في دايرة الرحلة (8) : وانت مسافر، خليك في الأمان !

الأمان نقطة مهمة لازم تاخد بالك منها وانت مسافر، في النهاية انت غريب في بلاد غريبة،أنا مش من أنصار الهيستيريا في الموضوع دا، لكن قدر معقول من الحذر والاحتياط مطلوب و الاحتياط واجب يعني زي مانتوا عارفين، وكل ما تحس انك مستعد لأي ظرف، كل ما هتقدر تنبسط وانت مرتاح ومش قلقان، بس خليني اطمنك برده، انت من مصر،يعني ميتخافش عليك!...
قواعد الأمن ال5 :
- اعرف رايح فين واسأل عن المنطقة كأنك هتعيش فيها.
- ورقك يبقى 100 نسخة.
- خلي شكلك ابن بلد ومدقدق.
- حرص ومتخونش.
- متأفورش!
اعرف رايح فين
لما تكون مسافر، اقرأ بشكل عام على مستوى الأمن في البلد اللي رايحها، وإيه أنواع المخاطر اللي تاخد بالك منها، لأن كل منطقة بتكون مشهورة بحاجات معينة، ابحث على النت على safety travel Paris مثلا وقلب شوية هتلاقي معلومات عامة، افتح مواقع الهوستلز وشوف في الريفيوهات والكلام عن المناطق..
بشكل عام أشهر "الأخطار" في أوروبا هي السرقة (النشل)، و القلق من المشي بالليل في بعض المناطق (خاصة حول محطات المترو الرئيسية)، و طبعا بعض المناطق اللي بطبعها قلق بس انت متعرفش عشان سائح!.
زي ما قلتلك سيرش على الانترنت بشكل عام، بس عشان أساعدك برده، موقع The Virtual Tourist - ودا موقع جميل جدا لمعلومات السفر بالمناسبة هرجع أشرحه في وقت تاني – فيه قسم عن أشهر الأخطار في كل مدينة بتصويت المشاركين و تعليقاتهم:
في البحث اكتب المدينة ودور عليها، وليكن مثلا Barcelona (هتكتشف ان فيه أكتر من مدينة اسمها برشلونة هنختار اللي في اسبانيا):
هتلاقي معلومات رائعة بالمناسبة، بس اللي يهمنا هنا اللي تحت More الاتنين اللي متعلم عليهم دول "المخاطر، وخدع السياح".
هتلاقي معلومات مفيدة وصور وريفيوهات ناس وحكاوي عن تجاربهم، ونفس الكلام في قسم خدع السياح، خد فكره واقرا شوية.
وعندك برده Frommers من مواقع أدلة السفر الكبيرة، سيرش على اسم المدينة وكلمة safety، يعني rome safety ، هتلاقي القسم المختص بالأمن والصحة اقرا فيه برده...
وطبعا مينفعش نتجاهل السايت المهم جدا TripAdvisor اللي هنرجعله برده في أوقات لاحقة، ولأنه موقع كبير لازم تدور صح عشان توصل، اكتب كدا في البحث عشان تلاقي الجزء اللي بتدور عليه "paris health & safety" مع استبدال باريس بالمدينة، بيجمع آراء ملايين حول العالم في النقطة اللي بندور فيها دي...
ونقطة مهمة تانية، لو حصل لا قدر الله محاولة سرقة اكراه، متعملش فيها أحمد السقا، سيبه، حياتك أهم من أي حاجة..
ولو عامل تأمين سفر (انصحك تعمله، بيبقى مطلوب شرط للفيزا اصلا) بجد في داهية أي حاجه التأمين هيغطيه...
ورقك يبقى 100 نسخة
لازم دايما يبقى عندك نسخ متعددة من ورقك المهم:
-باسبورك
-تذاكرك
-حجز الفندق أو الهوستل
-كريدت كرد
خلي دايما نسخ كتير، نسخة في جيبك، نسخة في كل شنطة، نسخة في الفندق، صورهم بموبايلك، صدقني هتقدر أوي النصيحة دي لو ضاع منهم أي حاجه لا قدر الله...
ونصيحة كمان من أخوك، خلي الصور دي على الإيميل، عشان تقدر توصل لها من أي حتة حتى لو موبايلك ضاع لا قدر الله، ودول أهم من الصور العادية لأنهم صور طبق الاصل ملونة غير التصوير الورقي...
ونصيحة تانية من أخوك، قبل ما تسافر، اعمل كارت معاك للطوارئ، فيه النمر المهمة، المطافي الاسعاف البوليس السفارة، أي أرقام مهمة فالبلد اللي مسافرها يمكن تحتاجها...
خلي شكلك ابن بلد ومدقدق
نقطة مهمة أوي أوي، ميبقاش شكلك كدا:
شكلك لما يبقى سائح بوضوح زي البرنس دا، انت بتعلم على نفسك يا بوب، بتبقى هدف لكل حرامي في المنطقة، حاول تتخيل العكس، حاول تتخيل ولاد البلد هنا لما بيشوفوا حد سائح هنا بيحصل له ايه، هدف رئيسي للنصب والسرقة، شوف الناس في البلد دي بتلبس ايه والبس عادي متبقاش مستفز ومش لازم الكاميرا العظيمة تبقى متشعلقة في رقبتك، حطها في شنطة ولا حاجه، وطبعا مش هقولك الكلام المعتاد، متلبسش مجوهرات ولا ساعة غالية واضحة. وحاول تتعلم كام جملة من الرئيسيين بلغة البلد عشان تعرف تتعامل بسهولة ومتبقاش مفضوح أوي...
باختصار متعلمش على نفسك عشان متبقاش هدف سهل...
حرص ومتخونش
اشتري قفل رقمي صغير وقفل بيه شنطتك:
ونصيحتي، اشتري 2 واقفلهم ببعض
اشتري money belt، أو المتعارف عليه هنا بحزام حجاج:
بس اللي تحت الهدوم، اللي بيبقى باين برا دا بيعلم عليك إنك سائح وبيعرف كل الناس فلوسك فين!، نصيحتي، شيل شوية فلوس في جيوبك عادي للاستخدام، والباقي في الMoney belt، عشان يبقى شكلك عادي مش مفضوح، ونصيحتي حط محفظة في جيبك (فاضية) من أي نوع عشان يبقى شكلك عادي...
باختصار، زي ما قلنا، حرص ومتخونش..
وأخيرا..
متأفورش!، انت من مصر يابا...
السائح الأوروبي مبالغ فيه، وخواف شوية، لما تيجي تدور على روما مثلا، هتفتكر ان الموضوع رعب، سرقة ونشل و بدرجة عالية في كل مكان، لكن من التجربة، صدقني، احتمالية انك تتسرق في مترو في روما زي احتمالية انك تتسرق هنا، المصايد اللي بتتعمل للسياح، نفس جو البياعين الجائلين هنا وجو خد فكرة يا باشمهندس ويديك أسعار مبالغ فيها عشان من السواح وكدا، مش حاجه متعرفش تتعامل معاها يعني...
وخلي بالك إن الأمن مينفصلش عن الصحة، خد معاك مضاد حيوي والأدوية الرئيسية، بانادول و حاجه للمعدة إلخ إلخ..
وكالعادة مش هسيبك غير بمصدر تاني لو عايز تقرا، صفحة متخصصة في الكلام عن أمن السفر ، فيها كمية معلومات خرافية عن كل حاجه من أول أمنك في الطيارة لغاية تعمل إيه لما الكاميرا بتاعتك تضيع...
من الآخر، خد بالك وحرص واعمل كل احتياطاتك، لكن متأفورش عشان انبساطك ميتأثرش، دور كويس وحضر نفسك لسيناريوهات ضياع أي حاجه، وربك كريم يعني...
تابعوني على تويتر:
http://www.twitter.com/NourEldin_z3r0
تابعوني على فيسبوك:
http://www.facebook.com/ze3r0