لو شايف الموضوع تافه بالنسبالك، فعادي، صدقني في حد تاني محتاجة وهيستفيد منه، الوضع صعب، ياراجل ده لسه في ناس بتقول " هاي ياقمر" متخيل حجم المصيبة؟ العلاقات الإنسانية مش موضوع تافه أبدا إلا لو كنت زومبي ومش محتاج لكائنات حواليك. أغلب الكلام اللي موجود في المقال ده مستوحى من كتابات المؤلفة Rachel greenwald مع تأييفه بالمصري عشان احنا غلابه وصغيريين أوي ياسيد والست بتتكلم عن علاقات بتبوظ عشان الواد Bad kisser واحنا هنا تحت بنتشعبط في رضا ربنا و70% تقريبا مننا مش مؤمنين بفكرة مزيل العرق أساسا.
مبدأيا لما تيجي تتعرف علي بنت اتأكد إنها هي دي اللي عايز تتعرف عليها فعلا، الحياة أقصر من إنك تبقي بتتحدي نفسك وخلاص أو بتجرب ذكائك وجاذبيتك عالفاضي، اتأكد عشان الموضوع بيحتاج وقت ومجهود، لما تنشن على هدفك حط النقط دي في دماغك.
- احنا بنحب الغموض، بنحب نحس إننا عايشين جوه فيلم، لو عرفت عنوان بيتها أو شغلها وبعتلها كل يوم ورده مكتوب معاها جملة غامضة ورقيقة من غير اسمك لمدة أسبوع، هتبقي عايزة تعرفك بفارغ الصبر، واحتمال كبير تتشدلك. - لو في مكان عام مفيش مانع تستعمل الطريقة القديمة بتاعت الكارت لازالت من أشيك الاختيارات في الأماكن العامة، وإياك والبلوتوث، بطل ورخيص، ممكن لو في مطعم تطلبلها عصير والحقيقة مش هخبي عليك قبولها للموضوع ده معتمد علي شكلك بالنسبالها، يعني لو عاجبها هتقول واو رقيق، لو مش عاجبها، هتعملك دور دنيا سمير غانم مع الخليجي في طير أنت.البنات مش مضمونين بس لازم تغامر" الست راشيل مقالتش كده" - التعارف من الانترنت يفضل يكون في أضيق الحدود، وأسرعها، يعني لازم انتوا الاتنين لو في قبول مبدأي تتقابلوا في الواقع بأسرع وقت، فلازم توصلها إنك فاهم إن ده مش هيخلي صورتها قدامك إنها بنت سهله أو " بتيجي سكه بسهوله" وإن ده أكثر أمان ليها أصلا عشان تتأكد إنك شخص حقيقي طالما المقابلة هتكون في مكان عام، وقولها إنك معندكش مانع توريها إثبات شخصية ليك، لأنك مش زميل دراسة غالبا ولا شغل. - ابدأ الكلام بصباح الخير أو مساء الخير، بلاش هاي أبوس راسك، بلاااش، بلاااااش، ولا هاللو، احنا في مصر يا حبيبي فصباح الخير بقي يعني. - لو أنت بتشتغل حاجه في مجالها، وبروفايلك مكتوب فيه كده، فلازم تكون واضح ومحدد جدا من الأول، وتكتب رسالتك حتة واحدة، يعني ثلا " مساء الخير أنا كذا كذا، بشتغل كذا، حابب نتكلم أو نتقابل عشان كذا، لو معندكيش مانع، ولو مش حابة آسف على إزعاجك." لكن لو بعتلها الكلام جملة.. جملة بالقطارة ممكن تبني هي في دماغها سيناريو قائم على فكرة الشغل بتاعك اللي في مجالها، ولما تقولها إنك عايز تتعرف عليها تفسرها مساومة أو تلاعب، فخليك واضح من الأول وفهمها بتكلمها عشان تتعرف ولا عشان شغل. - عرفها كل المعلومات اللي ممكن تبقي عايزة تعرفها بشكل عام في دفعة واحدة، زي اسمك، سنك، ساكن فين، خريج ايه وبتشتغل ايه، لأن غالبا في حالات كتير البنت ممكن يعجبها ولد بس تحس إنها هتقلل من نفسها لو فضلت تسأل في نقطة نقطة بالقطارة، فتعالي علي نفسك وقول كل المعلومات الأساسية علي بعضها وأنت بتقدم نفسك، عشان هي تقدر تحدد بأسرع وقت أنت مناسب ليها ولا لاء، ومتعتبرش الرفض إهانة لأنها مش بترفضك أنت نفسك، لكن بتفاضل بين رغباتها هي، فلازم تحترم ده ومتكونش متطفل، ومينفعش تعتبر الموضوع عنصرية أو تفاهة، يعني لو بنت مزاجها تتعرف علي واحد بيشتغل دكتور بيطري وعنده عروق في ايده، ده يعتبر تفضيل شخصي مش عنصرية ناحية دكاترة الأطفال ولا مدرسين الألعاب. - أوعي تعمل copy&paste لنفس الرسالة وتبعتها لأكتر من بنت، بتصدف وبنطلع أصحاب في الآخر والمصحف وبتبقي مسخرة. - لو اتعملك سين ومتردش عليك من أول جمله.اخلع.مخبيش عليك احنا بندخل على بروفايل اللي بيبعت وبنلقي نظرة. - المعلومات المزيفة والأسامي المستعارة وصورة توم كروز بتخليك بالنسبالنا مش حقيقي أصلا. - اشتغل في الجمل اللي بتفتح كلام معاها بيها على فكرة كبرياء البنت واديها طول الوقت اختيارات تخليها تحس إنها هي صاحبة القرار - يعني مثلا متقولهاش عايز اخرج معاكي قولها تحبي نتعشي في مطعم كذا ولا كذا، أو قولها بدل ما ندخل سينما ايه رأيك نعمل سفاري وخيرها بين برنامجين بتفاصيلهم، أو قولها إنك حجزت في كورس رقص أو لغة جديده مثلا ليك وليها هدية وحابب إنها تشاركك، أو إن محلات كذا عاملة تخفيض الأيام دي واعرض عليها تروحوا تعملوا شوبنج وتتفرجوا سوا." - لما تتعرف متحكيش حواديت خيالية عن بطولاتك في المدرسة والكلية والشغل والكمين، صدقني بنبقي بنضحك من جوانا وبنتخيلك وأنت بيحصل فيك العكس، فبلاش. بلاااش. - يفضل أول معاد يكون في مكان فيه حاجه غيركوا، زي سينما أو مسرح عشان العرض يملأ فراغات الكلام بينكوا والخجل، وتلاقوا موضوع مشترك تتكلموا فيه بعد العرض. - متسألهاش كتير، وفي نفس الوقت اديها فرصة تتكلم عن نفسها هي بدل ما تندمج في الكلام عن نفسك، احنا بنحب نرغي، استحمل. - بلاش الفشرة بتاعت إنك كنت مصاحب ممثلة شابة معروفه، اتهرست جدا، وفي توارد أفكار من الشباب فيها الأيام دي، والموضوع مش بيعليك في دماغها أصلا، ده بيلفت نظرها لعيوبك، وبيخليها تفكر " ياتري عرفته على ايه؟" - يفضل في البداية متعلقش على شكها ولا جسمها ابدا لا بالسلب ولا بالإيجاب ولا بنصايح، الموضوع معقد وخطر، أي ملاحظة بسيطه ممكن تعتبرها انتقاد، وأي مجامله ممكن تعتبرها وقاحة، فبلاش. بلاش. - متفليهاش بعينك، أوعي. بناخد بالنا والمصحف وبنعتبرك مش ولابد، مهما كانت البنت جريئة، وبلاش تعليقات جريئة منك مهما اعتقدت إن دمك خفيف في الجزء ده، أو إن البنات بتحب النوع ده من الوقاحة، حتى اللي بتحب الطريقة دي بيبقي في مرحلة متقدمة من العلاقه مش أول مقابله ولا تاني ولا تالت. - خليك خدوم، أغلب البنات عموما جواها كائن مدلل بينجذب للراجل اللي بينقذهم من الطوابير الطويلة والمشاوير المتعبه، بس لو لقيتها استغلالية اخلع، عشان متتحطش في الفريندزون وتبقي مفحوت بتجيبلها العيش وهي بتكلم صاحبها الجديد في التليفون.. بلاش يابني. - خليك تقيل، وبين التقل والغباء شعره، تقيل ها؟ مش جلنف! - متبقاش لزج، احنا فعلا بنقفل من الراجل اللي يتصل 16 مرة ورا بعض وبيبعت رسايل من عينة " مبترديش ليه"؟ " رحتي فين" بلاش زن خصوصا لو لسه العلاقه في بدايتها. - بلاش الأسئلة اللي من نوع " هي دي عنيكي ولا لينسز؟ بنعتبرها حنتفه فارغه أو إهانة لدرجة إقناعنا في الكدب الأبيض المتعلق بالموضه والجمال، وهتشيلهالك صدقني، وهتركز في كرشك أو في شرابك، فبلاش..بلاش. - البس حلو، مش عيب إنها تحس إنك بتتذوق عشانها، ألوان هادية وسادة، بلاش ابتكارات في أول مرة أرجوك، عادة مش بتظبط لا ولاد ولا بنات. - بلاش جمل محفوظة ومستهلكة، زي (أنا أول مرة أحس كدة ناحية حد، أول مرة اهتم بحد للدرجة دي، مشكلتي إني طيب، عنيكي فيها حاجه شدتني، حاسس إني أعرفك من زمان، معرفش اتشديتلك ليه، حد قالك إنك حلوه قبل كده، أو انتي مش أحلي واحده عرفتها بس فيكي حاجه غريبه شدتني). - شدلها الكرسي وهي بتعد، افتحلها باب العربية، امشي لبرة وانتوا بتعدوا الشارع، لو لقيتها محتارة بين حاجتين في المنيو اطلب الاتنين، وخلي ذاكرتك فولاذية عشان تفتكر تعمل الحاجات دي كل مرة، لحسن تنكد عليك وتقولك اتغيرت. - بنموت في المفاجآت بس بلاش اليافطة بتاعت الجامعة وقدام العمارة والجو اللي اتهرس ده، بقت رخيصة ومكررة، انتش فكرة جديدة. - حاول تحسسها إنك متقبل شكلها تماما من غير كعب عالي أو ميكب أو تصنع بشكل عام، حتى لو هي مش بتتخلي عن التفاصيل دي أغلب الوقت، لكن الفكرة هتحسسها بنوع من الأمان والثقة. - متتوقعش أي حاجة قصاد معاملتك الرقيقة ليها، أو هديتك، لما تجيبلها عصيرمتتوقعش إنك هتاخد بيه، شويتين اهتمام زيادة، اعمل اللي مفروض يتعمل وبس ومتستناش حاجة، متبقاش عادل أدهم في حافية على جسر من دهب. - متتكلمش كتير عن شغلك - متتكلمش عن تفاصيل علاقتك اللي قبل كده، مهما زنت في السؤال وحسستك إنه عادي، قول الخطوط العريضة بس، تفاصيل لاااااء - بلاش تغامر وتنكت، احنا بنحب الدم الخفيف آه، بس بلاش في أول مرة تغامر. - اضحك عالنكت بتاعتها وهزارها السمج، أنا عارفة أغلب البنات عندها مشكله في إلقاء النكت بشكل عام، ومبتبقاش عارف هي خلصت ولا لسه بس معلش. اضحك. - لو خليتها تدفع الحساب أو تشارك فيه أول مرة هتبقوا أخوات وبس مدي الحياة لو هي متفتحة ولو عادية مش هتكلمك تاني ابدا أصلا، أي استثناء فهو معجزة، فبلاش تخاطر. - متبصش فترة طويلة في تفاصيل الفاتورة أول مقابلة، معلش ياعم ضحي بالعشرة جنية اللي ممكن يكونوا غلطوا في الحساب فيها وممكن لاء، وفي نفس الوقت متعملش سلطح بيه المستبيع ومتلمحهاش أصلا، خليك عادي، بص، شوف الرقم، طلع الفلوس وخلي المحفظة قريبه بلاش تبقي في أعماق جيب البنطلون عشان اللحظات اللي بتبقي بتطلع المحفظة بصعوبة هي يا بتتوتر يا بتفتكرك مضايق إنك هتدفع الحساب. فبلاش. بلاش - - خلي شكلك مهندم، مش لازم غالي، مش لازم تبقي غني بس لازم تكون كريم احنا بنفضل الراجل اللي بيجيبلنا هدية قيمتها 5 جنيه لو مرتبه عشرة جنيه عن الراجل اللي بيجيب هدية قيمتها عشرة جنية وهو مرتبة ألف جنيه، الموضوع نسبة وتناسب، احنا بنتشد للراجل الناجح بس مش لازم تبقي ناجح جدا في بداية حياتك، محدش بيتولد ناجح، بس لازم يكون عندك طموح، احنا مبنحبش الراجل البطة في نفسه. - أوعي عينك تيجي علي بنت تانية بالصدفة، بص في الأرض وخليك في الأمان، أي بنت بتضايق من الموضوع ده مهما بينتلك إنها متصالحه مع الحياة والبنات ومش غيرانه ولا مضايقه ومهما عملت إنها بتقلش وتهزر معاك كمان عالبنت اللي أنت بصتلها. - ريحة نفسك..أرجوك، نرجوك جميعا يعني - دايما خلي عندك خطط واقتراحات لخروجات مبتكرة، خليها تشوفك صندوق الدنيا متحرك ومليان لا مؤاخذة مرح، بص. احفظ موقع كايرو 360 زي اسمك. - أعرف نقط ضعفها، أنا عن نفسي ضعيفة قدام أي حد يكلف نفسه وقت ومجهود ويقرالي كتاب. - الكلام اللي فات ده لاخواتنا محدودي ومتوسطي الدخل، أما لو أنت غني بقي فمتستخسرش، اسألها على ال wish list بتاعتها واختار حاجة منها وابعتهالها مفاجأة، متتكلمش كتير في المرحلة دي، لأنها في الحالة دي ممكن تعتبرك نصاب وهتاش وفشار، فخليك مختصر، سؤال وإجابة وفترة صمت لغاية ما تعملها المفاجأة، وبالرفاء والبنين إن شاء الله، وعلى فكرة أنت ممكن تقول هاي براحتك يعني. الدنيا وحشة أوي وكيلو الطماطم مش سايبنا في حالنا! -
