟
كنباوية: الإدارية العليا قالت إن مرسي مش من حقه إصدار أي إعلانات دستورية
كنباوي: إيه غير كده؟
كنباوية: باسم يوسف نسبة متابعينه على تويتر عدت نسبة متابعي مرسي وهو فرحان بس نفسه متابعينه يتخطوا نسبة متابعي البرادعي
كنباوي: غيره
كنباوية: إيه يا كنباوي كل الأخبار دي مش عجباك؟ وعاوز أخبار تاني؟
كنباوي: أنا عاوز خبر جامد يهزني
كنباوية: عاوز خبر جامد يهزك حاضر بس كده إنت تؤمر الغسالة الفول أتوماتيك بتاعتنا باظت والراجل اللي جه علشان يصلحها عاوز 450 جنيها إيه رأيك وقولك بقى؟
كنباوي: أنا قولت خبر جامد مش خبر إسود على دماغي ليه كده يا كنباوية هو أنا زعلتك في حاجة؟ علشان تنكدي عليا بالشكل ده؟
كنباوية: لا تتنكد ولا حاجة أنا حدبر المبلغ ولا تشغل بالك وراك رجالة
كنباوي: أصيلة يا كنباوية ودايما مش مشيلاني هم حاجة كتر خيرك
كنباوية: ما يجيش من بعد خيرك يا كنباوي
كنباوي: أنا شامم ريحة حاجة حلوة
كنباوية: أكيد شامم ريحتي
كنباوي: ريحتك زي الفل دايما نضيفة ومستحمية زي العرايس
كنباوية: عرايس إيه بقى ما راحت علينا
كنباوي: فشر ما تقوليش كده راحت على مين ده إنتي لسه في عيني عروسة ليلة دخلتها
كنباوية: طيب خلاص طالما إنت شايف كده يلا ندخل الأوضة
كنباوي: إنت ما بتصدقي يا ولية؟! يلا يا ستي ندخل الأوضة هو الواحد ما يعرفش يبحبح شويه بكلمتين إلا لما يتمسكوا عليه؟!
كنباوية: عاوز ترجع في كلامك؟
كنباوي: هو أنا أقدر؟ يلا على الأوضة ويعين ربنا
كنباوية: يلا يا سبعي!!