بالصور.. أطرف النصائح للمستجدين في الجامعة.. إيمان: «المياه أهم من أبوك وأمك».. مصطفى: «إحساس السقوط جميل».. مي: «الكعب العالي لا».. شيماء: «مش هتلاقوا فتى الأحلام».. وأسامة: «محدش يلبس بنطلون أخته»

تداول رواد موقع التواصل الاجتماعى "فيس بوك" بعض النصائح الطريفة لطلاب الثانوية العامة الناجحين والذين يستعدون للالتحاق بالجامعة العام المقبل.
«بيطرى لو مستغنى عن عمرك»
قال شكرى: "بيطرى ياجدعان لو مستغني عن عمرك ادخل بيطرى سوهاج بس ساعتها هتندم مش على اليوم اللى دخلت فيه الكلية لأ هتندم على اليوم اللى اتولدت فيه من أساسه".
مفيش فتى أحلام
وأضاف هشام: "ركز في دراستك وبالذات لو في هندسة هتشوف أيام سودا"، وقالت شيماء: "مش هتلاقوا فتى أحلامكوا هناك أقسم بالله كلهم شبه خلف الدهشوري خلف"، فيما قالت ضحى: "ادخلوا معهد ماتدخلوش جامعة".
بلاش بنطلون أختك
وقال أسامة: "شباب محدش يلبس بنطلون أخته خليك راجل ولبسك كويس وشيك بنات بلاش أفورة بجد في كل حاجة"، وأضافت مريم: "متسمعش كلام العيال اللى بتقول متذاكرش وهتنجح لا ذاكر كويس جدا في الكلية.. اشتغل في الإجازة أو أتدرب أو خد كورسات.. متدخل الكلية عشان تعيش قصص الحب الخرافية دي علشان ده هيسرق وقتك وطاقتك.. افرح بأيام الجامعة وكون صداقات كتير مفرحة".
«الكعب العالى لا»
فيما قالت مي: "بلاش سواريه والنبي وبلاش كعب دي كلية مش فرح اختك"، وأضاف محمد: "هتشوف أيام سودا وياسلام لو هندسة أيام سودا متدخلش جامعة".
إحساس السقوط
وقال ناصر: "مش هقولهم نصيحة إحنا نسيبهم على عماهم كدا عشان يتحفل عليهم ونقعد نضحك احنا"، وأضافت هند: "خدوا منح سافروا برة.. اتعلموا حاجة جنب دراستكم أونلاين.. اتقنوا لغتين على الأقل.. اعملوا حاجة تهربوا بيها من هنا"، وقال مصطفى: "إحساس السقوط جميل أوي".
«الكوتشى وزجاجة المياه»
وأضافت هاجر: "أوعى يغرك الصور اللى من النوع الحلوين بزيادة.. شلتك فالترم الأول بنسبة 90% هتتفركش وهتطلع منها باتنين بالكتير"، وقال محمد: "لازم تستغلوا كل لحظة في فترة الكلية وتعيشوا حياتكو فيها بجد لأن اللى جاي بعد كده سواد"، وتابعت إيمان: "الشنطة الباك والكوتشي وزجاجة المية أهم من أبوك وأمك أقصى ميك أب ممكن تفضي تحطيه هو الروج هو ده الميك أب بتاعنا وخاصة في صيدلة".