في دايرة الرحلة (9) : دليلك لاختيار «هوستل» مناسب ! ...

كتير سألوني في الأسابيع اللي فاتت ازاي يختاروا مكان كويس وتكلفته مناسبة للإقامة، وكنت تناولت موضوع الإقامة دا في مقالين قبل كدا، واحد عن الإقامة الرخيصة جدا، وواحد تاني عن مستوى أعلى شوية وانسب للعائلات والمتزوجين والبنات وكدا لكن ناس كتير قالتلي انهم بيدخلوا على المواقع الي أشرت عليها وبيتوهوا ومبيعرفوش يختاروا إزاي فعشان كدا قررت في المقال دا والقادم بإذن الله، اتناول بشكل أعمق عملية اختيار مكان إقامة كويس وسعره مناسب، والنهارده هكلمكم عن إزاي تختار أفضل هوستل تقيم فيه وانت مسافر وإيه المعايير الواجب توافرها في الهوستل دا...
معايير الاختيار
قبل ما نقول ازاي، لازم نحدد المعايير اللي على أساسها بنقيّم «الهوستلز» وناخد قرارنا بالإقامة فيه، ومن التجربة والبحث أهم معايير واجب توافرها في أي هوستل عشان نقيم فيه هم:
-التقييم العام (ازاي تشوف وتقرأ التقييمات الموجودة)
-ميزانيتك (عندك استعداد تدفع أد إيه، كله بتمنه)
-الأمن (هل تثق في إنك تسيب حاجتك فيه؟ هل الحي آمن؟)
-المكان (قربه وبعده من مركز المدينة ومسافته من المواصلات العامة)
-النظافة
-المميزات (فيه انترنت؟ فطار؟)
الويب سايتس اللي هندور جواها ونشوف معايير الاختيار دي هي الموقعين الأشهر في عالم الهوستلز hostelworld.com و hostelbookers.com، هم متشابهين بس فيه شوية فروق أحيانا في السعر، وأغلب الهوستلز عليهم واحد بس تقييمات الناس مختلفة فمهم تبص في الاتنين ..
**اعمل أكونت على ال2، ساعات بيدوا عروض كويسة للأعضاء ، والأكونت ببلاش..
التقييم العام:
دا الفلتر الكبير اللي بعد ما تستخدمه وتشوف اللي هيعدي منه تبدأ بقى تشوف الباقي..
قراية التقييم العام بقى دي عايزة خبرة وليها أكتر من نقطة مهمة تاخد بالك منها:
أول حاجه في الموقعين انت بتختار البلد والمدينة ومدة الاقامة وعدد المسافرين وبتدوس سيرش، هيفتح لك صفحة فيها كل الهوستلز
تاخد بالك من حاجتين بقى ساعتها:
الويبسايت نفسه عامل لك recommendation لكام هوستل عادة بيبقوا حلوين ومشهورين بس عادة برده بيبقوا غاليين شوية، فحطهم في اعتبارك لكن حط في بالك ان مش شرط تختارهم خالص يعني :

المهم، هتلاقي على الشمال معايير الفلترة بقى اللي تسمح لك تحدد معاييرك في الاختيار:

هتلاحظ إني اخترت في التقييم العام 72% فما فوق، دا أول وأكبر فلتر.
تاني نقطة بقى تركز فيها أوي أوي عشان متنخدعش في رقم التقييم - number of reviews - لأن احيانا بتلاقي هوستلز واخد 90% و 100%، وتكتشف إنه تقييمين بس بالكتير، وطبعا عدد الreviewers بيعكس شهرة المكان، بشكل عام متبصش على هوستل عليه أقل من 500 ريفيو مثلا..
الميزانية:
تاني فلتر كبير بعد التقييم العام، الميزانية يا كبير..
في نفس معدلات التقييم اللي فوق تقدر تحدد سعر الفرد حوالي كام، مفيش أرقام محددة أقدر أقولهالك لأنها بتفرق كتير من بلد للتانية، بس بشكل عام يعني أنا بحط سقف 30 يورو بصراحة، لأن بالنسبة لي الإقامة هي نوم ومكان أشيل فيه الشنطة فمعنديش استعداد ادفع كتير، وعادة كمان أقل من 30، بس حسب المكان برده والموسم اللي مسافر فيه.
شوية نصايح لتقليل السعر:
-سافروا 4 ، دا الرقم المثالي ، الأوضة البرايفت ال4 هتديك أرخص سعر للفرد.
-اقعد في Dorm، الدورم هو الغرف المشتركة اللي فيها من 4 ل 8 سراير بدورين، طبعا الخصوصية أقل كتير لكن السعر أقل كتيييييير.
-ودي نصيحة أخوية بقى، حاول لما تقرر، تدور على contact info للهوستل وحاول توصل للناس نفسها وتكلمهم وممكن أوي تطلع باسعر اقل بشكل مباشر منهم!.
-campsites ، أول ما تشوف كلمة Camping أو camp قبل اي هوستل افتكر نصيحة النافاراي :
لا تقربوهن يا أناندا.. لاتلمسوهن يا أناندا، وإذا كلمتك إحداهن فلا تردن عليها يا أناندا
حسب اختياراتك بقى اختار من على اليمين نوع الغرف اللي عايزها وكدا عشان تقلل العدد اللي بتبصله..
دلوقتي ممكن تبقى قادر تحدد 4-5 هوستلز تبص عليهم، وهتلاقي بالنظر ممكن يقلوا ل 2-3 كمان لأنك هتلاقي شوية منهم أسعارهم أعلى مانت عايز أو مفيهمش غرف فاضية من النوع اللي انت عايزه في الفترة اللي بتدور فيها.

قبل ما ندخل على باقي العوامل وتحليلها، فيه شوية قواعد مهمة لازم تعرفها وانت بتبص للتقييمات:
- لما تبص هتبص على حاجتين، النسب بتاعت التقييم اللي هي % و الreviews بتاعت الناس.
- عادي إنك تلاقي negative review، مفيش مكان perfect.
- الreviewers بيتقسموا لأنواع برده، على «هوستل وورلد» رأي الavid travelers والglobetrotters هو أهم آراء، الباقي مبتدئين سافروا مرة ولا حاجة فاحيانا كتير رأيهم مبيكونش موضوعي.
- «هوستل بوكرز» أصيع في الحتة دي، عامل تقسيمة للreviewers تديك رؤية أدق.
- لاحظ كويس التعليقات اللي بتتكرر كتير، الحلوة والوحشة، كل ما التعليق كان متكرر كل ما كان حقيقي، وكل ما كان نادر كل ما افكسله عادي ممكن تجربة فردية أو واحد بيتفزلك.
- ركز على التقييمات اللي في آخر 6 ل 9 شهور.
الأمن:
نقطة الأمن مهمة جدا عند أغلب الناس الي أعرفهم بيفكروا يسافروا، وأكتر حاجه بتخوف الناس من تجربة الهوستلز هي الأمن، وهو زي أي فندق فيه درجات مختلفة من الأمن حسب المكان والسعر طبعا، طيب إزاي نقيم الأمن في الهوستل؟
عندك أكتر من مؤشر:
أولا: تقييم الSecurity العام على الويبسايت..

لما تخش على أي هوستل في الموقعين، هتلاقي فوق ratings محطوطة بشكل عام، من ضمنها الsecurity، دا أول مؤشر بالنسبة لك، من التجربة فوق ال75% لأي ريتنج هو رقم آمن ولطيف بس عادة في الSecurity بدوّر على فوق ال80%.
تاني مؤشر بقى إنك تبص على الreviews وتشوف بنفسك تعليقات الناس، هتلاقي دايما حد بيتكلم عن الأمن سواء كويس أو وحش، بس زي ما قلت، في إنك تقيم الكلام اللي قدامك حسب المفاتيح اللي اديتهالك فوق.
اتأكد ان فيه lockers في المكان، دي هتشوفها في الريفيوز برده، وفي صفحة اسمها Facilities في هوستل وورلد وهتلقيها على الشمال في بوكرز دور فيها على lockers، بس نصيحتي شوف الريفيوز لان ساعات بيبقى مكتوب لوكرز وهو مفيش!.

المكان قربه وبعده من مركز المدينة ومسافته من المواصلات العامة
المكان أحد المعايير المهمة جدا جدا في تقييم الهوستل، مسافة الهوستل من مركز المدينة أو قربه من المواصلات العامة معيار مهم جدا.
بس خلي بالك، كله بتمنه، هتلاحظ دايما إن كل ما تبعد عن قلب المدينة، كل ما السعر هيقل جامد، فاحسبها وقرر انت عايز ايه.
لو عايز نصيحتي، في المدن الصغيرة، مفيش مشكلة تسكن بعيد شوية، في النهاية المدينة صغيرة، في فينيسيا كنا قاعدين في كامب على مسافة ساعة من فينيسيا تقريبا، ومفرقتش في حاجة لأننا الصبح بننزل بدري نروح ونلف وهي مدينة صغيرة فعادي.
لكن في روما لو سكنت بعيد، هيضيع منك وقت خرافي !. فقرر حسب ميزانيتك ووقتك.
تعرف المكان ازاي؟ في الموقعين هتلاقي خانة اسمها Map and direction دوس عليها هتلاقي شرح لمكان الهوستل وقربه وبعده من المدينة ومكانه على الخريطة، وعادة بيقولك كمان إيه المواصلات اللي تركبها من المطار عشان توصل الهوستل.
**لو مش واضحلك الشرح أو مكان الهوستل، Copy العنوان وسيرش عليه في جوجل Maps، وشوف المسافة بينه وبين محطة القطر الرئيسية في المدينة اللي انت فيها.
النظافة:
فيه cleanliness في التقييم العام ودا يديك رؤية معقولة، بس دي بالذات مش هتكتشفها صح غير من الreviews، الجزئية دي مهمة جدا، ركز أوي في تعليقات الناس على نضافة المكان والحمام بالذات، وتغيير الملايات والحاجات دي.
المميزات:
دي نقطة مهمة أوي، بس برده بتختلف من شخص للتاني، شخصيا، مهم أوي عندي توافر الحاجات دي في الهوستل :
-انترنت واي فاي مجاني.
- مياه سخنة في الدش وإمكانية الدش طول الوقت (آه، مش دايما متوافرة).
-vending machine أو مكنة قهوة، ولو قاعد مدة طويلة يفضل يبقى فيه مطبخ مشترك (انك تطبخ لنفسك هتوفر كتيييييير لو قاعد مدة).
فيه مميزات تانية لطيفة تختلف أهميتها من شخص للتاني زي مثلا common room وlaundry واحيانا خرائط للمكان، وبعض الهوستلز بتوفر free tours (لو لقيتها ارشق وش!).
ملحوظات عامة عشان متلبسش في الحيط:
-شوف مواعيد الcheck-in and out وقارنها بمواعيد سفرك عشان متروحش وتلبس في الحيط.
-اتاكد إن مفيش curfew، بعض الهوستلز ليها مواعيد لازم تبقى برا أوضتك او مينفعش ترجع متأخر مثلا.
-خد معاك ملاية واحدة بيضا وفوطة. Just in case
في الهوستل مفيش ضمانات، ممكن جدا تعمل كل دا وتروح تلاقي «الهوستل» زبالة، نصيحتي ليك، دايما اعمل backup plan، ولو رحت معجبكش، امشي على طول، في داهية شوية الفلوس الزيادة اللي هتدفعها، راحتك وأمنك أهم من أي فلوس.

تابعوني على نوّرني:
http://www.nawarny.com
تابعوني على فيسبوك:
http://www.facebook.com/ze3r0
تابعوني على تويتر:
http://www.twitter.com/NourEldin_z3r0