عاوز أعمل account علي الفيس بوك أضيف فيه كل الناس اللي أعرفها بس أصلي مش بحب أضيف حد أنا معرفوش هشيل خانة الديانة من الصفحة بس مش هنسي إني أختار إتجاهي السياسي كمان ممكن أكتب جملة ظريفة مكان خانة الديانة علي أساس إن الناس تاخد بالها يعني هكتب هواياتي كالتالي بحب أنزل وسط البلد من قبل ما أتولد وبحب أتمشي في شوارعها في الشتا وآكل آيس كريم كمان بحب إسكندرية في الشتا برضه.. ومش عارف إن كنت باكرهها في الصيف ولا لأ مش هنسي كمان أذكر تقليعة إني مش بحب الورد بالنسبة لصور البروفايل هيبقي قدامي حاجة من اتنين إما إني أحط صورة مناضل ثوري زي جيفارا أو حاجة بتعبر عني زي الملك محمد منير وطبعا مش هحط غاندي عشان محدش يفتكر إن عندي أنيميا أو سيد درويش ليفتكروني قديم جيفارا شكله ستايل وإما بقي إني اكتفي بصورتي وأبقي فخور بتنوع الصور اللي ربنا خلق بيها الناس اه.. نسيت إسمي هل هيبقي إسمي الحقيقي.. ولا إسم مستعار أو لقب؟ الرفيق مثلا، أو الفرعون الصغير، وممكن ابن النيل علي العموم أنا هكتفي بالمعلومات دي عشان مش عاوز الناس تعرف عني أكتر من كده ممكن لأني معنديش حاجه أقولها تاني هضيف أكبر عدد من البنات اللي عند صحابي علي سبيل الوحدة هدخل في جروبات كتير أوي معا لنصرة أي حد.. محبي السفير فلان الفلاني.. والمصري اللي علي حق يقول لمبارك لأ المصريين بيشجعوا وإحنا معاهم.. عاوزيين نجمع أكبر عدد من المشتركين علي الفيس بوك وهفضل مستني سبب التجمع هكتب كل يوم 48 status بمعدل واحدة كل نص ساعة.. وهنزّل كل يومnote .. وهعمل تاج لكل الناس وألزمهم إنهم يقروا قرآني المنزل ولو حد عملي تاج فيnote إما إني أخد جزء من اللي كتبه وأدخله في كومنت وأقول الله أو لو مش بحب الشخص ده أكلمه عن العمق هعتمد دايما في ال status علي الكلام الفارغ عشان محدش بعد كده يرضي يقراها غالبا هقول فيها الحاجات اللي بتعبر عني أو أقول اللي أثبت بيه إن أنا حد مثقف.. أو إني حد دماغ بيقول كلام محدش قاله قبل كده يوضح قد إيه هو شخصية تافهة هعرّف الناس باستمرار عن الحاجات اللي بعملها قاعد في البيت بسمع منير أو بتفرج علي فيلم تسجيلي بشرب حمص علي كوبري الجامعة، أو براد شاي في قهوة بلدي ومش هنسي أكتب طبعا.. إني في المظاهرات وبنضرب من عساكر الأمن المركزي كمان ممكن أنبه الناس كلها إني نازل وسط البلد.. وأكتب من الموبايل رايح يقعد علي التكعيبة مش هنسي أكتب رقمي في كومنت وأقول أي حد هناك يكلمني ومش هسمح لأي حد يقعد معايا.. إلا إذا كان بيمارس أي نوع من أنواع الفن هبان قدامه مستغرب جدا لو مكانش فنان وهقوله إنت إيه اللي بيقعدك هنا؟ هتكلم كتير عن البراندي والسجاير والحشيش هقول إني مش بعرف أكتب إلا وهما معايا كمان هذكر في قصيدة ليا قميص نوم صحبتي اللي مالهاش وجود ده ممكن يجذب البنات ليا مش هنسي كمان إني أكتب كل اللي خانقني علي الفيس بوك هشتم وأسب سلسفيل ناس كتير أوي هكون مهتم بالخناقات اللي بعرفها بالصدفة بين الناس وبعضها والتصرفات اللي بيتصرفوها مع بعض وبتأكدلي إني لسه سوي كمان هكتبstatus مهمة جدا زي.. هو ليه شاي العروسة مبقاش زي زمان؟ والشمعدان الأصفر ليه أصفر؟ والقهوة طلعت من غير وش ليه؟ وبشكر كل الناس اللي وقفت جنبي النهاردة حتي الناس اللي كانت في الأتوبيس بشكرهم برضه لأنهم كانوا واقفين جنبي وأخيرا بعد ما كل الناس تعملي hiden هغير ال about me وهكتب فيها قاعد مستني بفارغ الصبر صديقتي المتحررة.. علشان نتحرر سوا.. ومافيش مانع من تساؤل غامض وعميق في النهاية مثل هذا.. «حرية.. ممكن»!!
