اتكلم

لميس الحديدى : مساء الخير فى فى حياتنا ناس بتلقى عليهم مسئوليات بتغير المجتمع الناس دول ممكن يكونوا مسئولين وزرا جمعيات اهليه احنا كاعلام فكرة تغيير المجتمع دى فكرة شديدة الصعوبة لانك بتبقى مسئول عن تغيير مفاهيم اعتدنا عليها عادات موروثة تقاليد احيانا ود اعتراف منى على الهوا بنيياس وفى ايام بنقول لا خلاص نشتغل بقى زى اى حد تانى ننسى فكرة التنوير ننسى فكرة التثقيف ننسى فكرة التغيير ونشتغل نجيب نمازج لطيفة وحاجات ظريفة نسلى الناس وننسى الهدف الاساسى من وجودنا اللى هو تغيير المجتمع اصلاح المجتمع تثقيف المجتمع انا من الناس اللى ساعات بيياس وضيفتنا النهاردة حبينا نسيبها كده شوية بعد ما تولت مسئوليتها ونسالها ياستى ؟ اصطدمتى بى ايه ؟ زهقتى ؟ ادوها وزارة اسمها وزارة الاسرة والسكان السفيرة د/مشيرة خطاب الحقيقة احنا لما فكرنا ان احنا نستضفها قولنا نسيبها شوية يعنى كام شهر كده تتذوق مذاق كرسى الوزارة وتنزل تشوف الناس برضه لما تكون رئيسة مجلس طفولة وامومة غير لما بتكون وزيرة الوزير لوهيبة كده ومركز وموتوسيكلات قدام وموتوكسيلات ورا احساس كده برضه جميل ولو ايضا سلطات ولو ايضا ادوات لكن الحقيقة ان الوزيرة د/مشيرة خطاب لديها واحدة يعنى من اصعب الوزارات يمكن كلنا نفتكر مثلا وزير الماليه دا اصعب دورعنده موارد قليلة وهيقسمها على الناس ازاى ؟ هى مسئولة عن تغيير المجتمع عن تغيير مفاهيم المجتمع عن ان انت تغير موروثات قديمة جدا استمرت لسنين طويلة جدا يا ترى هتنجح د/مشيرة خطاب؟ يا ترى هتزهق ؟ انتى ممكن تقول خلاص لا هقدم استقالتى وبلاش دا مجتمع صعب جدا دا التيار الدينى فى متشدد جدا دا مجتمع محافظ جدا هى وزارة اتفصلت لد/مشيرة خطاب السيدة القوية ولا هما ادوها الاصعب المهمة الاصعب وادوها ايه ؟ لواحدة ست السفيرة د/مشيرة خطاب هى ضيفتنا النهاردة وهنكلم فى القضية الاهم تغيير المجتمع هو تغيير مجتمعنا ده ممكن ؟ ولا نياس بقى وخلاص نفوضها سيرة بعد الفاصل
فاصل
لميس الحديدى: اهلا بكم من جديد الوزيرة د/مشيرة خطاب مساء الخير
مشيرة خطاب : مساء النور
لميس الحديدى: هتقدمى استقالتك امتى ؟
مشيرة خطاب: والله ربنا يسهل شوية يعنى انا بقالى 9 اسابيع وطبعا يعنى الكلام اللى قلتيه فى التقديم كل كلمة فىا محتاجة تعليق كبير لكن مش هعلق يعنى هقولك باختصار شديد مفيش موتوسيكلات مفيش مكتب جديد انا فى مكانى
لميس الحديدى: مفيش مقر وزارة جديد؟
مشيرة خطاب: لا مفيش مقر وزارة بس متفرقش انا سعيده فى مكانى وبنشتغل مفيش اى مشكلة يعنى نزهق مش هنزهق هو الواحد ممكن يياس فعلا لكن لما بتبقى مؤمنه بالشعب وعندك ثقة فى وهو واثق فيكى ممكن يبقى عندك امل
لميس الحديدى: سيادة السفيرة مؤمنة بالشعب شىء جميل المجتمع كله ضدك؟
مشيرة خطاب: لا اطلاقا انا شايفة ان المجتمع كله بيؤيدنا مش هقول كله قطاع عريض من المجتمع بؤيدنا الناس اللى احنا عايزنهم يتاثروا بيتاثروا بينا كفاية بس انى انا اشوف احنا عملنا ايه فى الختان ختان الاناث ويقولك ان فعلا المجتمع بيثق فينا اذا كنتى تقدرى تحطى علينا يافطة فاحنا لينا مصداقية فى الشارع المصرى احنا ما بنشتغلش فى القاهرة ولا فى عواصم المحافظات احنا بنشتغل فى الكفوروالنجوع غيرنا فعلا المجتمع فيما يتعلق بختان الاناث مطلعناش القانون فى الاول احنا بدانا بالاقناع والناس اقتنعت والقرى وقفت واعلنت نفسها ضد الختان وبعد كده رحنا مجلس الشعب وطلعنا قانون بيجرم الختان
لميس الحديدى: بس لسه فى حالات كتير ,,
مشيرة خطاب : طبعا طبعا عمرنا ما نقدر نتخيل ان علشان انا طلعت قانون النهاردة هيبطلوا لكن كل يوم اقل وفى ختان او مفيش ختان بيعتمد على الرقابة الشعبيه وعلى اجتماع الشعب دا الكلام المهم اللى قلتيه فى المقدمة
لميس الحديدى: طبعا خلينى اقولك انى انا مش بحاول ايئسك انا مقتنعة جدا شخصيا يعنى بالدور اللى انتى بتقوموه ومقتنعة جدا بالاهداف اللى عندكم بس وانا قلت ده فى المقدمة انا نفسى بحس ان صعب جدا تغيير كل هذه العادات مين اللى ضدك فى رايك ؟
مشيرة خطاب : بصى هو اللى ضدنا بعض القيادات الدينيه المتطرفة يعنى لو جيتى على موضوع ختان الاناث لو تشوفى القيادات الدينيه اللى ساعدتنى عدد كبير يعنى دكتور سليم العو كتب كتاب رائع عن الاسلام وختان الاناث و دكتور سليم العو ماهوش محسوب على الحكومة دكتور يوسف القرضاوى اصدر فتوى مؤخرا قوية جدا تساندنا طبعا الدكتور على جمعة مفتى الديار المصرية شيخ الازهر وخلافه النهاردة المؤيد لختان الاناث قل جدا جدا جدا ليه ؟ احنا وفرنا المعلومات احنا بنشتغل الحقيقة باسلوب علمى يعنى جمعنا المعلومات واديناها للناس وقلنا للاسرة المعلومات اهى والقرار قرارك طبعا دا قبل ما يتم تجريم الختان النهاردة احنا بنكلم على جريمة اذا كنا قدرنا نغير الفكر فيما يتعلق بالختان يبقى اقدر الفكر فى القضايا الاخرى هى المهم ان الناس تقتنع بالكلام المهم اللى قلتيه فى المقدمة انها وزارة صعبة فى ناس بيتهيالها انها وزارة خفيفة
لميس الحديدى: لا انا شايفة انها الاثقل دى يعنى هى تسمى وزارة الاسرة والسكان لكن انا عايزة اسميها وزارة المجتمع طب خلينى ابتدى من اخر معاركك من اول ما دخلتى انتى طبعا كان عندك معركة الختان معركة يعنى مش عايزة اقول قديمة لكن اول ما دخلتى وبقيتى وزيرة قامت الدنيا عليكى يعنى معركة تحديد النسل ودى معركة انا مش شايفة فىا ان المتشددين بس هما اللى وقفوا ضدك انا راى ان المؤسسة الدينيه وقفت ضدك
مشيرة خطاب: لا ما وقفتش ضدى لان شيخ الازهر لما طلع الفتوى بتاعته انوا تنظيم الاسرة لا ياتى بتشريع وانما بالاقتناع الشخصى للزوجين انا ايدته فى هذا
لميس الحديدى: يعنى ايه التشريع اشرحيلى ؟
مشيرة خطاب :هقولك انى انتى لو طلعتى قانون زى بعض الدول زى ايران مثلا وقلتى او الصين
لميس الحديدى: ايران
مشيرة خطاب: اه ايران نظمت النسل بقانون
لميس الحديدى: ايران وهى الدولة الاسلاميه وناس كتيرة يمكن شايفاها النموزج لى يعنى الدول الاسلاميه
مشيرة خطاب:اه وعندك فى مصر الغربية من احسن المحافظات فى المؤشرات السكانيه وبتنظم النسل كويس قوى وهى فىا مركز قوى للاخوان المسلمين فهى الفكرة مش انى انا اطلع قانون الفكرة انى الناس تبقى مقتنعة شوفى الازهر لما طلع الفتوى دى الناس كلها اتهيالها ان هو فى معركة معايا وقالوا شيخ الازهر بيعارض الوزيرة انا طلعت بيان تانى يوم وقلت فعلا لان هو قال ايه
لميس الحديدى: ان حسيت ان البيان ده تراجع يعنى ان الوزيرة المدنية تتراجع امام السلطة الدينيه لان مش عايزة تصطدم
مشيرة خطاب: لا اصطدمت وممكن اصطدم ولو حضرتك تابعتينى انا بقول راى واجرى على الله مبعملش اى موائمات انا ليه بقولك الكلام ده ؟مين الناس اللى بتخلف كتير للاسف هى الناس اللى ما بتسجلش ولادها لما يتولدوا هى الناس اللى ما بتودهمش مدارس لا بطعمهم ولا حاجة فدا الخطر الحقيقى اللى بيضعف النمو الاقتصادى لا يحسن النمو الاقتصادى علشان اجى اقول قانون تفتكرى الناس دى هيفرق معاها القانون؟
لميس الحديدى: اه هيفرق معاها هيفرق معاها اذا كان القانون انا مبقولش قانونك متخلفش اكتر من كذا انا بقول قانون به تحفيز سلبى او ايجابى يعنى تقوله مثلا انا هدعم كدولة بدعم طفلين او تلاته صحة وتعليم وكذا وكذا وكذا انا بعد التالت سورى
مشيرة خطاب: كلامك مظبوط بس دا مالوش علاقة مالوش علاقة بالقانون قضية الحوافز السلبية والايجابية قضية مهمة جدا وهى مطروحة ودا كلام منطقى ان الدولة مثلا اللى بتدى البطاقة انا هديلك لحد الطفلين الاولانيين بالكتير تلت اطفال وبعدين لازم تعمللها فليدنج اوت اعتبارا من تاريخ كذا دا لازم الحقيقة يتم
لميس الحديدى: يا سيادة السفيرة
مشيرة خطاب: لا الدعم قرار تنظيمى ويجب ان احنا نفكر فى انما انتى اللى بيحكمك الواقع بتاعك يعنى القانون بيستجيب لاحتياجات المجتمع انتى عندك ناس خارج حساب الزمن خارج حساب المجتمع
لميس الحديدى: خارج حساب المجتمع بس دول عايشين موجودين معانا
مشيرة خطاب :ما انا عارفة
لميس الحديدى: يعنى نحن كلنا ناكل من وعاء واحد غنى وفقير ومتعلم
مشيرة خطاب: ايوه ما هما ليهم حق عندك بقى انك تنزللهم وتشوفى هما ليه بيخلفوا كتير؟ هما ليه ما بيودوش ولادهم المدرسة ؟دا محصلش دا احنا عملناه فى الختان وعملناه فى تعليم البنات ودا اللى بيدينى امل الناس دول بيستجيبوا بس تروحى وتتكلموا معاهم تاخدى معاكى شيخ مؤمن
لميس الحديدى: ما هو الشيخ عمره ما هينزل معاكى اذا كان شيخ الازهر قال له ان واصدر فتوى انوا ما ينفعش تحديد النسل وان تحديد النسل
مشيرة خطاب : لاحرام شيخ الازهر قال ان الزيادة السكانية دى نتيجة عدم الفهم الصحيح للدين الاسلامى وانوا فقهاء الدين الاسلامى علماء المسلمين افادوا انوا يجوز للزوجين انهم يحددوا النسل فى فترات معينة اذا كان هناك مرض لاو خوف من العدوى بين الزوجين او فقر او حاجة خلاص يعنى هو قالك لو عندك فقر او حاجة لازم تحدد النسل لازم تنظم النسل علشان كده انا ايدت هذه الفتوى ليه ؟ خاينا بس نبزل مجهود ونمشى لان احنا متاخرين فى كل حاجة
لميس الحديدى: ايه اللى حصل حسنين ومحمدين والقصة القديمة حسنين ومحمدين لمن لا يسمع كان اعلان مشهور جدا وكان فى وقتها المعونة الامريكية بتنفق اموال كنا بنستخدمها لقضية تحديد النسل دا مثلا فى التمنينات او السبعينات او كده؟
مشيرة خطاب: اول ما مسكت الوزارة وقعدت مع الناس وسالتهم ايه المشكلة ؟ اول حاجة اقولها نقص التمويل التمويل الاجنبى توقف انا الحقيقة شعرت باستياء وقد كده احنا صغيرين انى احنا نستنا تمويل اجنبى وكلنا عارفين ان التمويل الاجنبى ده فى يعنى جزء كبير جدا منه انا بديه باليمين وباخده بالشمال وان انا لازم اشوف مصادر تمويل من عندى انا بس انا كسلانة انى انا ادور على مصادر التمويل فقلتلهم اخر حاجة نفكر فىا التمويل ورونى البرامج يعنى انا بقالى النهاردة 9 اسٍابيع فى الوزارة عندى 4 جهات تحت الوزارة القضية السكانية ومجلس السكان هو اللى خد 90% من وقتى منذ توليت لحد النهاردة ليه ؟ انا بشوف اللى حصل لازم ابنى على اللى فات يبقى فى تراكم
لميس الحديدى: لكن بدون قانون ارجعلك مرة اخرى بدون قانون ممكن حضرتك تكونى صح وشيخ الازهر كمان بدون قانون احنا عشنا سنوات طويلة بدون قانون ودول اخرى نفذت او طبقت هذا القانون وهى دول اسلامية ايضا ونفع معاهم واشتغلوا ونمت وتطورت وما الى ذلك ما احنا بقالنا سنين
مشيرة خطاب: بصى انتى ممكن تطلعى قانون المجتمع مش مستعد ليه وهيبقى حبر على ورق نجاح القانون ان هو ياتى ملبى لاحتياج فى المجتمع فانتى النهاردة مطلوب مننا ان احنا نخلق الحاجة لهذ القانون زى ما عملنا فى تعديلات قانون الطفل كانت نتيجة طبيعيه لشغل احنا عملناه على ارض الواقع انا النهاردة شايفة فجوات كتير جدا على ارض الواقع اول حاجة مثلا الجمعيات الاهليه الجمعيات الاهليه بتنهار الجمعيات الاهليه اللى بتشتغل فى القضية السكانيه بتنهار ليه ؟ التمويل وقف وهى كمان وقفت كان المفروض ان كل سنة 50 جمعية جديدة تظهر وتشتغل فى هذا المجال المفروض ان الجمعيات الاهليه كانت تقدم 10 % من الخدمة النهاردة رجع نصيبها لى اقل من 4% للخدمة من يومين عملنا اجتماع مع الجمعيات الاهليه ودرسنا المشاكل واتفقنا شكلنا لجنة من ممثلى الجمعيات وزارة التضامن ووزارة الصحة ووزارة السكان علشان نقدر نسد الفجوات نقوى الجمعيات الجمعيات النهاردة بتقولك الوسيلة كانت بتجيلنا ببلاش من المعونة النهاردة لازم ادفع
لميس الحديدى: وسائل منع الحمل يعنى ؟
مشيرة خطاب: بالظبط الحاجة التانية بيقولك المفروض اخد طبيب على حساب الوزارة وزارة الصحة لانى انا مبقاش عندى المعونة كلها حاجات ممكن تتعمل لكن انتى محتاجة خطة ومحتاجة تعدى مع الناس دول كان اجتماع مهم جدا احنا قعدنا مع الجمعيات علشان الجمعيات تحس بمسئوليتها وتعرف ان العين عليها وانوا لو فى قصور انا هوفروا محليا اناىمش محتاجة
لميس الحديدى: مينين يا سيادة الوزيرة؟
مشيرة خطاب: لا بصى هقولك على حاجة احنا اكتشفنا ان قضية التمويل دى شماعة اللى انا بعلق عليها
لميس الحديدى: لا ما انتى يجب ان تكون معك ادوات يعنى عشان تعملى اعلانات وعشان تعملى برامج توعيه وعشان تنزلى زى ما انتى بتقولى بدكاترا للوحدات الصحيه دا فلوس كل حاجة بتترجم لى فلوس
مشيرة خطاب: دلوقتى الاطباء مثلا وزارة الصحة بتبعت الاطباء وبتدفع مرتبهم فى حته صغيرة اوى بيقولى ان الحافز بتاعه لما بيروح الجمعية عن لما هو موجود فى المقر طيب ما انا اشوف الحافز يعنى المهم انك تعرفى المشكله تسمعى من اصحاب المشكلة وتبتدى يعنى كلها قضايا ممكن حلها
لميس الحديدى: عندك امل فى موضوع السكان الازمة السكانية دى ؟
مشيرة خطاب: عندى امل هقولك على حاجة احنا اثبتنا جديه بدون غرور فى المجلس القومى للطفولة والامومة وعايزة اقولك ان التمويل كان بيجيلى لحد عندى فانا لو اثبت نفس الجديه فى السكان التمويل ها يجينى لحد عندى يضاف الى هذا اطلبى ما هو محدش طلب
لميس الحديدى: معلش بس موضع السكان ده كان مع وزراء اخرين قبلك ليه تنجحى انتى بينما فشل الاخرون؟
مشيرة خطاب: بصى دا سؤال مش عايزة اجاوب عليه ليه ؟ لانى انا احب احس انى انا ممكن اقدم حاجة انا ليا طريقة مختلفة النهاردة انشاء الوزارة بيعبر عن فكر جديد وعن واقع جديد انتى النهاردة بتقولى وزارة الاسرة والسكان غير الصحة والسكان ليه لان قضية السكان مهياش قضية صحيه وزير الصحة عنده من المشاكل ما ينوء بحلها
لميس الحديدى: هنقف هنا شوية عند فكرة وزارة الاسرة والسكان نطلع فاصل وارجع تانى علشان اسالك من اغضبتى من الوزراء لما بقيتى وزيرة ؟
فاصل
لميس الحديدى: وفى مارس من 2009 صدر لها قرار بان تكون اول وزير لى الاسرة والسكان هى خدت حته من وزارة الصحة والسكان التى يتولاها الدكتور حاتم الجبلى زعل ؟
مشيرة خطاب: كان من اكتر المؤيدين لى انشاء
لميس الحديدى:لا حقيقى لما حد بتاخدى حته من شغلوا لازم يزعل
مشيرة خطاب :لا بالعكس اولا اول حد استشار كان الدكتور حاتم الجبلى وقلهم طبعا
لميس الحديدى: يمكن حب يخلص من موضوع السكان حب يخلص منه
مشيرة خطاب: اديكى قلتى اللى فىا بالظبط كده وهو متعاون جدا يعنى انا النهاردة ال9 اسابيع دول فى اجتماعات لا تنتهى لمجرد انى انا اعرف ايه اللى بيحصل ؟ فى كل اجتماع معايا وكيل اول وزارة الصحة فى كل اجتماع
لميس الحديدى: دائما ؟
مشيرة خطاب:طبعا طبعا
لميس الحديدى: مفيش مشاكل
مشيرة خطاب : اطلاقا اولا اتكتب كلام ملهاش اى
لميس الحديدى: اتقال ان بينكم هلافات
مشيرة خطاب: اه ومش عارفه ان الوزيرة فايزة ابو النجا حاولت تصلح بينا وانى انا طلبت فلوس ومش عارفة حد من يومين عربيات انا لا طلبت فلوس ولا عايزة فلوس واذاكان وزير الصحة عنده فلوس يعنى دا هديه مننا عمرى ما طلبتها منه
لميس الحديدى: مفيش وزير بيدى وزير لا فلوس ولا اى حاجة تانيه
مشيرة خطاب: انا مطلبتهاش وهو مقلش لا
لميس الحديدى: هذه الوزارة فصلت من اجل د/مشيرة خطاب ؟ السفيرة القوية المسنوده
مشيرة خطاب: مسنوده من مين ؟
لميس الحديدى: انتى من الاقوياء يعنى
مشيرة خطاب : لا ايه قوة د/مشيرة ؟ مش عايزة اقول قوة د/مشيرة لانى انا عمرى ما اشتغلت لوحدى قوتنا ان احنا بنقول الحق مبنعملش موائمات لاننا بنشتغل لكى ندافع عن اضعف الضعفاء فى المجتمع انا بقالى 10 سنين النهاردة فى المجلس القومى للطفولة والامومة بالظبط من ديسمبر 99 واحد ديسمبر او 30 ديسمبر 99 وكانت اكبر مفاجاه ليا فى حياتى مش عايزة اقول صدمة انا هروح اعمل ايه ؟ اكيد هفشل فشل ذريع طول عمرى دبلوماسيه نقلتينى نقلة كبيرة جدا انا النهاردة بقول يعنى طبعا السيدة سوزان مبارك لما حطتينى فى هذا المكان وهى عمرها ما شافتنى ولا قعدت معايا ولا كانت تعرفنى طبعا استحملتنى فى الاول لحد ما اتعلمت وبعدين انا اثبت وجودى انى انا لا فى اى صلة كانت بينى وبينها ولا كانت تعرفنى وانا اتربيت على ان قوتك فى عملك
لميس الحديدى: دا حقيقى دا حقيقى لما دخلتى بقى الحكومة معظمهم من الرجال وعدد النساء قليل جدا يعنى السيدة الحاجة عيشه اللى كلنا يعنى بنحبها والسيدة فايزة ابو النجا حسيتى ايه بقى بالغربة
مشيرة خطاب: ابدا ابدا ابدا
لميس الحديدى: الرجالة من الوزراء بيعاملوكى كويس ؟
مشيرة خطاب: اه جدا جدا جدا يعنى انا من اهم الزيارات اللى انا استقبلتها الوزير المغربى جه زارنى فى المكتب وقعدنا ساعتين اتنين وهو منسق المجموعه الاجتماعيه الوزاريه كان اجتماع مهم جدا وعارفة فى اخر اللقاء قاللى ايه ؟انا قلتله انا جايبه الباكتج عارفة لما تقولى البضاعة بتاعتنا انا جايبه الباكتج دى وهنخدم على الوزارات المعنيه بالباكتج بتاعتنا اللى هى حقوق الضعفاء حقوق المهمشين بصلى كده وقاللى انتى جايبه جانب احنا محتاجنله جدا يعنى انا قلتله مثلا مشروع الالف قريه الاكثر فقرا مينفعش انى انا اجى ابنيله بيت جديد واعمله طرق جديد وهو يخش بنفس الفكر انا لازم اغير الفكر زى ما بداتى كده لازم اغير الفكر وانا ليا الخلايا بتاعتنا زى بالظبط الحزب الشيوعى
لميس الحديدى: قبل ما اسال بقى عن الخلايا هكتبها اهو قدامى علشان منسهاش فعلا هذه الوزارة لا تستطيع ان تعمل لوحدها ؟
مشيرة خطاب: طبعا علشان كده هى وزارة دولة
لميس الحديدى: بس ليه انا حاسه انك بتشتغلى لوحدك ؟ يعنى انا مش حاسه بهذا التضافر اللى انتى بتكلمى عليه يعنى فى حاجات كتيرة جدا مؤشرات كتيرة جدا مثلا قانون الطفل اتكلمتوا على اعانة للاطفال؟
مشيرة خطاب: بتدفع لا بصى تعديلات قانون الطفل انا سعيدة انك جبيتى سيرتها عارفة لو انتى عندك خريطة هتمشى عليها فى الوزارة هى تعديلات قانون الطفل لانى تعديلات قانون الطفل بقى هى اللى هتسد منابع الخلل السكانى لو اتنفذتى واحنا مصممين على انها تتنفذ
لميس الحديدى: ايه العقبات اللى قدامك ؟
مشيرة خطاب: العقبات انك النهاردة بتغيرى ثقافة مجتمع انتى النهاردة بتقولى للاب اللى ميوديش ابنه المدرسة انت بتخالف القانون وهتحاسب
لميس الحديدى: هيحاسب ازاى ؟
مشيرة خطاب: بصى احنا عاملين نظام جديد للحمايه
لميس الحديدى: هو فى حد وديتله انذار يعنى؟
مشيرة خطاب :اه لا ثانية واحده احنا النهاردة بننشا لجان الحمايه دا نظام جديد زمان كان العمليه كلها وكيل النيابه والمحكمة والطفل يتسجن وخلاص احنا النهاردة بنمنع ان الطفل يخرج بره اسرته فعملنا حاجة اسمها لجان حمايه لجان الحمايه دى بتشتغل على مستوى المحافظة وعلى مستوى الحى بتراقب الاسر وممكن تقوله تعالى انتى عمال تخلف وما بتبعتش ولادك للمدرسه تعال هنا وبتديله انذار ولما بتفوت مدة الانذار ممكن يروح يقف قدام المحكمة كلامك مظبوط فى ايه ان اللجان ممكن تغمض عينيها القاضى ممكن يغمض عينيه وهى دى مسئوليتنا احنا بقى ومسئوليه الاعلام انوا اللى يخلف لازم يسجل ابنه ويدخله المدرسه
لميس الحديدى: ايوه انا شايفة دا كلام جميل قوى على الورق يطبق ؟طبقتوه على اسر فى اسر راح لها جمعية حماية او خلية حماية وراحت وقالتلهم انت مودتش ابنك انت هتروح كذا كذا كذا ؟
مشيرة خطاب : بصى احنا عملنا ده من خلال خط النجده لجان الحماية لسه جديدة ولسه بتكون انا رايحة سينا وسينا لسه ماشكلتش لجان الحمايه وقلنا خير وبركة هنروح سوا هنشكل لجان الحماية بنظام جديد لو اتنفذ ولو الناس اقتنعت بيه ولو الوزرات اقتنعت بيه هننجح لو ما اقتنعتش بيه هنفضل زى ما احنا
لميس الحديدى: انا حاسه ان حضرتك عملك ده ما ينفعش يشتغل لوحده ما تنفعيش تشتغلى فى فراغ لكن انا مش حاسة بالتعاون ده من وزارة الصحة ولا التعليم ولا الدخليه يعنى مين بيتعاون معاكى ؟
مشيرة خطاب: لا فى لا فى تعاون
لميس الحديدى: ايه اكثر الوزارات التى تتعاون مع د/مشيرة خطاب ؟
مشيرة خطاب: انا لحد النهاردة مفيش وزارة قالتلى لا على ارض الواقع موضوع ختان البنات ما هما نفس الجهة مهما نفس الوزارات ما فيش حاجة اختلفت وبعدين انا زى ما بقولك انا بقالى 9 اسابيع فى اجتماعات وبمسح الخريطة كده وبطلع باليات انا فى تصورى ان انا هعمل لجان مع الوزارات اللى حضرتك بتتكلمى عليها وزارة الصحة وزارة التضامن وزارة الاوقاف بمهام محددة لان انا وزارة سياسات مش وزارة تنفيذ هما اللى بينفذوا وانا العين
لميس الحديدى: تخيلى انى انا زعلت جدا ان انتى وزارة سياسات
مشيرة خطاب: هو التصور كده لانها وزارة دولة
لميس الحديدى: يعنى وزارة السياسات دى
مشيرة خطاب: اه وزارة دولة هما وزارة الصحة تنفذ ووزارة التضامن بس
لميس الحديدى: :بس هما عندهم بالفعل مشاكلهم وعندهم
مشيرة خطاب: طب انا هقولك على حاجة تنظيم الاسرة ايه اسباب التراجع ان السيدة اللى عايزة تنظم نسلها بتروح العيادة او تروح الجمعية تطلب الوسيلة ممكن تاخد الوسيلة تجربها متنفعش مترجعش تانى وتقولهم مش نافعة يقوموا يغيرولها الوسيلة فانتى محتاجة الارتقاء بالخدمة فى المراكز اللى بتقدم الوسيلة سواء عيادة او جمعية مين اللى هيدى وزارة الصحة؟
لميس الحديدى: ايوه اذا كنت مش عارفة اعمل التامين الصحى هشوف موضوع تحديد النسل كل واحد عنده اولوياته
مشيرة خطاب: هو هنا اجى للكلام اللى انتى قلتيه دى اخطر وزارة هل وزارة الصحة مقتنعة ان قضية تنظيم الاسرة هى اخطر قضية بتواجه مصر ؟ انا بقول للناس اسمعوا كلام الريس فى المؤتمر القومى للسكان فى يونيو2008 وشوفوا هو ازاى حط القضية السكانيه انا بقى دورى بجيب الخطاب وبقولك انتى مفروض تشتغل واحد اتنين تلاتة على الخدمة تضمن ان الست لما تروح وعندها مشكلة تلاقى طبيب مفيش طبيب يبقى يا وزارة الصحة ابعتى الطبيب
لميس الحديدى : يعنى انتى تحطى السياسة وتقولى يا وزارة الصحة كذا يا وزارة التعليم كذا يا وزارة الاعلام كذا هاتبعى ازاى ؟
مشيرة خطاب : انا برضه لازم اتابع
لميس الحديدى: يعنى ممكن ترفعى سماعة التليفون على وزير والله انا شايفة حضرتك ما بتعملش
مشير خطاب: هو وزير الصحة مش بينزل يفتش وبيقفل عيادات ما هو الراجل ما بيتاخرش بس عايز حد يقولوا العيادة دى ما بتشتغلش عايز حد يقولوا ابعت الدكتور وبعدين انا زى ما بقولك مشكلة التمويل اللى كل الناس عماله تكلم عليه خلينا نقول انا محتاجة فلوس قد ايه ؟ محدش قال
لميس الحديدى:طب انتى تعرفى انتى محتاجة فلوس قد ايه ؟
د/مشيرة خطاب: انا طبعا الاجتماع اللى عملناه مع الجمعيات الاهليه وضح ان فى اعباء ماليه لابد يعنى تتخلق النهاردة انك توفرى وسائل باسعار معينة لان الجمعيات برضه زباينها مختلفين فى جمعية بتقدم الوسيلة ب 2 جنيه وفى جمعية بتقدم
لميس الحديدى: دور الجمعيات الاهليه ايه ؟
مشيرة خطاب: دورها مهم جدا لانها اولا هى اللى بتختلط بالناس هى اللى بتقنع الناس وبعدين الناس بتروحلها بتاخد منها الوسيلة وفى ناس بتفضل انها تروح تاخد من القطاع الخاص على انها تروح تاخد من الحكومة فالجمعيات الاهليه فى انهيار بعض الجمعيات الاهليه قفلت لان التمويل توقف
لميس الحديدى: لوقلتلك ان الدولة هتيجى تقولك ان معاييش فلوس هل البديل ده ممكن يكون القطاع الخاص المسئولية تجاه رجال الاعمال يعنى اتجاه اخر منبع اخر للفلوس من هيئة دوليه
مشيرة خطاب: هو مجموع هذا كله ودا حصل بالفعل انا تانى يوم ما اتعينت كلمنى احد رجال الاعمال شخصية رائعة ليها دور مش عايز اقول اسمه وقالى انا هساعدك فى المجال الاعلامى هساعدك تنتجى رسالة اعلاميه بس مش هدفع تمنها على الهوا فانا النهاردة بشتغل وبرضه مع حد هيعملنا رسالة اعلاميه حلوة جدا المكون الاعلامى حلوة قوى وبعد كده اروح لوزير الاعلام انا اتكلمت معاه بالفعل زائد الرسالة دى زائد
لميس الحديدى: ايه المطلوب هل كل ذلك ولا مضمون ما نقدمه يتغير ؟
مشيرة خطاب: بس انتى عامله تنقليلى من قضية لقضية كلها اخطر من بعض السياسة الاعلاميه مهمة جدا والاعلام مش بس اعلان يطلع على التليفزيون انتى لازم يبقى عندك استراتيجية اعلامية متكامله تقدرى تقولى خلصناه جزء على التليفزيون جزء فى المراكزاللى بتقدم الخدمة جزء فى المدارس لازم المدارس
لميس الحديدى: هو التعليم اساسات انا راى ان احنا نقفل عليه
مشيرة خطاب :بصى لازم فى المدارس ولازم فى نوادى المراة انتى دى قضية خطيرة يعنى شوفى يا نقوم يا نقعد بسبب قضية الزيادة السكانيه لان الموارد محدودة جدا حصة مصر من المياه زى ما هى النهاردة بتكلمى على تجمعات سكانيه جديدة ودى قضية مهمة جدا تجمعات سكانيه جديدة لازم ما تكونش تجمعات زراعية لازم تكون تجمعات اساسا صناعيه انتى معندكيش ميه ونظام الرى دا لازم تغيريه مش بس سينا لازم تمشى كمان غرب الوادى اقتراحات كتير اتحطت علشان تحركى غرب الوادى تخلقى مجتمعات سكانيه متجانسه متكاملة فىا كل الخدمات انتى مفروض تشجعى القطاع الخاص انتى لازم تشتغلى على ضبط النمو السكانى بحيث ان هو يخدم النمو الاقتصادى الارتقاء بالخصائص السكانيه مينفعش ان انتى الغالبيه العظمى من
لميس الحديدى: يعنى ايه الارتقاء بالخصائص السكانيه ؟
مشيرة خطاب: يعنى مينفعش ان الغالبية العظمى من اطفالك ميرحوش المدرسة لازم يروحوا المدرسة ويكملوا المدرسة معظم الولاد اللى بيتسربوا من المدارس يقولك خرجت من سنة تانية ابتدائى لانى مش نافع فى التعليم
لميس الحديدى: لان ابوه عايز يشغله
مشيرة خطاب : بالظبط وارجع تانى ارجعك لخطاب الريس ربط بين عمالة الاطفال والزيادة السكانيه هو ده الارتقاء بالخصائص السكانيه انتى بتبصى لمصر بعد 50 سنة لو فضلت هذه الزيادة بهذا الشكل مصر الحضارة مصر الثقافة هتبقى
لميس الحديدى: انا عايزة اوقفك هنا عند هذه الاحداث الجليله الارتقاء بالخصائص السكانية منهجيه حقوق المواطن ان يكون لكل مواطن حقه فى التعليم والصحة وما الى ذلك الارتقاء بمستوى معيشة المواطن طب ما هى دى اهداف الحكومة بقالها سنين
مشيرة خطاب : ايوه بس انتى معلش ما هو احنا بقى طريقتنا مختلفة يعنى هتقولى عليا مغرورة
لميس الحديدى: يعنى حاسه انتى جاية تغيرى مالم يتغير من عشرات السنين
مشيرة خطاب: بس احنا عملنا نجاحات حلوة جدا فى المجال الانسانى مع الفئات المهمشه روحى زورى مدرسة تعليم البنات احنا بنينا 1076 مدرسه فى 3 سنين فى افقر المناطق فى المحافظات اللى فىا اكبر فجوة فى التعليم
لميس الحديدى: فين فى المحافظات ؟
مشيرة خطاب: شوفى الجيزة بنى سويف سوهاج المنيا البحيرة هى الوحيدة كل اللى فى الصعيد اسيوط بنينا بالمشاركة الاجتماعيه هما دول الخلايا بتوعنا اللى انا بقى هنزله دا بنته ما كنتش بتخرج من البيت النهاردة بتروح المدرسة راحت لها رولا بوش راح لها با كى مون موقفتش بصه كده ولاحطا ايديها ورا وقفت واتكلمت وسالت وردت
لميس الحديدى: كم بنت؟
مشيرة خطاب : 30 الف بنت اتخرج 523 ودخل بدلهم اتخرجوا فى شهر اكتوبر فى سوهاج حاجة تفرح والله هاتى ميسره واقعديها هنا واتكلمى معاها وهاتى بنت وقعديها هنا واتكلمى معاها دى افقر الفقرا اللى ابوها ماكنتش تقدر تفتح بقها تقولوا اروح مدرسه النهاردة هى بتروح المدرسة وكل المجتمع اللى حواليها اتغير بسبب البنت فهما دول اللى انا هرحولهم والقرى اللى اعلنت نفسها ضد الختان هما دول اللى انا هروحلهم البنات اللى محينا اميتهم برضه فى اقاصى الصعيد هما دول اللى انا هروحلهم دول زباينا بقى بنقعد النهاردة احنا بنتكلم على القضية السكانيه احنا خلقنا فىم الوعى بانهم بنى ادميين ليهم قيمة
لميس الحديدى: بس البنات دول هيتجوزا واجوازهم هيقعدوهم فى البيت وهقولهم متشتغليش ومتلفيش على البيوت
مشيرة خطاب : هى دى قيمة المدرسة بقى ان المدرسة اتمرنت على غير هذا احنا بنستثمراكبر قدر فى تدريب الميسره ان يا ما اهالى حاولوا يسحبوا البنات وهى بتروح تقنع الاب ان هى تكمل وبتكمل البنت دى عمرها ما هتخلف 10 دى بقى عندها طموح وهتكمل وهتخش الجامعه
لميس الحديدى: لو خلفت بنات وجوزها قلها لازم الولد ؟
مشيرة خطاب: انا ما بشتغلش على البنت بس بشتغل على ابوها وبشتغل على المجتمع
لميس الحديدى: ما هو المجتمع ده ذكورى النزعة والراجل اللى بيتحكم فى
مشيرة خطاب :ما هو انا لازم اشتغل على الراجل انا النهاردة بقيت وزارة الاسرة انا هنجح امتى ؟ لو عرفت الاسرة دى بتفكر ازاى ؟ ليه الراجل اللى مش لاقى ياكل بيخلف 10 و16
لميس الحديدى: علشان هو لازم يجيب الولد
د/مشيرة خطاب: انا لازم ادخل واثر فى فكرهم لازم اتحرك بسرعه من خلال انى انا ببث شعوره بالكرامة انت يا ابنى تستحق احسن من اللى انتى مبهدل نفسك واحدة واحدة الاقناع الناس دول متعودوش ان حد يروحولهم ويحسسهم بقيمتهم ويتكلم معاهم
لميس الحديدى: ايه اصعب لما بتنزلى لهذه القرى والنجوع ايه اصعب ردك جالك حاجة مش ممكن تنسيها؟
مشيرة خطاب: اللى هو يقولك سلو بلدنا احنا حلوين كده هو حلو ومبسوط هو اصلا اتجوز ومخدش ورقة جواز وبيبعتوا يسرح فى الغيط
لميس الحديدى: الدولة لم تصل الى هؤلاء؟
مشيرة خطاب: احنا وصلنا شوفى احسن حاجة انك تنزلى تشوفى القرى دى يعنى السى ان ان لما جت معانا القرية خرجت كلها علشان تقولك لا لختان الاناث قالوا دول جايين علشان انتم بتوزعوا حاجة النهاردة بقى لما بقينا نروح فى ناس مبقتش تيجى لانها مبقتش حاجة جديدة وبرضه ما بنوزعش حاجة
لميس الحديدى: هل هذا يثبت ان عندك اجندة غربيه؟
مشيرة خطاب اطلاقا انا لما حد بيقولى اجنده غربيه انا يعنى بدخل فى
لميس الحديدى: ليه ليه دى الاجندة اللى موجوده حقوق الانسان نقتنع بيها ولا لا حقوق برضه المراة فى حقوق كده فجاه طلعت كده
مشيرة خطاب: هل فى مجتمع فى الدنيا ممكن يرتقى بالقوى البشريه
لميس الحديدى: انا معاكى انا بقولك ان هو هذه اجنده غربيه لد/مشيرة خطاب ومن قبلها كان المجلس القومى للطفولة والامومة وبعدها هى مكملة الاجنده دى فى وزارة
مشيرة خطاب : احنا لما بننزل ولا حد بيقولنا اجنده دول بقى المتفزلكين اللى قاعدين فى القاهرة فى الاستوديوهات المكيفة وبيدعى انوا بيتكلم باسم الدين ويقعد يقولك اجنده غربيه واللى بيقول اجنده غربيه اقوله انزل اقعد مع الناس دول الناس دول عايزين حد يهتم بيهم احنا حسسناهم ان احنا بنهتم بيهم وهما وثقوا فينا لولا كده انا كنت ياست من اول يوم هما دول اللى بيدولى الامل لما بنزل والله 5 تلاف و10 تلاف فى الصوان شعر راسك بيقف يعنى انا ببقى اقعد اتفرج على الناس دول واقول ممكن واحد يقوم يعنى يبوظ القعدة دى كلها يعنى فعلا المصرى جميل هو بس عايز حد يحترمه ويشرحله وهو بيقتنع
لميس الحديدى: بيحترمه عايز العدل وحقوقه الطبيعيه
مشيرة خطاب: اه طبعا اه طبعا علشان كده لما تقوليلوا حق انك يبقى ليك كرامة
لميس الحديدى: اه بس حقه ده يجب ان توفره له الدولة اللى هو يوفرله حقه من التعليم حقه من الصحة حقه من ان يعامل معامله كريمة فى داخل قسم الشرطة حقه انوا هو يمشى على رصيف سليم حقه
مشيرة خطاب: انا النهاردة بقى بعد الرصيد اللى عندنا ده بقوله انت النهاردة لو استمريت على هذه هتتحرك من سىء الى اسوا لازم تلم نفسك ولازم يقتنع وعلشان كده لازم الشغل يكون فى الكفور والنجوع انت عند الصعيد 25 % من عدد السكان بيوازى 41% من الزيادة السكانيه فاحنا هنتكلم هنتم ان الخدمة موجوده لازم الخدمة موجوده ودا دور وزارة الصحة واحنا مع الجمعيات الاهليه مع سياسة اعلاميه تنطلق من الثقافة المحليه كل ده ممكن يتظبط ايام المرحوم الدكتور ماهر مهران لانوا كان مركز على القضية السكانيه قدر ان هو يعمل تقدم انا النهاردة من خلال الاسرة دا اقتراب مختلف خالص انت بتخش جوا الاسرة وتقوليلوا انت حقك كاسرة فى حياه كريمة اول خطوات الحياه الكريمة انك تخلف اسرة صغيرة سعيده يعنى هل خدم الاعلام يرجع يدفع هذه القضية لان الاعلام ليه تاثير يعنى انا اتخيل برنامجك زى برنامجك متشاف لو انا حركت المثقفين اللى بيتفرجوا عليكى ان هم يحثوا بمسئوليه تجاه هؤلاء الناس انا النهاردة عايزة انزل اعلاناتى على التليفزيون لو انا هنزلها على التليفزيون وزير الاعلام هيتكرم ويتعطف وينزلهالى طبعا فى الوقت اللى مش هتنافس فى مع ناس بتدفع طيب هل ممكن يجى رجل اعمال يدفعلى هذه
لميس الحديدى: لا دا دور تليفزيون الدولة انك تنزلى زيك زى ..
مشيرة خطاب : فى وقت الذروة ؟البرامج اللى الناس بتتفرج عليها؟
لميس الحديدى: اعتقد انوا وزير الاعلام بيعمل كده القضايا الاساسيه اللى هى بتمس سياسات المجتمع الاساسى اعتقد ان دى
مشيرة خطاب : وبعدين رجال اعمال يتبرعوا ان احنا ندى الوسيلة مجانا الوسيلة كانت زمان بتيجى مجانا النهاردة مبتجيش عايزة ادى جوده فى الوسيلة مفيش جوده متاسفه يعنى يمكن الحته دى تزعل ناس منى انما انا عايزين ازود الجود
لميس الحديدى: طيب هنخرج فاصل اهداف كثيرة لدى د/مشيرة خطاب احيانا انا شخصيا بشعر انها حالمة لكن اتمنى الاهداف يعنى تحقق على ارض الواقع بعد الفاصل
فاصل
لميس الحديدى: اهلا بكم من جديد تغيير المجتمع هذا هو الهدف الرئيسى لوزارة الاسره والسكان ومعانا عدد من الاتصالات التليفونيه الدكتورة د/سعاد صالح استاذ الفقه المقارن بجامعة الازهر مساء الخير يا دكتورة
د/سعاد صالح: مساء الخير يا استاذة لميس اهلا وسهلا
لميس الحديدى: يعنى هل كل الاهداف لهذه الوزارة تتعارض بشكل او باخر مع الشرع مع الدين انا حاسه ان فى مش عايزة اقول عداء ولكن فى غضاضه لما تحمله هذه الوزارة من فكر هل دا صحيح ولا؟
د/سعاد صالح: اولا مساء الخير يا سياد الوزيرة
مشيرة خطاب: اهلا دكتورة د/سعاد
د/سعاد صالح: اهلا بحضرتك بالعكس احنا كنا فى حاجة شديدة جدا لوجود هذه الوزارة المتخصصة فى شئون الاسرة لان الاسرة ليست زوجة او زوج فقط ولكن هى زوجة وزوج وابناء كلهم منظومة متكامله فنحن فى حاجة شديدة الى اهتمام بهذه العناصر الثلاثة دى واحدة الواحدة الثانيه نحن حينما ننظر للابناء فاننا ننظر اليهم على انهم قرة الاعين هم ثمرة الزواج المشروع وهم المقصد الاول من مقاصد الزواج فى الاسلام وهو الانجاب وطلب الذرية زين للناس حب الشهوات من النساء وقوله تعالى المال والبنون زينة الحياة الدنيا بالنسبة لقوانين تنظيم الاسرة يعنى انا الحقيقة بايد ما قاله صديقى الامام الاكبر ان هذه الامور لابد ان تكون باتفاق بين الزوجين داخل الاسرة على اعتبار الاسلام لا يمانع اطلاقا بالعكس هو الرسول عليه الصلاة والسلام حينما قال تناكحوا تناسلو وتكاثروا لم يقصد الكثرة العدديه ولكن الرسول عليه الصلاة والسلام يقصد الكثرة التى تفيد المجتمع والتى تشترك فى بناء المجتمع وحينما كانت وسيلة العزل فى عصر الرسول عليه الصلاة والسلام كوسيلة لتنظيم النسل كان ذلك يتم بموافقة الزوجة وبرضاها يعنى الزوج يتفق مع زوجته اما عملية القوانين سواء كانت ايجابيه او سلبيه بمعنى انى انا احرم الاسرة اللى جابت اكتر من اتنين او غير ذلك انا اعتقد ان هذا سيؤدى الى الابتعاد عن تنفيذ هذه القوانين والنظر اليها على انها قوانين كما سمعت فى
لميس الحديدى: والحل ايه يا دكتورة اذا كان حتى التحفيز الايجابى او السلبى؟
د/سعاد صالح: انا هقول حضرتك الحل يا سياد الوزيرة استثمار الزيادة السكانيه احنا
دلوقتى لماذا لانقيم تجربة الصين واليابان ؟ لماذا لا نقيم تجربة الهند ؟ الهند الان فى قمة التقدم بهؤلاء الملايين نحن لابد ان نستثمر هذه الزيادة السكانيه احنا عندنا اراضى كتيرة جدا محتاجة اصلاح
لميس الحديدى: يا دكتو د/سعاد الموارد لدينا قليلة جدا ولو احنا سبنا الحكاية كده لى اختيار الناس ورغبات الناس وما الى ذلك فاحنا بنطلق الموضوع بلا قواعد وموارد صغيرة الميه قليله دا انا لميس اللى بقول لحضرتك
د/سعاد صالح: انا مع حضرتك بس انا بعتقد بيجلنا بيجلنا يعنى معونات كتيرة جدا وبكل اسف ما بتتحطش فى المكان المطلوب فى وحضرتك عارفة كويس قضية الدويقة واللى حصلت مصيبه فىا ان كان جايه معونات جامدة جدا ولم تستثمر فى تحسين العشوائيات فى هذه المنطقة نحن فى حاجة الى تخطيط فى حاجة الى ترابط وتنيسق بين مؤسسات الدولة المختلفة فى مثل هذه الامور لان اى حاجة هتدخل بالقوانين وهتدخل بالتجريم ستؤدى الى نتيجة عكسيه وتؤدى الى نفور من هذه الامور نحن نريد عن طريق علماء الدين وعن طريق علماء النفس وعن طريق علماء التربية وعلماء الاجتماع ان يكون هناك اقتناع واقناع لاهمية مثل هذه الامور بعيدا عن تدخل القوانين او التهديد بالحرمان من بطاقة التموين او الخدمات بتاعة الدوله
لميس الحديدى: خليكى معايا يا دكتورة د/سعاد انا عايزة سياده الوزيرة ترد على حضرتك
مشيرة خطاب: الدكتورة د/سعاد حضرتك لو بصيتى على اللى بيخلف اكبر عدد هى الناس اللى مبتوديش اولادها المدارس يا دكتورة د/سعاد فى شبه استغلال للاطفال فى هذه الحالات ودا ضد الدين وضد قيم المجتمع واهدار للموارد البشريه فقبل لما افكر فى استثمار الزيادة السكانيه افكر فى الارتقاء بالخصائص السكانيه يعنى اطبق القانون هنا الدولة بتقول ان التعليم مجانى وبتصرف 25 مليار جنيه فى الموازنة الجديدة على التعليم يبقى ازاى ما استثمرش هذا الاهتمام من الدولبة ؟ النهاردة العمليه سايبه يا دكتورة د/سعاد لازم المواطن يعرف انوا مسئول تحاه اولاده
د/سعاد صالح: انا سمعت ان سيادك عامله دورات تدريبيه بالاشتراك بين علماء الدين وبين المتخصصين من العلوم الاخرى احنا عايزيننجوب وعايزين نقتحم وعايزين نروح
لميس الحديدى: لا بس احنا فى نقطة مش متفقين عليها وبنلف حواليها فكرة التحفيز السلبى او الايجابى اللى هو يا مواطن انا كدوله سادعمك عند الطفل الاول والثانى وربما الثالث انا مش هقدر ادعم الطفل ال16 انا مقدرش اعلم ومقدرش اطبب ومقدرش اصرف كل دا مجانا
مشيرة خطاب: وبعدين قانون الطفل يا دكتورة د/سعاد لو احنا تمسكنا بان قانون الطفل ده ما يتحولش لى ورق حبر على ورق هتفرق جدا فى القضية السكانيه
د/سعاد صالح: قانون الطفل هل تطبيقه لى طفل القاهرة وطفل المحافظات الرئيسيه ولا تطبيقه يكون فى النجوع والقرى اللى فعلا الطفل محتاج فىا الى هذا القانون؟
مشيرة خطاب: تعديلات قانون الطفل لا تخاطب طفل القاهرة
د/سعاد صالح: المتابعة يا سيادة الوزيرة المتابعة
مشيرة خطاب: ما دا اللى انا بناشد عليه يا دكتورة د/سعاد هو دا اللى انا بطلب من الجميع تعديلات القانون بقالها 10 تشهر ولا 11 شهر
د/سعاد صالح : البعض بينظر لبعض مواد هذا القانون انها تتصادم مع الشريعة الاسلاميه فى العلاقة بين الاباء والابناء
مشيرة خطاب: زى ايه يا دكتورة سعاد ؟
د/سعاد صالح: يعنى الابن لو تعرض لعنف من احد ابويه يبقى يبلغ ضد ابوه طبعا احنا نشانا على ان وبالوالدين احسانا وان ربنا سبحانه وتعال وصى اليهم بالبر حتى فى حالة الكفر حتى فى حالة ان يكون احد الابوين كافرا فان الابن يجب ان يصاحبه بالمعروف
مشيرة خطاب: دكتورة سعاد احنا عندنا خط النجده بيشتغل بقاله 3 سنين الخط دا ساعد اسر كثيرة جدا انها تتغلب على مشاكل كانت بتهددها اخطر حاجة انى يبقى عندك مشكلة وتقفلى عليها لازم تتكلمى فى المشكله والهدف هو دعم الاسرة وليس تقليب الاطفال على ابائهم دا مش ضد الشريع
لميس الحديدى: خلينى بس اقف هنا ثانيه واحده يكون معانا اتصال اخر خليكى يا دكتورة سعاد معانا الدكتورة هدى زكريا استاذ علم الاجتماع السياسى مساء الخير يا دكتورة
هدى زكريا : مساء النور اهلا وسهلا
لميس الحديدى:حضرتك سامعه هذا الحوار بين الدكتورة د/سعاد وبين سيادة الوزيرة رايك يا ريت بسرعة
هدى زكريا: اولا انا بحيى وزيرة الجهاد الاكبر بصراحة لانها تنقبض على قطعه من الجمر هى بتشتغل والشغل اللى هى بتعمله حتى نتائج النضال بتاعها صعب تقسيها شوفى قد ايه يعنى هى قبلت هذا الهم الكبير فى وقت فى كمان الاسرة المصرية ادائها الاسرى متدنى جدا المشكله بقى هنا ايه ؟ انوا هى شالت هذا العبء واحنا علم الاجتماع بيقول والله وظيفة الاسرة هى اعادة انتاج المجتمع على نحو افضل احنا بنخلف الاولاد علشان ايه ؟ يبقوا زينا او احسن اللى احنا ملاظينوا التدهور اللى حصل للمواطن المصرى مسالة بقت يعنى كل الناس بتلمسها
لميس الحديدى: ايوه يا دكتورة بس انا عندى مشكلة اذا لم نقنع المؤسسه الدينيه ان تكون فى صف هذه الافكار
هدى زكريا : هنا بقى اللى انا عايز اقوله احنا مش هنبط ببراشوت على مجتمع ونغيره قد ما نهيا هذا المجتمع ببرامج تعباه اثارة وعى جمعى هذا الوعى الجمعى اللى احنا ملاحظين حاجة احنا كاننا ماشين عكس الاتجاه لازم نقعد كده قعده جاده رجال الدين عندنا يقعدوا ويقيموا الموقف وميبقاش فى يعنى انتقائية فى اختيار الفتاوى وتعليمات الاحكام اللى متلقيش بمجتمع لو ظرف خاص يعنى المواطن اللى هو ليه رؤية فعليه فى مشكلته وانا ليا رؤية رسميه احنا عايزين نعمل تطابق بين الرؤيتين
لميس الحديدى: دكتور د/سعاد واضح ان فى اختلافات بين اهداف بالرغم ان الهدف الاساسى لكل واحد مجتمع افضل مجتمع صالح مجتمع كل الحاجات الكويسه اللى فى لكن واضح ان احنا عندنا اختلاف فى الادوات
د/سعاد صالح: انا بقول الوعى اولا يا استاذة الوعى قبل القوانين وقبل التجريم لان الناس بتشعر بان التجريم وباى قانون انوا بيملى عليه من الخارج احنا المفروض يعنى نعمل اعلام مكثف عن طريق وسائل الاعلام المختلفة واساتذة الدين وعلماء الاجتماع وعلماء النفس ان احنا نروح لهؤلاء الناس ونبين لهم خطورة هذا الموضوع او ايجابيته او سلبيته
لميس الحديدى: طيب انا بشكركم اتفضلى يا سيادة الوزيرة
مشيرة خطاب: اولا يا دكتورة د/سعاد المؤسسه الدينيه ايدت جميع التعديلات فى قانون الطفل ولا يوجد نص فى شبهة مخالفة الشريعة الاسلاميه دا كلام يعنى مفيش فى اى جدال النقطة اللى حضرتك اثرتيها اولا هى الطفل يبلغ عن اهله الفكرة انوا لما بيبلغ عن اهله بيحصل ايه ما بنخدش الاهل نوديهم قسم الشرطة لكن بيحصل جلسات ارشاد اسرى لتوعية الاسرة لتوعية الاهل فاحنا معندناش هوجة الفضايح وان احنا نسحب الطفل بره الاسرة بالعكس دا من احد المبادىء اللى بيقوم عليها القانون حق الطفل فى ان يحيى داخل اسرة متماسكة متضامنه تكفل له الحمايه من شكل من اشكال العنف ولو فرض ان حصل اى خلاف بيروح للجنة الحماية وهى لجنة توثيق على مستوى الحى يعنى زى ما بنقول كبير الحى دى نقطة النقطة التانيه اللى قالتها الدكتورة هدى وكلامك مهم قوى اداء الاسرة المصريه المتدنى دا اول مهمة من مهام الوزارة الاسرة والسكان تمكين الاسرة انها تقوم بدورها ايه دور الاسرة ؟ انوا كل فرد من افراد الاسرة يحصل عل حقوقه النقطة التانيه ان المؤسسه الدينيه انا مش محتاجة اقنعها المؤسسه الدينيه فى صف هذه الافكارانا مقتنعه انتى لما يجيلك واحد يطلع من هنا ولا من هنا دا طبيعى يا جماعه ما نتوقعش ان المؤسسه الدينيه كلها صوت واحد لا المؤسسه الدينيه فىا اراء مختلفة انما انا لو خد المؤسسه الدينيه الرسميه المؤسسه الدينيه الشعبيه اللى ليها مسانده انجاز
لميس الحديدى:اخر دقيقة اهم عقبة امامك ؟
مشيرة خطاب : المفاهيم وبعدين المثقفين يحطولى مشكله المثقفين بيحطولى مشكله انهم بيتبرعوا باراء بعض المثقفين انا مش بعمم بعض المثقفين بيتبرعوا باراء ممكن تدمر زى اللى بيدافع عن عمالة الاطفال ويبررها بانها بتكافح فقر الاسرة عمالة الاطفال بتكرس الفقر بتكرس استغلال الاطفال بتكرس الزيادة السكانيه غير المحموده بتدمر كل الشغل بتؤدى الى بطالة الكبار الدولة النهاردة وهى مهمومة ببطالة الشباب مش قادرة تبص على عمالة الاطفال اللى بتكلفنى يوميا 28 مليون جنيه على التقديرات
لميس الحديدى : لو عندك 3اولويات بتحطيها قدامك فى الفترة القادمة هى ايه ؟
مشيرة خطاب:اولا الارتقاء بالخدمات المقدمة للاسرة من اجل تحديد او تنظيم الاسرة حركة شعبيه مش عايزة اقول حمله اعلاميه حركة شعبيه مستنيرة لمساعدة الاسر الضعيفة انها يبقى عندها تطلعات يبقى عندها طموح دور قوى للمجتمع المدنى مزيد من التنسيق بين الجهات الحكوميه الجهات الحكوميه لازم تتكلم كلها بلغة واحدة فى النهايه عايزة اقول بصوا لخطاب الريس فى المؤتمر القومى للسكان ولكل مجتمع مدنى وحكومة نلتزم بتنفيذه وانا بقول هو كان عنده رؤيه وهو بينشا هذه الوزارة والخطاب بتاعه فى المؤتمر هو اللى بيورينا الرؤية الاسرة ومن الاسرة الى السكان
لميس الحديدى:اشكرك شكرا جزيلا الوزيرة د/مشيرة خطاب كالقابضه على الجمر كما قالت الدكتورة هدى زكريا القابضه على الجمر يعنى دى ماسكة قطعه من الجمر فى يديها وهى فعلا قابضه على الجمر تغيير المجتمع شىء صعب جدا تغيير المجتمع مهمة جهاديه هل سنتمكن من تغير المجتمع ؟ هل سنتمكن من تنوير المجتمع ؟ مصلحتنا كلنا اننا نكون جميعا فى قارب يصل بينا الى السلامة وليس قارب يغرق وكلنا شركاء فى هذا اشكركم شكرا جزيلا هذه الحلقة وهذه لميس الحديدى تحييكم وتصبحوا على خير