كنباوي وكنباوية.. حلقة رقم (78).. ( اليويو ) لعبة مرسي والإخوان

كنباوية: نفسي الناس تفهم بعد ما توحد ربها إن الإخوان مش هما الإسلام ولا مرسي مرسل لحماية الدين الإسلامي ده تاجر بيتاجر بالدين وإن أغلب الإسلاميين مخدوعين فيه وعندي ألف دليل ودليل على صدق كلامي ده يا كنباوي بس الناس تفكر شويه
كنباوي: إيه دليلك يا كنباوية؟ عرفيني بس بهدوء علشان أقدر أفهمك
كنباوية: حاضر يا كنباوي حمشيها معاك واحدة واحدة
كنباوي: كتر خيرك يا كنباوية اتكلمي
كنباوية: بص يا كنباوي عارف اليويو اللعبة اللي بتتنطط اللي بيفرحوا بيها العيال الصغيرة وبيضحكوا بيها عليهم وبترضيهم وبيبقوا مبسوطين بيها ولو حد قرب منها بيصرخوا ويعملوا دوشه وبيحاولوا يحافظوا عليها بشتى الطرق؟
كنباوي: أيوه عارفها ما كلنا لعبنا بيها وإحنا صغيرين
كنباوية: أهي الحكاية والكدبة اللي الإخوان بيضحكوا بيها على الإسلاميين عامله زي اليويو بالظبط الإسلاميين موتهم ولا تجيب سيرة الدين من قريب ولا بعيد لا بطيب ولا بردي الدين مقدس حسب فهم كل واحد في البشر وكل واحد حسب فهمه ومخه وعقله وأصحاب العقول في راحة مرسي والإخوان بيحاولوا يوهموا الناس إن المعارضة كارهين للدين وللشريعة الإسلامية وإنهم كفرة فاسقين ملحدين علشان المصريين يدافعوا عن دينهم والحقيقه غير كده خالص
كنباوي: إيه هي الحقيقه يا كنباوية نوريني وحياة عيالك يا شيخة
كنباوية: الحقيقه إن الإخوان ومرسي عمر الدين ما كان همهم من يوم ما مسكوا الحكم بأمارة إن حاجات كتيرة أوي كانوا بيعارضوها قبل الحكم أصبحوا بعد الحكم موافقين عليها
كنباوي: زي إيه يا كنباوية؟ اديني مثل
كنباوية: أمثال يا كنباوي مش مثل واحد خد عندك رايح تعادي سوريا وتسيب إسرائيل اللي إنت بتقول عليهم أحفاد القردة والخنازير علشان تراضي أمريكا وتقف جنبك يوم 30 رايح تعين كتيبة لواءات جيش محافظين علشان تاخد الجيش في صفك يوم 30، رايح تفرض ضرايب على السجاير المحلية والأجنبية وقبل كده كانت عند البعض منكم حراما شرعا وعند البعض الآخر مكروهة؟
رايح تعمل ضرايب زيادة على الخمور المحلية والمستوردة وإنت عارف إنها محرمة شرعا ومنصوص على حرمانيتها في كتاب الله العزيز الحكيم؟
رايح تعمل ضرايب زيادة على صالات القمار في الفنادق وهي كذلك حرام والدين الإسلامي بيرفضها؟
رايح تزود الضرايب على القروض البنكية للمستثمرين وتقول عليها مصاريف إدارية وهي قبل كده كانت في حكمكم ربا الربا دلوقتي بقى حلال شرعا ولا انتوا حللتوها إنها مصاريف إدارية؟ طيب قبل كده ما قلتوش إنها مصاريف إدارية ليه؟
حاجات كتير يا كنباوي طرمخ عليها الإخوان ومرسي وكبروا فيها دماغهم علشان يمشوا مصالحهم ما تقوليش بقى إن الحكاية غيرة على الدين الإسلامي دي حكاية ضحك على الدقون زي ما بيحاولوا يضحكوا على حزب النور والسلفية بحكاية الجهاد ومحاربة نظام بشار الأسد يعني مرسي حيرضى يبعت عياله يحاربوا في سوريا ولا الشاطر حيرضى يبعت ابنه يجاهد في سوريا ده كلام فض مجالس ولو بعت حيبعت الشباب الإخواني المضحوك عليه واللي معمول له غسيل مخ من زمان ده مرسي ودي جماعة الإخوان المسلمين يا كنباوي
كنباوي: ياه بقى كل ده انتي عرفاه وساكتة يا كنباوية؟
كنباوية: ما أنا لما لقيت نفسي حطق من الغيظ قلت اتكلم وما بياخد الروح إلا اللي خالقها
كنباوي: عندك حق يا كنباوية دول أبالسة وشياطين
كنباوية: دول بيقولوا علينا إننا عاملين زي أبو جهل في عدائه للإسلام وإننا فسقه مأجورين وبلطجية وفلول وبيقولوا على الإعلام إنه إعلام كاذب ومضلل ومأجور ومدفوع له ومتمول صح علشان يشوه صورتهم وبيقولوا كمان إن القضاء فاسد
كنباوي: كل ده همه بيقولوه علينا يا كنباوية؟
كنباوية: وأكتر من كده كمان وبيهددونا إننا لو عايزين مرسي يمشي إنهم حيقتلونا
كنباوي: مين اللي قال كده يا كنباوية؟
كنباوية: عاصم عبد الماجد عضو مجلس شورى الجماعة الإسلامية
كنباوي: الله يكسفه عايز المسلمين يحاربوا بعض والمصريين يقتلوا بعض ده بقى عاوز يشعللها نار ويخليها حرب أهلية
كنباوية: أديك قلتها بلسانك أهه حرب أهلية
كنباوي: فيه حد تاني قال حاجة؟
كنباوية: الشيخ وجدي غنيم قال إن كل من قرر الخروج على مرسي يوم 30 هو كافر
كنباوي: طالما وصلت لتكفيرنا قومي حطيلي آكل ويعدلهم ربنا يوم 30 أنا مش رايح شغلي ونازلهم ويبقوا يورونا حيعملوا معانا إيه
كنباوية: يسلم فمك أنا حقوم أحضر لك الأكل حالا وبعد كده يحلها ربنا من عنده
كنباوي: ونعم بالله يا كنباوية ميعادنا معاهم يوم 30 واللي يعمله ربنا يكون