كنباوي وكنباوية.. حلقة رقم (74).. "عجبت لك يا مرسي!!"

كنباوية تنجلي على اللاب توب الجديد الذي اشترته بالتقسيط المريح من عم عزيز التاجر القبطي فرح بصغر حجمه وسهولة الانتقال به من حجرة إلى أخرى عكس جهاز الكمبيوتر الذي كان يضايقها حجمه وصعوبة نقله من مكانه وكثرة أسلاكه الأمر الذي كان يجعلها في منتهى الضيق حيث كانت تجلس بالصالة لا تبرحها إذ أرادت أن تجلس عليه للدخول على النت لمعرفه آخر أخبار مصر أما الآن فهي تستطيع أن تجلس باللاب حتى في المطبخ إن أرادت ذلك أو الحمام أو غرفه النوم يشاهدها كنباوي فيقترب منها مداعبا
كنباوي: مبروك اللاب يا كوكو
كنباوية: الله يبارك فيك ده من خيرك
كنباوي: ده من رزق ربنا إنتي تستاهلي أكتر من كده إنتي نوارتنا قوليلي بقى عم عزيز عمل لك قسط صغير ولا كبير؟
كنباوية: عم عزيز ده راجل سكره عملي قسط شهري 100 جنيه بس
كنباوي: كتر خيره 100 جنيه أمرها سهل ومقدور عليه أنا حدفعهالك كل أول شهر بإذن الله
كنباوية: ماتشغلش بالك أنا حتصرف وأدفعها من مصروف البيت ماتحملش إنت أي هم
كنباوي: لأ ما أنا مش عايزك تقرطفي حاجة من المصروف علشان الأكل يفضل حلو ولذيذ زي ما هو أنا حدفعها وسيبي فلوس الأكل للأكل
كنباوية: ماتقلقش الأكل حيفضل زي ما هو حلو ولذيذ أنا مش حاجي عليكم أنا الجمعية اللي كنت دخلاها ب100 جنيه في الشهر خلصت حدفعها للقسط وكأن الجمعية لسه ماخلصتش أنا بعرف أصرف أموري
كنباوي: إنتي ست مدبرة وما يتخافش عليكي دايما سترانا حتى وأنا مقصر معاكي
كنباوية: إنت مش بتقصر بمزاجك ده بيبقى غصب عنك وأنا دايما بعذرك الست لازم تبقى ستر وغطا على جوزها
كنباوي: أصيلة يا كنباوية من يومك ربنا ما يحرمني منك ولا من فضلك علي
كنباوية: ماتقلقش كده الفضل فضل ربنا هو اللي ساترنا ومحببنا في بعض
كنباوي: ونعم بالله أنا بشكره على إنه هداني بيكي
كنباوية: وإنت بطيبتك وحنيتك وكرمك معايا هدية من عند ربنا لي ربنا ما يحرمني منك
كنباوي: أهو كلامك ده بيخفف عني متاعب الشغل والقرف اللي بشوفه فيه لما بسمعه منك وبقول إنك تستاهلي إني أتعب لك إنتي والعيال أكتر من كده وربنا يقدرني على طلباتكم ومصاريفكم دايما يا رب
كنباوية: إنت مكفينا ومراضينا دايما ومش حاوجنا أبدا لحد كتر ألف خيرك يا كنباوي
كنباوي: قوليلي بقى إيه آخر الأخبار على اللاب توب الجديد بتاعك؟
كنباوية: البِت الصحفية اللي اسمها رشا عزب اللي بتكتب في جريدة الفجر بتاعة عادل حمودة ضربت الواد المغير بتاع الإخوان وخيرت الشاطر لما راح لهم اعتصام وزارة الثقافة وهو هرب من كتر الضرب ودمه ساح لأ وبعد الضرب ده بيقول ميعادنا يوم 30 تقريبا الضرب ما حوقش فيه وعايزله علقة تانية أجمد من اللي خدها تقريبا البت رشا كانت حنينة معاه وهي بتضربه ماقرصتش عليه
كنباوي: غيره يا كنباوية؟
كنباويه: اللي يضحك بقى إن مرسي صرح وقال إنه ضد إراقه الدماء في سوريا
كنباوي: يا سلام هو مرسي بقى سوري؟
كنباوية: تقريبا يا كنباوي لأنه بعدم تخليه عن الحكم وهو عارف إن المصريين ممكن يتقاتلوا يوم 30 بسببه يقول إن شعب مصر ده مش مهم عنده ويبقى كده مش مصري يبقى كده سوري
كنباوي: سوري إيه؟! ده جنس ما يعلم بيه إلا ربنا جنس بارد جديد علينا ده كان ليهم حق الرؤساء اللي فاتوا في اللي كانوا بيعملوه في الإخوان دول مايستاهلوش إلا الحبس والتهميش
كنباوية: إنت عارف إن وصولهم للحكم كان مفيد لينا رغم اللي شوفناه منهم؟
كنباوي: مش فاهم وضحي أكتر يا كنباوية؟
كنباوية: إحنا كان دايما بيصعب علينا الإخوان من كتر اللي اتعمل فيهم زمان وحبسهم وكنا بنقول إن جمال عبد الناصر افترى عليهم ومبارك كمان لكن لما عاشرناهم وخليناهم يتحكموا فينا واستبدوا وطغوا وظلموا وتجبروا عرفنا إنهم نماردة ملاعين ولاد ستين في تسعين وكانوا يستاهلوا اللي كان بيتعمل فيهم وأكتر شويه كده التجربة عرفتنا اللي كان خافي عننا ونورتنا وبصرتنا والحياة تجارب يا كنباوي.. الحياة تجارب
كنباوي: عندك حق يا كنباوية صدق المثل اللي بيقول تعرف فلان؟ قال أعرفه عاشرته؟ قال لأ ما عاشرتوش رد وقال يبقى ما تعرفهوش
كنباوية: صح يا كنباوي المعاشرة هي اللي بتعرف الناس بالناس وكان لازم منها علشان نعرف نحكم صح على الإخوان
كنباوي: الحمد لله إنها جات على قد كده ربنا يعدي الأيام اللي جايه على خير ويجيب عواقبها سليمة
كنباويه: يا رب يا كنباوي يسمع منك ربنا بدل ما البلد تنهار والمصريين يحاربوا بعض
كنباوي: إن شاء الله مش حيحصل وحتعدي على خير أنا عندي ثقه كبيرة في الجيش إنه حيتدخل في الوقت المناسب ويحلها ويحمي البلد من مذبحة القتل والدم
كنباوية: وده هو اللي مريحني شويه يا كنباوي ويا رب يحصل كده
كنباوي: حيحصل والبلد حتفوق وتبقى زي الفل قولي آمين
كنباوية: آمين يا رب العالمين