هي كلمة القاهرة بال كاف ولا بال قاف ؟؟ بال k

هي كلمة القاهرة بال كاف ولا بال قاف ؟؟
بال k .........
عجبتني جدا فكرة مشاركة القراء في الكتابة والنشر علي صفحة الموقع
يمكن أنا مش موهوبة بالقدر الكافي إني أكتب .. وحاليا عايشة بين كتب النسا والجراحة فالأفكار اللي بتجيلي للكتابة بتبقي عن النسا والجراحة
بس استوقفتني جملة حلوة جدا في شروط الإستخدام وأنا بسجل في الموقع :
" نرجو أن تكون المشاركات باللغة العربية وبالأحرف العربية ما أمكن لتكون مفهومة للمشاركين الآخرين. "
عجبني المقطع الثاني من الجملة
بالحروف العربية
لإن فعلا ممكن تبقي لغة عربية من غير حروف عربية .. ممكن تبقي حروف إنجليزية وأرقام
ممكن تبقي اللغة الأسخف علي وجه الكرة الارضية
((((((( الفرانكو اراب )))))))))
الفرانكو اراب
أنك تكتب حروف إنجليزية وأرقام وتقرأ بالعربية .......
طيب ما دام هتتنطق عربي نكتبها بحروف إنجليزي ليه ,
طيب ما أكتب حروف إنجليزي وأكتب جمل إنجليزية
علي الأقل أبقي بكتب بلغة مفهومة لقطاع كبير مننا ..........
ناس كتير بترجع أصل الفرانكو
أن الكي بورد زمان وأجهزة المحمول
حروفها كانت إنجليزي وكنوع من الإستسهال او الجهل بدأ كثير يكتب بيها بدل من الحروف العربي
وشوية وبقت اللغة الأسهل في التعامل بين الشباب علي النت طيب نشوف وجهات نظر وأراء الطرفين
( ليه هكتب فرانكو ؟ )
* علشان الكي بورد بتاعي إنجليزي ومفيش حروف عربي ,
* علشان أصحابي علي النت بيكلموني فرانكو ولازم أرد عليهم بلغتهم ,
* علشان أبعت رسايل للموبايل وعدد الحروف بالإنجليزي في الرسالة أكثر من عدد الحروف بالعربي .. ودا أوفر ,
* علشان دي لغة عادية جداا مش عارف الناس بتستفز منها ليه ,
* علشان هي أسهل من العربي ,
( مكتبش فرانكو ليه ؟ )
* لغة القرءان هي اللغة العربية وانا كدا بجهلي ممكن أخلق جيل ميعرفش يعني إيه حروف عربية
جيل النت والفيس بوك اللي هيستسهل الحروف الإنجليزي
معظم النار من مستصغر الشرر ومفيش كارثة في التاريخ بتحصل إلا ووراها خطأ صغير جيل أغفل عنه بيدفع ثمنه جيل بعده ,
* علشان الفرانكو مش لغة لا هي لغة عربية ولا لغة اجنبية اقدر استفيد بيها
لا مفهومة للعرب ولا مفهومة للغرب
لا كسبت لغتي .. لغة القرءان واتقنتها ولا انا اتقنت لغة تخليني اتعامل مع حضارات تانية ,
* علشان الأسباب اللي تخليني أكتب فرانكو كلها أسباب واهية إلا ما رحم ربي ,
* علشان غيري اللي مش هيعرف يقراها هيبعد عنها ورأيي اللي بكتبه باللغة دي مش هعرف اوصله لكل الناس .. يمكن يفيد حد غيري ,
* علشان أنا بغفل عن جيل جاهل بقواعد اللغة العربية جيل بيبدل ال س مكان ال ص ومبيعرفش يحط الهمزات في أماكنها وبيلجأ لحروف تداري العيوب دي ,
* علشان ملاقيش المدارس في يوم من الأيام بتدرس بالفرانكو
والاقي جيل بيطالب ان القرءان يبقي فرانكو علشان يعرف يقراه ,
el lo3'a el 3arabya hya lo3'at alkor2aan
دي جملة فرانكو
معناها لو حد مش عارف يقراها ..
اللغة العربية هي لغة القرءان
!!
السؤال بقي
في رأيكو ليه الناس بتلجأ للفرانكو .. وهل هي فعلا مش مشكلة تستحق النقاش ؟