أولاً باشكر "بص وطل" جداً لأنه موقع رائع.. ثانياً مشكلتي ملخبطة شوية، بس حاولوا تفهموها معايا؛ أنا ليّ صديقة بحبها أوي، بتحب واحد بيعمل حاجات غلط كتير وحاجات بشعة وحرام، بس هي بتموت فيه غصب عنها؛ لأنه مستواه عالي، وفي مرة بعتّ لأصدقائي أدعية دينية، فكلمني وقال لي اتأكدي من الرسالة دي وكده، وبعدين اتأكدت وقلت له إنها صحيحة، ومن هنا بدأ الكلام، وبعد فترة تقريبا بقينا أصدقاء وبنتكلم كتير، وفي مرة صاحبتي قالت لي على الإيميل وقالت لي إنه ده إيميل حبيبها، أنا ما قدرتش أقول لها إني باكلمه علشان ما تتضايقش. بس المشكلة دلوقتي إنه أنا غيّرته كتير للأحسن؛ الحمد لله تاب وبطّل يعمل المحرمات والكبائر، وبقى بيصلي وبطّل سجاير وطلع عمرة... وبقى شخص تاني خالص، مش هانكر إني لما عملت كده اتعلقت بيه وهو اتعلق بيّ، وخايفة أقول له إني أنا صديقة البنت دي يفكّر إني كنت متفقة معاها عليه، وكمان خايفة لو قلت له إنه يتغير تاني.. أنا عارفة إنه صعب أرتبط به؛ لأني ما قدرش أخسر صديقة عمري حتى لو على حساب قلبي، بس أنا مخنوقة أوي، ومش عارفة أعمل إيه؟!!