شبح إنسان

يوم مشرق وجميل ولكنه ليس كباقى الأيام.. يقال إنه أسعد يوم فى حياة أى إنسان شاب كان أو فتاة ولكن لا أعلم لماذا لا أشعر بتلك السعادة.. نعم يرانى الكل سعيدة دائمة الابتسام والحديث عن الأحلام والحياة التى أتمنى أن أعيشها مع زوجى.. زوجى..هل قلت زوجى!!!!.
يالها من كلمة كبيرة أشعر أنها ثقيلة كذلك هل سأصبح زوجة لغيره؟؟؟؟؟......(وسط حاله من الذهول والشرود تطرق صديقتها باب غرفتها وتدخل وهى فى قمة سعادتها ولكن فجأه تراها دامعة العينين دون أن تفهم ما السر فى ذلك ليدور بينهما هذا الحديث:
سارة: معقول لسه فاكراه وبتفكرى فيه فى يوم زى ده ؟؟؟؟؟
سهى: وأنا إمتى كنت نسيته، إمتى غاب عن بالى، سارة إنت عارفة إنى لسه بحبه، وإن قلبى لسه بيدق عشانه
سارة: سهى النهارده فرحك إنت بتفكرى ازاى مش فاهماكى الحياة عمرها ماهتقف على حد كفاية كده بقى
سهى: حاولت وبحاول وبجد مش قادره، لسه جوايا لسه هو حلمى الوحيد بجد حياتى واقفه من بعده حتى لو النهارده فرحى زى مابتحاولى تفكرينى
سارة: هو نساكى وباعك.. واتجوز وعاش حياته عايزة إيه تانى؟؟؟؟
سهى: سارة إنت بتقولى كده بس لأنك مش فاهمه لا إنت فعلا مش حاسه.. ياسارة إنت أول واحد مناسب خبط على بابك وافقتى عليه واتجوزتيه.. مش هتحسى أبدا بنارى ولا بالألم اللى أنا حساه
سارة: كفاية بقى وهم وخيال أنا اخترت أكون على أرض الواقع ولا إنى أكون شبح إنسان زى ما أنا شايفاكى قدامى دلوقت.. كنت عايزانى أعمل إيه أفضل أحب 10 سنين وفى الآخر يجى يعزمنى على فرحه وأبقى مبسوطة .. فوقى بقى ياسهى زمن الحب ده خلص من زمان
سهى: زمن الحب خلص من زمان..!!!! على كده أنا فعلا شبح إنسان والأشباح دايما أموات.....مش بقولك حياتى واقفة من بعده مش مصدقانى.. ياساره عارفة يعنى إيه لما بحلم براجل بيكون هو.. لو اتمنيت أترمى فى حضن حد لازم يكون هو(تنهمر فى دوعها).. نفسى أسمع صوته بجد واتكلم معاه زى زمان.. أسمع منه بحبك لسه بحبه ياسارة ومش عارفه أحب حد تانى.
سارة: (تجلس بجوارها وتضمها لصدرها فى محاولة منها لتهدئتها)....والله حاسه بيكى وعارفه أد إيه إنت بتتألمى وأد إيه اتالمت قبل كده بس وبعدين لحد إمتى هتفضلى موقفه حياتك عليه لحد إمتى ياسهى.. دلوقت بقى عنده بيت وأسره وطفل كمان هتستنى كمان لحد مايجوز ابنه وإنت فى بيتك زى الشجرة بتدبلى وأوراقك كل يوم بعد التانى بتدبل ورقة ورقة.. هييجى يوم عليك هتبقى فيه لوحدك، سهى بجد كفاية كده حرام عليك نفسك وحرام عليكى أهلك قبل نفسك
سهى: ممسكة بهاتفها........................
سارة: هتعملى إيه وهتكلمى مين دلوقت مينفعش تكلمى يوسف (العريس) وإنت كده، إهدى الأول ياحبيبتى
سهى: (لازالت ممسكة بهاتفها وعينيها شاردتين)...... آلو
عمر: فى صمت وذهول
سهى : آلو........عمر
عمر: أكيد بيتهيألى دى فرحها النهارده ( يتمتم فى صمت ولا يجيب)
سهى: صمت ودموع
عمر: إنتى بجد هى أكيد أنا مش هتوه عن صوتك
سهى.....لسارة : لسه فاكر صوتى ياسارة لسه فاكره مش ناسيه.... وحشتنى ياعمر وحشتنى
عمر: (تنهيدة عميقة مليئة بالدموع)..... سهى ازيك
سهى: مش كويسة ياعمر وعمرى ماكنت كويسة غير، وأنا معاك قالولى كتير إنك نسيتنى وعشت من بعدى بس دايما كنت متأكده إنى مش بموت لوحدى..عمر أنت عامل إيه فى حياتك عامل إيه من بعدى، عامل إيه ياعمر.
عمر: عمرك ماغبت ثانية عن بالى كل حاجة حلوة بتحصل بتمنى تكونى جنبى وتشاركينى فيها وأى حاجة وحشه بيبقى نفسى أسمع صوتك أجرى عليك وارتاح فى حضنك، ما أنا عارف عمر ماحد هيحس بيا غيرك.. لسه بحبك يا سهى والله ولا لحظه نسيتك
سهى: (فى قمة فرحتها) يااااااااه كان فعلا نفسى أسمعها حاسه إنك بتدينى حياة تانية من جديد ومش عايزه أى حاجة تانى بعد كده مش مهم إنت متجوز مين ولا عايش مع مين ولا حتى أولادك من مين المهم إنى كنت صح إنك لسه بتحبنى.. عمر إنت بجد أحلى حاجة حصلتلى فى حياتى بس ربنا يسامحه النصيب خدك منى آه بس سابك فى قلبى لآخر العمر.. وعارفه مش هتنسانى.
عمر : سهى إنت مش النهاردة.. (ولا يستطيع اكمال الجملة (
سهى: أنا النهاردة..مش عارفة إزاى يا عمر بجد بس فعلا كان لازم أهرب كان لازم أحاول أنسى، وانا عارفة إن عمرى ماهنسى..عمر خد بالك من نفسك عشان خاطرى
عمر: إنتى هتقفلى
سهى: لازم نقفل ونكمل وناخد بالنا من نفسنا
وينتهى الحوار وتعود سهى إلى حالة الصمت والشرود من جديد ثم تقف لتعد حاجتها وتذهب إلى الكوافير مع صديقتها، ولكن فجأة تقف وتسأل سارة تفتكرى ممكن ينفع؟؟؟؟ سارة هو أنا ممكن أحب يوسف؟
ظلت تفكر كثيراً فى إجابة لسؤالها ولكنها لم تجد له إجابة.. لذلك قررت أن تتحمل نتيجة خطئها
سهى: سارة أنا مش هكمل
سارة: يعنى إيه مش هتكملى؟ ومش هتكملى إيه؟
سهى: مش هقدر أعيش مع واحد أنا مش حساه.. مش هقدر أخون "عمر".. ولا هقدر أمثل دور الزوجة الخاينة.
سارة: مش فاهماكى ياسهى إنت ناويه على إيه؟
سهى: (صمت وحيره) ثم تبحث عن ورقة وقلم وتكتب رسالة لوالدتها تخبرها بها أنها سافرت لإحدى أقاربهم وتطلب منها أن تسامحها على مافعلتها وأنها لن تستطيع أن تكمل تلك الزيجة.. ثم تغلق هاتفها
ساره: إيه اللى بتعمليه ده.. إنت اتجننتى؟ وأهلك ذنبهم إيه تحطيهم فى الورطه دى؟ إنت بجد أنانيه يا سهى وعمرى ماتخيلتك كده
سهى: أنا مش أنانيه إنت اللى مش حاسه ولا فاهمه حاجه..(صمت وحيرة ثم تفتح هاتفها مرة أخرى وتطلب يوسف)
سهى: يوسف إنت فين.. ممكن أشوفك دلوقت حالا؟
يوسف: فى حاجة حصلت؟
سهى: لازم أشوفك دلوقت؟
يوسف: خلاص هعدى عليكى فى البيت وأوصلك الكوافير ونتكلم فى طريقنا
سهى: لا نتقابل فى أى مكان بعيد عن البيت
يوسف: خلاص هستناكى فى الكافى بتاعنا
تغلق الهاتف مرتدية ملابسها وتضع الرساله التى كتبتها لوالدتها بجانب السرير ثم تنزل مسرعة وصديقتها دون أن يشعر بهما أحد.. تودع صديقتها ثم تذهب ليوسف.
يوسف: فى إيه يستاهل إنك تجيبينى فى وقت زى ده وبالطريقة دى؟
سهى: من غير مقدمات ولا كلام كتير أنا هوفر عليك وعلى التعب.. يوسف إحنا مش هينفع نكمل مع بعض مش هينفع نتجوز
يوسف: يعنى إيه مش فاهمك؟ وإمتى جايه تقولى الكلام ده؟ دلوقت ! ! ! !
سهى: (تضع خاتم الزفاف أمام يوسف) إنت محبتنيش ولا حتى حاولت تحببنى فيك بس ده مش معناه إنى كنت صح أو حتى بلوم عليك..لأ طبعا إنت حد كويس قوى وأنا بحترمه جدا بس كمان بحب حد تانى ومقدرتش آخد قلبى منه عشان أديهولك.. قلبى لسه ملكه يايوسف
يوسف: (فى صدمة وذهول) إنت فاهمه إنتى بتقولى إيه إحنا فرحنا بعد كام ساعة وإنت جايه تقولى قلبك وقلبه وأنا إيه؟ كنت بتلعبى بيه.. وافقتى عليه ليه من البداية.. جايه تصارحينى يوم فرحنا!!
سهى: (صمت ودموع(
يوسف: بس على قد ما أنا مصدوم فيكى ومنك ومن موقفك بس ده ميمنعش انى احترمتك اكتر واحترمت موقفك ده بس كان لازم الكلام ده يحصل من زمان... أنا مليش ذنب فى كل ده ولا فرحة أهلك وأهلى اللى هتكسريها
سهى: عارفه إنى غلطانة بس فعلا كان غصب عنى أول ماقدرت أواجه نفسى بالحقيقه صارحتك...آسفة يا يوسف مع إن الأسف ملوش مكان بينا دلوقت.
يوسف: (يضع دبلته بجانب دبلتها ويقف) ربنا يوفقك فى حياتك وتلاقى حد أحسن منى ومنه هو كمان ويحبك بجد، ثم ينصرف.
سهى.: تأخذ نفساً عميقاً وتشعر أنها تحررت من قيودها ولا تفكر فى أى شئ سوى أنها تريد أن تخرج من الدائرة المغلقة.. تأخذ سيارتها وتسافر لقريبتها وفى الطريق تقرر العودة إلى عملها من جديد ولكن بعد فترة استجمام بعيدا عن كل الضغوط.
(أول يوم فى العمل بعد غياب)
سهى: صباح الخير وحشتونى ووحشنى المكتب والشغل.. إيه الأخبار أكيد الدنيا خربانة من غيرى
زملائها فى المكتب فى ذهول تام...... مين دى؟ دى سهى !!!!! سبحان مغير الأحوال.... نورت المكتب يا سهى إنت كمان وحشانا كلنا قوى من زمان كان نفسى نفسنا نشوفك كده (على لسان أحمد(
سهى: شكرا قوى يا أحمد.. نبتدى الجد بقى ونشتغل
يعود الجميع للتركيز فى عمله مرة أخرى ولكن أحمد مازال محدقا لسهى دون أن تراه.. وينتهى يوم ويليه الآخر والآخر وتمر الشهور ويبدو أن سهى بدات تعود لحياتها الطبيعية.. حتى يأتى نهاية يوم من أيام العمل ويتحدث إليها أحمد :
أحمد ... بحبك
سهى..."ابتسامه هادئة" نعم
أحمد... اللى سمعتيه
سهى... أكيد مكنتش بتكلمنى
أحمد... أكيد إنت مش غبية وحاسه اللى قلته ومن زمان
سهى..."تنظر إليه باستغراب شديد"
أحمد... ومتقوليش مش فاهمه
سهى... أكيد مش غبية بس إيه اللى خلاك تقولها دلوقت؟ إيه اللى اتغير!!!!
احمد... اللى اتغير إنى لقيت سهى اللى كان نفسى فيها بجد لقيت سهى اللى حبيتها واتمنيتها
سهى... ومش خايف إنها تتغير وترجع للدوامة تانى ؟؟؟
أحمد... لا أنا عارف إنك عديت كل حاجة فى حياتك ونسيتيها كمان وده اللى شجعنى إنى أتكلم دلوقت
سهى... مش عايزه أجرحك ولا عايزه أظلمك كفاية اللى جرحته قبلك.. بس أنا لسه عايشة فى الدوامة أنا متغيرتش ولا حاجة أنا لبست القناع وصدقته.. بس قلبى حالف عليه ما يحب غيره .
وتترك أحمد وتنصرف ويمر عام وراءه الآخر وسهى كما هى تمر حياتها بين العمل والتنزه مع الأصدقاء دون هدف أو أمل محدد حتى تعلم فى إحدى الأيام أن عمر انفصل عن زوجته فتشعر بفرحة لم تشعر بها منذ زمن طويل وتتمنى بينها وبين ذاتها أن يعود إليها.
تتصل بسارة صديقتها
سهى... "فى فرحة شديدة" عمر طلق مراته
ساره... "فى هدوء تام" من 4 شهور
سهى... 4 شهور وانت عرفتى امتى وازى مقولتليش؟؟؟؟
ساره... وهتستفيدى إيه نفتح الجرح القديم من جديد ونعد نعيط زى زمان
سهى... ومين قال إن الجرح اتقفل أصلا ياسارة
ساره... أنا بجد خايفة عليك
سهى... لو كنتى بتحبينى وخايفة عليه كنت عرفتينى
ساره... مكانتش هتفرق كتير انت عرفت دلوقت وهو طلق من 4 شهور... تفتكرى جيتى على باله فكر يكلمك كلمك هو ياسهى !!!!!!؟؟؟؟؟
سهى... "وهى تبكى" ياساره عمره ماهينسانى
ساره... بكره يتجوز تانى وترجعى انت تعيطى وتضيعى عمرك من تانى
ثم تنتهى المكالمة
وتمر أشهر عديدة وسهى تنتظر اتصال عمر ولكنها لازالت تركز على عملها وحياتها وأصدقائها.. وبعد مرور عام من الطلاق يدق هاتف سهى
سهى... آلو
عمر... عارفه انهارده عدت سنة وكمان عدى 8 سنين
سهى... معقول لسه بتحسب احنا بعدنا بقالنا قد إيه
عمر... لا... أنا كنت بحسب امتى هرجع تانى للحياه
سهى... وليه استنيت سنة!!
عمر... كنت مستنى اعرف اخبارك وحياتك يمكن يكون فى غيرى ساكن قلبك.... حبيتى حد تانى ياسهى؟؟؟
سهى... آه بحبك يا عمر
عمر... واستنيت سنه عشان اللى مقدرتش اعمله زمان اقدر اعمله دلوقت
سهى... اللى هو إيه ؟؟؟
عمر... معقول سهى مش فاهمه عمر !!!
سهى... تفتكر ان سهى دلوقت هى سهى ام المريله الكحلى ؟؟؟
عمر... يعنى ايه ؟؟
سهى... يعنى ايه اللى انت قلته بجد مش فاهماك !!
عمر... هو احنا كان ايه حلمنا ياسهى زمان ؟؟
سهى... زمان...كويس انك قلت زمان مش دلوقتى
عمر... واضح ان انا اللى مش فاهمك
سهى... ياعمر انت عارف بتكلم مين؟ عارف مين سهى دلوقت...عارف أنا حاسه بإيه وأنا سامعه صوتك دلوقت...عارف إنا ايه حصللى فى آخر 10 سنين دول....يااااااه 10 سنين يا عمر...8 منهم انت قضيتهم فى حضن واحدة تانيه.....
عمر... هو انت خلاص مبقتيش تحبينى؟؟
سهى... انا عمرى ماحبيت غيرك عمرى مااتمنيت ولا عشت لغيرك....مبحبكش!! الحب ده مش كلمة توصف اللى أنا حاساه ولا اللى بتمناه...بس كمان الحب ده مبقاش كفاية
عمر... مبقاش كفايييييييه !!!!
سهى... مبقاش كفايه ياعمر...اقولك!!! رجعلى عمرى رجعلى العشر سنين اللى فاتوا عوضنى عن كل ثانية فيهم.... رجعلى سهى يا عمر "وهى تبكى" رجعلى سهى أنا بجد مش لاقياها.. انت جاى كده بكل بساطه تقول هنحقق حلمنا هتحققوا مع مين ؟؟؟ انت مش فاهم حاجة ولا حاسس بحاجة... عارف يعنى إيه اتجوزت غيرى...عارف يعنى إيه ولادك ليهم أم غيرى ... عارف يعنى إيه بقالى 10 سنين وأنا دموعى سبقانى بتحاول تنام قبل عيونى...دموعى اشتكت منى ياعمر عارف ايه ولا ايه ولا ايه ولا ايه.... عايز تحقق حلمنا !!!! حلمنا ده انت روحت حلمته مع غيرى كملته مع غيرى وحققته مع غيرى.. جاى تقوللى مش فاهماك !!!!!!! أنا الوحيدة اللى فاهماك وحساك أنا الوحيدة اللى حبتك وبتحبك وهتفضل تحبك.
عمر... سهى بلاش القسوة دى أنا عمرى ماعرفتك كده أنا والله لسه بحبك
سهى... ولا أنا كنت استاهل كل اللى حصلى ده انا مكنتش بردو أستاهل منك القسوة دى... عمر أنا مش هقدر أكون بطلة لحلمك واصحى ألاقينى لوحدى من جديد.. عمر روح كمل حلمك مع بطلة جديدة أو احلم حلم جديد.. بس وحياتى اخرج من حياتى انا لازم أنساك.. أنا كمان من حقى أحلم حلمى وأعيش فيه.. عمر سيبنى وكمل حياتك..ومسيرنا نتقابل تانى وياعالم إيه راح يكون.