حنان الجوهري تكتب: سنعيدها سيرتها الأولى

حنان الجوهري
ألو.. ألو واحد اتنين تلاته
سأ سأ.. أيون أيون
باجرب أيدى في الكتابة.. بقى لى كتير ما كتبتش حاسة أنها صدت من كتر كتابة الأخبار الناشفة بتاعه صرح وأشار وأضاف على أن البلد آمنة من أي غزو فضائى وأن كيلو السكر هيفضل بعشرة جنيه وما فيش أي زيادة فيه أومال؟؟ هى الوزارة بتلعب أهم حاجة المواطن يتطمن إنه كله متوفر وكله هيبقى حلو.. حلو قوي ويقوم الوزير ملعب حواجبه وهو بيقول حلو قوي.
خايفة جدا من الكتابة
مش عارفة أكتب أزاي؟ بجد والله حاسة إنى هاتحاكم من الناس لما تقرا لى ولازم يبقى على مستوى كتابة زمان أيام الطققان واللسعان خاصة وإنى اتغيرت وهديت ونوع الكتابة كمان اتغير حيث إنى أباشر الكتابة متنقلة على زراير الكيبورد.. لعن الله التكنولوجيا عندما تبعدنا عن أشيائنا الجميلة.. مش قادرة أنسى شكل الورق الدشت منه والفولسكاب ولا ريحته اللى كلها جاز خاصة الدشت نفسى أرجع أكتب تانى زى زمان بكل أجوائها بكل أصحابى اللى كانوا بيقروا معايا فقرة فقرة ونحكى ونهزر ونرجع نكتب.
خايفة من الكتابة زي واحد كان مقضي حياته كلها قدام الكاميرات وواخد على الإضاءة والاسبوتات وبعدين فجأة اعتزل من نفسه ورجع تانى مش مستحمل بقى أي نور أو حتى بطارية تضرب ف وشه.. خايفة جدا حاسة إنى بالين مفاصل أيدي أصل الكتابة الناشفة غير الكتابة الطرية.
مية فكرة جت لى ف ميت لحظة فى ميت مود ما عرفتش أو ما قدرتش أكتب مش عارفة ليه ما اتحمستش قبل كده زى انهاردة يمكن عشان فريدة بنتي نايمة ومقدار سخطى على نفسى وعلى الأيام دى عالي أوان محمد طارق عمل لى المدونة دى عشان بيحب يقرا لى؟ يمكن عشان الكتابة وحشتنى وان كل شوية ألاقى حد بيطلب أضيفه كصديق على الفيس بوك لأنه من المعجبين من أيام كتابات الدستور أو إنى انهارده بالصدفة داخلة اعمل سيرش على جوجل باسم حنان الجوهرى عشان أشوف أخبار ايه اللى نزلت لى ألاقى واحد كاتب بالنص فى أحد المنتديات: كان فيه كمان كاتبة جامدة قوى اسمها حنان الجوهرى بتكتب ومش عارف بطلت تكتب ليه؟ انهارده ده حصل بالصدفة.. يمكن كل الحب اللى بالاقيه الأيام دي من الناس اللى كانوا بيحبوا كتاباتي هو اللى شجعني اكتب الهبل اللى باكتبه ده دلوقت!
أكيد فيه ناس مستغربة أنا ليه بطلت أكتب.. أولا ظروف الجرنال والرؤية والتوجه اتغيروا وكده بقى.. ثانيا كتير كنت أبقى عاوزة أكتب بس ما فيش وقت أو مش ف الموود ومع الوقت.. اتعودت على عدم الكتابة بس أنا أهه رجعت أكتب ومن خلال حاجة موضتها بطلت - المدونات - بس أنا مصرة الناس تقرأ لى
هتقروا غصب عنكم
وأوعدكم المرة الجاية هيبقى فيه كلام أحسن ومكتوب أحلى ومحبوك مش زى المرة دي
لأنى ناوية ما أسيبكمش تفلتوا من أيدي
أنا كنت خايفة ف أول البوست دة و دلوقت لأ
بجد
أنتوا وحشتونى ... ههههههه حاسة إنى معبودة الجماهير هههههههههه
والله وحشتوني