من خلال تجاربي الكتير فى السفر هقدملك كبسولة لف أوروبا كلها بأقل سعر وأحسن استمتاع.. ركز بس وتابع الخطوات بالترتيب. الفيزا الناس بتعتبرها أكبر مشكلة لكن هى سهلة جدا لأن كل الدول دي بتبقى بس عايزة تضمن حاجتين: أولا: إن إنت هترجع تانى، فلو إنت طالب بتجيبلهم إثبات قيد من الكلية، ولو إنت بتشتغل تجيبلهم ورقة من الشغل أن إنت أجازة فى الفترة اللى مسافر فيها، وإن هى موافقة على كده، وفيها مرتبك.. وياسلام لو ليك واحد صاحبك فى أوروبا يجيبلك إنفيتيشن إنك واكل شارب نايم على حسابه (وده بيبقى على الورق بس).. وعلى فكرة أنا خدت فيزا إنجلترا من غير إنفيتيشن. ثانيا: أهم حاجة هى حساب البنك وناس كتير بترفض بسبب الموضوع ده لانهم فاهمين غلط فبيروح يجيب 50000 من واحد قريبه و يخليهم فى الحساب وبعدين يسحبهم وهما طبعا فاهمين كده لكن اللى هما عايزينه إن الحساب ده يكون مر عليه 6 شهور ويكون شغال، يعنى فيه حركة سحب وإيداع ومش لازم يكون فيه فلوس كتير، يعنى تقريبا لو حطيت فيه المبلغ اللى إنت هتسافر بيه وزود عليه شوية وخليهم لحد ما تاخد الفيزا وبعدين اسحبهم، يعنى مثلا لو أنا مسافر 10 أيام هحط تقريبا 10000 والرقم ده مش ثابت ده تقريبا ممكن يكون أزيد أو أقل شوية وعلى فكرة أنا مرة خدت فيزا ألمانيا وكان حسابى البنكى 900 جنيه.. (معلومة مهمة محدش يعرفها كتير، إنك ممكن تجيب الحساب البنكى بتاع والدك ويمشى عادى جدا). تذركة الطيران ممكن توفر كتير لما تستخدم الطيران ال Low cost وده طيران مفهوش أى خدمات ورخيص فحت، بس لما تحجز قبليها بتلات أربع شهور، وده موقع حلو أوى ممكن تعرف أرخص طيارات لليوم والمكان اللى إنت رايحه: http://eg.edreams.com/ وكمان فى طيران من الرخيص ده بييجى مصر بس بيطلع من شرم والغردقة وبيروح ميلان فى إيطاليا وجنيف فى سويسرا، وتقدر تسافر من الدولتين دول أى مكان إنت عاوزه وكمان سعر التذكرة رخيص جدا ممكن تلاقيها ب 400 جنيه والطيران ده موقعه أهو: www.easyjet.com/en الإقامة دا بقى عندك فى اختيارات كتير - اختيارى الأول والمفضل ببلاش، هتخش على الموقع دا www.hosteltraveljobs.com وتشوفلك شغلانه بلقمتك ونومتك - أو هتسجل على الموقع دا www.couchsurfing.com وتدور على حد يستضيفك ببلاش.. أيوه ببلاش.. فى ناس تسألنى طاب هما هيستفيدوا إيه؟ أقولك أنا: المهم عندهم يقابلوا واحد من أهل البلد علشان يعرفوا عن البلد أكتر وكمان يكونوا صداقات كتير.. وركز هتلاقى فرص فى الاتنين بس متكسلش ومتيأسش من أول مرة.. (أنا قعدت عند ناس كتير فى دول مختلفة.. واكل نايم شارب متفسح ببلاش). - لو معاك قرشين عايز تصرفهم وأنصحك حتى لو معاك فلوس تخوض التجربة بتاعت ببلاش هتضيفلك كتييير، ممكن تحجز من على الموقع دا www.Booking.com المواصلات فى أوروبا عندهم حاجة حلوة أوى، إنك لو مسافر من بلد لبلد لوحدك ممكن تاخد معاك ناس وتشتروا البنزين والموقع ده هو اللى ناس بتسجل عليه علشان تدور على ناس يركبوا معاهم العربية أو إنت تدور على عربية والموقع آمن جدا يعنى محدش هيسرقك www.blablacar.com كارفور كارفور منتشر أوى فى أوروبا، فممكن تروح كارفور وتشترى بيرو توست وبيرو جبنة وبيرو لانشن وتعيش بيهم فى اليوم.. وكمان عندهم المحلات الصينية بتبيع بردو أكل وحاجات تانية رخيصة. معلومات مهمة 1-لما تسافر متخدش لبس كتير معاك يعنى بنطلونين على كام تشيرت هيبقى حلو أوى، ومتخدش معاك حاجات ملهاش لزمة. 2-خلى بالك من الحرامية علشان فرصة السرقة فى أوروبا أكتر من مصر (أنا اتسرقت فى اليابان). 3-كون صداقات كتير هناك وخصوصا لو أجانب علشان هتستفيد منهم كتير وهيدوك معلومات كتير. 4- طول ما أنت ماشى فى أوروبا هتقابل مصريين واقفين فى محطات القطر وهيقولولك أنا ممكن أساعدك إحنا ولاد بلد.. اللى هيقولك كده فكك منه علشان غالبا هينصب عليك. 5- متخليش الفلوس أبدا توقفك، فى حلول كتير، واشتغل واتعلم تحوش. 6-قبل ما تسافر أى بلد إقرا عنها كويس علشان تعرف البهايز وتحدد الأماكن اللى هتروحها. 7- أى بلد تروحها بيبقى عندهم مكاتب للسياحة فى الشوارع تبع الحكومة، بيشرحولك المدينة وأهم المعالم، وكمان بيدوك الخريطة ببلاش.