وشوش

حاجة غريبة أوى بقيت طبيعية و كلنا أو معظمنا ما شاء الله بنعملها , إنك تتعامل مع الناس بشكل و أسلوب معين و شخصية غير طبيعتك , و بتتعامل مع قريبك أو القريبين منك بأسلوب تانى خالص.
أنا عن نفسى كنت لما بتعامل مع حد غريب أو الناس فى مكان عام بكون صبور و هادى , و فى البيت أوقات كتير بتعصب .. و بتخانق معاهم لأقل مشكلة.
و كمان بتلاقى نفسك عايش فى أحلام و طموحات جميلة جدا بس مش بتفكر ازاى تحققها أو مش عارف طريقة إنك تحققها ,و فى نفس الوقت مش بتقدر تبوح بأحلامك و طموحاتك قدام الناس .
و عشان نعرف نحلل الأمور دى لازم نشوفه من كل الزوايا , بس أنا أقدر أول ان فى سببين هما الأهم فى مشكلة الازدواجية دى :
1- الاحباط اللى بنعيشه كل يوم …
2- غياب الثقة فى النفس اللى تخليك تحارب عشان حلمك …
كل واحد فينا عايش بوشوش بيغيرها على حساب الموقف و المكان و الاشخاص اللى حوليه , يعنى الناس اللى عندهم شخصية تانية مع القريبين منهم غير الشخصية اللى بتكون قدام الناس , و ممكن ده يكون سبب أساسى إن الناس فى مجتمعنا بتتدخل فى الأمور الشخصية بشكل كبير أوى , و تلاقى أى حد يعمل حاجة لازم يقدم مبررات لنا حتى لو كانت مش بتمس الناس بحاجة , فعشان كدة كل واحد بيحاول يخترع وش و شخصية مختلفة قدام الناس عكس حقيقته عشان محدش ينتقده و يحس انه نكره أو غريب عن الناس دى , و ممكن يعمل كده مع القريبيبن منه عشان ضامن إنهم مش
حينتقدوه أو بمعنى تانى هيستحملوه , بس السؤال هنا مفكرش ليه انه يكون على طبيعته و الناس ترضى بيه و تتعامل معه بعيوبه , لآن العيوب كدة كدة بتظهر فى اى لحظة غضب او فى وسط الكلام .
لآن بالبلدى كدة " الطبع يغلب التطبع " …… و محدش يفتكر إن الوش اللى لبسه ده بيغطى عيوبه؛ لان للآسف و انت مش حاسس الوش ده بيكون شفاف و بيبن منه انت ايه فى الحقيقة …
أما بالنسبة للناس اللى مش بتقدر تتكلم عن أحلامها و بتفضل عايشة فيها لوحدها , زى ما قلة ده ممكن يكون سببه الاحباط اللى شايفينه و عايشين فيه و قلة فرص النجاح فى اى حاجة , فتتحول الاحلام الطموحة لآحلام يقظة و تبقى مجرد حيلو دفاعية لتفريغ شحنة الانفعالات السلبية , مع انها ممكن تكون أحلام من حقك تحلم بيها و مشروعة و سهل انك تحققها .. بس مع شوية تعب .
بس بالرغم من كل ده الحل بسيط أوى , إنك تتحرر من كل القيود الى بتقيدك و تواجه نفسك بشجاعة و تتصالح معاها و تعرفها على حقيقتها من بمميزاتها و بعيوبها من غير تدليل أو جلد للذات , بعد كدة اخرج للناس بالروح دى و اتصالح معاهم , هتلاقى نفسك مش محتاج تخبى حاجة او تلبس وش , لان كل واحد ليه مميزاته و عيوبه , بس السؤال هنا أنا بركز على إيه عيوبى وله مميزاتى !؟
متفتكرش انك ممكن تبقى أقل من أى حد لآن مفيش بنى أدم من غير عيب , و لو قارنت على حسب اللى انته شايفه يبقى بتظلم نفسك , لانك متقدرش تعرف غير اللى عينيك شايفاه و عينيك مش بتشوف كل حاجة , و الأهم من ده لازم يبقى عندك ثقة فى ربنا و إنه مبيديش حد أكتر من حد .
بس بيبجى عليك وقت و تحس اننا عايشين فى مسرحية , و بنمثل على بعض , بس الفقره و الكوميدية فى المسرحية , اننا عارفين كلنا اننا بنمثل على بعض و ان دى مش حقيقتنا .
بس حقولك نصيحة , الحياة البسيطة اجمل و اكتر حرية , و احسن لما افكر كل يوم انا حلبس وش ايه
ينفع اتعامل بيه … و ابقى مكسوف او اتعصب او ابقى فى نص هدومى لو عرفت انى نسيت البس الوش و مجبتوش معايا , عيشها ببساطة احسن حتلاقيها جميلة و على رأى مكى " متحولش تبقى حد تانى غير نفسك " .