زميلك وحبيبك.. الاتنين أغراب وما فيش ليهم حقوق عليكِ

أولاً أحب أشكركم على الموقع الجامد ده.. أنا بحب واحد أوي وهو كمان ويمكن أكتر مني؛ بس المشكلة إنه مش عاوزني أكلّم أولاد خالص.. وبحكم إنه في جامعة تانية؛ فهو مش بيبقى عارف أنا باكلّم أولاد ولا لأ.
وأنا فعلاً سمعت كلامه وبطّلت أكلم أي أولاد خالص عشان مش أبقى باعمل حاجة من وراه.. وحصل شوية مشاكل كده خلتني اتعرفت على واحد معايا في الكلية.. الولد ده عادي جداً بالنسبة لي؛ بس هو دايماً بيقول لي إنه بيستريح أوي لما يقعد معايا، وتقريباً بيحكي لي على كل حاجة في حياته، ولما حسيت إنه ممكن يكون متعلق بيّ عرّفته إني بحب واحد تاني، وقلت يمكن يكون ده سبب إنه مش يكلمني تاني لأن كلامي معاه بيتعب لي نفسيتي أوي، وضميري دايماً بيوجعني إني مخبيّة على حبيبي إني باكلّم واحد تاني.
بس للأسف، لما عرف ده ما غيرش حاجة غير إنه شالني من دماغه؛ بس برضه بيتصل بيّ كتير وبيطلب كتير مني إنه يشوفني أو إنه يقعد معايا.. أنا باتكسف أوي إني أحرجه؛ بس برضه بابقى متضايقة أوي من نفسي مش عارفة أعمل إيه عشان مش أكلمه تاني وفي نفس الوقت ما يحسّش إني بعته زي معظم الناس اللي عرفهم؛ كانوا بيعملوا معاه مواقف كانت دايماً بتحسسه إن الناس كلها بتبيعه.. أنا خايفة يحس إن أنا كمان مش كويسة وبِعته، وخصوصاً إنه بقى بيساعدني كتير في الدراسة.
أنا بجد بدأت أكره نفسي بسبب كلامي معاه.. يا ريت تقولوا لي طريقة أوصّل له بيها إننا مش نتكلم تاني؛ بس من غير ما أجرحه لأني بجد حاسة إني باخون حبيبي ده وميرسي جداً.
toto

لو عايز تفضفض لنا دووس هنا