كنباوى وكنباوية.. حلقة رقم (61) بين تمرد وتجرد

كنباوية: خير اللهم اجعله خير..النور ماقطعش النهارده ليه ؟
كنباوي: أكيد خافوا لما الناس قالت إنها مش حتدفع فواتير الكهربا
كنباوية: ولا يمكن خافوا من كتر التريقة عليهم في وسائل الإعلام
كنباوي: ممكن برضه وخاصة أن باسم يوسف قطعهم في حلقة البرنامج واتريق عليهم جامد ومخلاهمش يساووا بصلة
كنباوية: ينصره ويحميه علي مين يعاديه
كنباوي: هاي هي
كنباوية: انت بتهرج يا كنباوي ؟
كنباوي: أبدا أنا مش بهرج مش الجملة دي بتاعة فيلم فريد شوقي وفؤاد المهندس بتاع مارينجوس الأول وهمه في الفيلم كانوا بيقولوا كده
كنباوية: ده في الفيلم يا كنباوي مش في اللي احنا فيه
كنباوي: معلش يا كنباوية القافية حكمت
كنباوية: ماشي يا كنباوي بس بطل هزار
كنباوي: حاضر يا كنباوية مش حهزر وكملي كلامك
كنباوي: خلاص حفتحهالك الليلة حروقك
كنباوية: إذا كان كده ماشي أما أكمل بس اوعي ترجع في كلامك
كنباوي: عيب يا كنباوية ده كلام رجالة وانا كلمتي عمرها ما تنزل الأرض أبدا
كنباوية : سي كنباوي
كنباوي: خلاص مش حتنزل المرة دي
كنباوية: عاصم عبد الماجد عضو مجلس شوري الجماعة الإسلامية ومؤسس حركة "تجرد" بيقول إن العناء والاعتقال والتعذيب اللي اتعرضوله وشافوه من قبل الأنظمة السابقة هو نفس اللي اتعرض له الرسول عليه الصلاة والسلام علي أيد الكفار وأن كل الأنظمة اللي بتحارب الدين أنظمة كافرة ومشركة ورجالها كفار
كنباوي: يعني قصده يقول إن جمال عبد الناصر كافر والسادات كافر ومبارك كافر ؟
كنباوية: أيوه يا سيدي وهمه المؤمنين
كنباوي: ده باين عليه مشي في الشمس كتير دماغه ساحت
كنباوية: علي قولك ده باين عليه مخه ضرب أو فوت
كنباوي: مين كمان قال إيه ؟
كنباوية: عمرو حمزاوي قال بلاش المصريين يعولوا علي حركة تمرد كتير لأن جايز وممكن أنها ما تحققش اللي بتحلم بيه هي والموقعين علي استمارة سحب الثقة من مرسي لأنها تفتقد للشرعية والقانون المصري والدستور المصري مافيهوش أن فصيل أو فئه أو أغلبية ترفض حكم رئيس منتخب تقدر تشيله حتي لو اتقدمت بيه للمحكمة الدستورية وعلي المصريين إدراك ذلك لكنها خطوة مهمة في طريق التعبير عن الرأي بشكل سلمي وراق وحضاري
كنباوي: كلام موزون برضه
كنباوية: ومرسي في لقائه مع الجالية المصرية في إثيوبيا قال
كنباوي: وهو إيه اللي وداه إثيوبيا من أصله ؟
كنباوية: رايح يحل أزمة الميه والسدود الإثيوبية ولو لقي فرصة أنه يشحت علينا مش حيضيعها
كنباوي: وهي إثيوبيا حيلتها حاجة تديها لحد أوتشحتها لحد ؟
كنباوية: نقصان عقل تقول إيه ؟
كنباوي: أقول عجبت لك يا مرسي
كنباوية: وقال إنه الرئيس الشرعي المنتخب وأن اللي بتعمله تمرد ده تهريج ولعب عيال وأنه مش بيشغل باله بالتفاهات دي
كنباوي: إيه الغرور ده ؟
كنباوية: طبعا متحامي في الإخوان والسلفية وعددهم وأنهم حيرفضوا خلعه من الحكم
كنباوي: أما نشوف يوم 30 يونيو إيه اللي حيحصل ؟
كنباوية: الإسلاميون بيقولوا إن محدش حينزل ولو نزل حد حيكون عددهم قليل أوي وحيضحكوا عليهم الناس
كنباوي: المفروض بقي كل اللي وقع علي استمارة تمرد ينزل يوم 30 علشان يكسف الإخوان
كنباوية: ده المفروض بس يا رب يحصل يا كنباوي
كنباوي: حيحصل بأذن الله الواحد الأحد
كنباوية: تاكل ؟
كنباوي: طبعا عندك أكل إيه ؟
كنباوية: فضلة خيرك ممبار وكوارع ولحمة رأس
كنباوي: أحبك وانتي مدلعاني
كنباوية: وأحبك وانت مروقني
كنباوي: بعد الأكل نتفاهم
كنباوية: يبقي ناكل الأول وبعدين نتفاهم
كنباوي: القول قولك يا كنباوية يلا حضري الأكل
كنباوية: من عنيا يا سبعي !!