كنباوى وكنباوية.. حلقة رقم (43).. محاولات أخونة القضاء المصرى!

"كنباوية" تقوم بنظافة الشقة كعادتها يومى الإثنين والخميس من كل أسبوع، و"كنباوى" نائم يسمع الهبد والرزع والخبط.
"كنباوى": خِفِّى لإيدك شوية يا"كنباوية" عن السجاد وارحمى المنفضة بدل ماتنكسر، وبلاش تطلعى غِلّك فى العفش لايتكسر، أنا مش عارف أنام من الدوشة دى، هى حبكت نضافة فى الساعتين اللى أنا نايمهم دول؟
"كنباوية": يعنى أعمل إيه؟ أسيب الشقة وسخة؟!! ما انت عارف إنى بنضف يوم الاتنين والخميس، والنهارده الخميس، حد قالك تنام دلوقتى، ماتنزل تقعد على القهوة شوية مع صحابك.
"كنباوى": زهقان منهم، ماليش نفس، قلت أريح جسمى شوية، حرام!!
"كنباوية": لأ يا سيدى، ماقلناش حرام ولا حاجة، بس سبنى أخلص شغل، وماترغيش معايا وتعطلنى، الشوية اللى رغيت معاك فيهم دول كان زمانى خلصت أوضة من الأوَض.
"كنباوى": حقك عليا، مش حتكلم، ححط مخدة على ودانى وأكمل نوم.
"كنباوية": لا تحط ولا تعمل، أنا خلاص ماليش نفس أكمل نضافة، كفاية كده النهاردة، مخنوقة ومتضايقة.
"كنباوى": مالك يا "كنباوية"؟ إيه اللى خنقك وتعبك؟
"كنباوية": حاجات كتير يا "كنباوى"، النائب العام أمر برجوع مبارك لسجن طرة، الإخوان متضايقين من براءته فى قتل المتظاهرين .
"كنباوى": فيه حاجة تانيه تعباكى؟
"كنباوية": أيوه يا "كنباوى"، أبو اسماعيل لسه بيهدد بأسلوب غير مباشر، بيقول: وإيه يعنى يموت 10000 آلاف علشان 100 مليون يعيشوا، قصده إن أنصاره لو حصل أى حاجة حينزلوا يقفوا معاه، وكفايه إنهم حيكسبوا أجر الشهادة، كل ده ومش عايزنى أزعل، دى بجاحة مالهاش مثيل ولا نظير.
"كنباوى": فيه حاجة تانى ولا خلاص؟
"كنباوية": لأ فيه يا "كنباوى".
كنباوي: فيه إيه تانى؟
"كنباوية": الإخوان والأحزاب الإسلامية نازلين فى مظاهرة مليونية يوم الجمعة فى جمعة تطهير القضاء.
"كنباوى": معنى كده أنهم بيشككوا فى قضاة مصر .
"كنباوية": أهه ده اللى كان ناقص، عايزين يأخونوا القضاء والقضاة علشان أحكام القضاة مش على هواهم، طبعًا والسبب براءة مبارك، والحكم اللى خده هشام قنديل بالحبس سنة على عدم تنفيذه حكم القضاء فى قضية شركه الكتان، زعلانين على قنديل، وبيقولوا إن وزير الداخلية هو كمان مانفذش حكم قضاء، اشمعنى هو، وهى الحكاية خيار وفاقوس.
"كنباوى": كل الدوشة دى علشان حبس قنديل؟
"كنباوية": مش قنديلهم الله يقندلهم أكتر وأكتر، يعنى فكرك حينفذوا الحكم؟!! أبدًا مش حيتنفذ، دول ولاد هرمة.
"كنباوى": همه ناويين ينزلوا التحرير؟
"كنباوية": بيقولوا لسه ماخدوش قرار، بس الثوار قالوا إنهم مش حينزلوا علشان ماتقمش حرب أهلية.
"كنباوى": عين العقل، بس الجيش فين من ده كله؟
"كنباوية": الجيش ماحدش عارف هو ساكت ليه لحد دلوقتى، شكله كده مش حيتحرك إلا لما تحصل مصيبة.
"كنباوى": هو فيه أكتر من دى مصايب !!
"كنباوية": سيبك من كل القرف ده وقوم خد دش عقبال ما أقوم أحط الأكل.
"كنباوى": آه وحياتك أنا جعان.
"كنباوية": حاضر يا "كنباوى"، الأكل حيجهز حالا .