مصر والجزائر برامج رياضية.. تودى النار!!

* فيه إيه، إنتى بتتخانقى مع العيال ؟!
- لأ.. هم اللى بيتخانقوا مع بعض
* يا خبر، ليه؟! دول عمرهم ما عملوها
- أصل الولد ناوى يروح ماتش مصر والجزائر والبنت كانت عاوزه تروح معاه، وهو مش راضى..
* يا سلام.. ليه إن شاء الله.. أنا حأقوله لازم يأخذها.
- لأ ما ينفعش، أنا لقيت عنده حق..
* إنتى بتقفى معاه ضد البنت، لأ بقى، مدام هى عاوزه تروح لازم تروح. طب إيه رأيك إنى أنا كمان حأروح وحاخدها.
- يا أخى ما ينفعش، الولد بيقول أن الاستاد حيبقى حريقة وكمان ممنوع اصطحاب الستات والأطفال.
* إيه، مين إللى أخذ القرار ده، وإمتى ؟
- مش قرار، ده إللى مكتوب على الفيس بوك
* إيه الكلام الفاضى ده، فيس بوك إيه؟
- على الإنترنت، الشباب إللى رايحين الماتش نصحوا بعض ما حدش ياخد ستات ولا أطفال عشان إللى حيحصل هناك.
* إيه إللى حصل؟
-مالك، هو أنت مش عايش فى البلد دى معانا، مش بتقرأ ولا بتسمع إللى بيتقال ع الماتش؟!
* قريت، كنت خايف الماتش ما يتذاعش فى التليفزيون، بس قالوا خلاص حيتذاع، يعنى كل إللى أنتو خايفين منه مش حيحصل.
- بأقولك أنت مش عايش فى البلد، الحكاية مش كده خالص.
* طب ما تشرحى وتقولى لى فيه إيه ؟
- أصل الجزائريين حرقوا علم مصر
* معقولة !! مش ممكن، ماصدقش.
- بصراحة أنا برضه مش مصدقه، شوف هو مدحت شلبى عرض فيلم فيه جزائريين بيحرقوا فانلة الفريق المصرى.
* طب والعلم ؟!!
- ما هو مدحت شلبى قال أن الفانلة عليها صورة العلم.. يبقوا كده حرقوا العلم، صح ؟!
* إزاى مدحت شلبى يعمل كده ؟! يعنى قصده إيه ؟
- قصده إن الجزائريين أهانونا ولازم نرد الإهانة.
* إزاى ؟
- نوريهم فى الاستاد، وقبل الاستاد كمان
* قبل الاستاد !!
- أنت عارف لما رحنا نلعب عندهم عملوا إيه ؟ راحوا للفريق عند الفندق بالليل وفضلوا يهيصوا عشان اللعيبة ما يعرفوش يناموا ويلعبوا وحش
* مين إللى قال الكلام ده ؟
- كل البرامج بتاعة الرياضة بتقول
* واشمعنى دلوقتى، ماقالوش الكلام ده بعد الماتش ليه، عاوزين إيه ؟
- ما أنا قلت لك عاوزين يردوا الإهانة.
* إنتى عاوزة تقولى إن إللى بيقوّموا الجمهور هم المذيعين بتوع البرامج الرياضية !! يادى الحوسة
- هو أنت زعلان منهم ليه ؟ مش بيقولوا الحقيقة!!
* حقيقة إيه، المفروض لما يلاقوا الجمهور ناوى على شر يهدوهم، مش هم إللى يعملوا كده
- مش بيقولوا لنا اللى مش عارفينه
* يعنى أنت موافقة على إللى بيحصل
- مش بالظبط.بس ده ماتش مهم هو إللى حيوصلنا كأس العالم.
* ما هو لو عملنا إللى المذيعين دول عاوزينه مش حنوصل حتى لو غلبنا خمسة صفر!!
- عارفة عاوز تقول إيه، إن طوبة قبل كده خرجتنا من كأس العالم، وإن ممكن ده يحصل المرة دى، بس أنا بأقولك هم برضه قالوا للجمهور ما حدش يحدف طوب.
* إذا كانوا عمالين من دلوقتى يحدفوا طوب أهو، إلا مين كمان قال كلام زى ده ؟!
- كلهم، بس عمرو أديب قال كلام معقول
* هو عمرو أديب بيقدم برنامج رياضة ؟
- لأ، قال فى البرنامج بتاعه
*الحمد لله إن حد قال كلام معقول ، قال إيه ؟
- قال إننا وقفنا جنب الجزاير وطورناهم وعلمناهم.
* هو ده الكلام المعقول إللى عاجبك، الله يكون فى عون الشباب..
- الحقيقة.. هو كمان كان قال.. كان قبل الماتش بتاع الجزاير ورواندا لما كان عاوزهم يتغلبوا فضل يدعى عليهم، قعد يقول يا رب نكد على الجزائريين.
* يعنى كمان إحنا إللى بدأنا، واستعديناهم علينا.
- هو ده حصل فعلا، الولد قال لى أن الجمهور بتاع الجزاير رد عليه على الإنترنت، وقعدوا بقى من ساعتها يشتموا فينا.
* شفتى، يعنى عندى حق
- لأ مش للدرجة دى، فيها إيه لما واحد يعمل حاجة غلط مش كلنا نبقى مسئولين عنها، عمرو أديب قال كلمة ما عجبتهومش يوجهوا ليه هو لوحده الرد مش يشتموا كل المصريين.
* يا سلام لما الواحد يقول كلام ويعمل عكسه
-أنا !!
* إنتى وكل إللى بيقوّموا الجمهور كده
- ليه.. قصدك إيه ؟
* قصدى بفرض أن فيه كام واحد حرقوا فانلة المنتخب المصرى ما ينفعش نحمّل الجزائريين كلهم الذنب، زى ما بتقولى عن عمرو أديب
- مش أنا إللى بأقول، دول المذيعين بتوع الرياضة، وبعدين أين فهمك أنت، دول متخصصين
* متخصصين فى إيه ؟
- فى الكورة، ده كل واحد منهم عنده برنامج بيتذاع كل يوم بالتلات وأربع ساعات، يعنى متخصصين، يعنى فاهمين أكثر مننا، يعنى إللى بيقولوه لازم نصدقه.
* اسم الله عليكى.. هو ده بالظبط إللى عاوز أقوله
- غلبتنى معاك، عاوز تقول إيه ؟
* إن الناس بتصدق المذيعين دول عشان هى دى شغلتهم أنهم يفهمونا إللى بيحصل، على اعتبار يعنى أنهم بيقولوا عن نفسهم متخصصين، عشان كده تأثيرهم فى الناس كبير، تعرفى أنا لو مسئول فى البلد دى كنت قفلت البرامج دى.
- يا سلام، ماتقدرش
* مش بس كده، كنت حولت إللى يعمل كده للنيابة.
- ليه يعنى، هم عملوا إيه مش بيدافعوا عن كرامتنا
* شوفى، الناس دى كل تفكيرها فى حاجة واحدة، هى أنهم يخلوا ناس كتير تتفرج على البرامج بتاعتهم، ساعتها الإعلانات تكتر وهم يقبضوا فلوس أكتر، يعنى شيلى خالص حكاية كرامتنا من الكلام.
- بلاش كرامتنا، هم عاوزين الجمهور يشجع الفريق بحماس عشان نكسب ونوصل لكأس العالم.
* إنتى نفسك أهو عارفة أن طوبة قبل كده خرجتنا من كاس العالم، بعدما لعبنا الماتش وكسبنا، ورجعوا وعادوه عشان الجمهور حدف طوب، أتعادلنا وخرجنا، إللى بيعملوه ده حيتسبب فى تكرار نفس السيناريو.
- لا ماتخافش، ما هو الأمن قال أنه حيفتش الجمهور كويس عشان يتأكد أن محدش يدخل ومعاه زلطة أو طوبة أو صاروخ، وأنا واثقة فى الأمن فى الحتة دى كويس.
* ولو، الأمر ما يسلمش.. ده ممكن جملة، يعنى لو الجمهور شتم الحكم أو شتم الجزائريين ممكن برضه يحصل نفس الشىء، والماتش يتلغى ويعتبرونا مغلوبين.
- فال الله ولا فالك يا أخى
* أنا بس عاوز أقول أن ده ماتش
- ماتش مصيرى، حياة أو موت
* لأ، ماتش وبس، ماتش يعنى نتفرج عشان نستمتع، اللعيبة تلعب وتحاول تكسب والمدرب ياخد باله ويوجههم، والحكام يحكموا كويس، والجمهور يشجع بحماس، وإللى يلعب أحسن وربنا يوفقه يغلب، ونسلم على بعض بعد الماتش.
- إن شاء الله نسلم على بعض وإحنا فايزين وواصلين لكأس العالم، عشان خاطر الناس الغلابة دى تفرح.
* المهم أن الماتشات معمولة عشان نتعلم الحكاية دى؟
- حكاية إيه ؟
* إللى قلت لك عليها
- إننا نكسب يعنى وهم يسلموا علينا
* لو لعبنا كويس. وربنا وفقنا
- تصدق أنك مش مصرى بحق وحقيقى، بقى البنت إللى عمرها ما تعرف الفرق بين الأهلى والزمالك عاوزة تروح الماتش، وأنت تقول لو كسبوا نسلم عليهم.
* إللى بأقولك عليه..دى اسمها الروح الرياضية
- طب ما هم برضه بيقولوا عن الروح الرياضية دى فى البرامج بتاعتهم.
* إللى فهمته منك أنهم بيتكلموا عن حرب مش ماتش
- ما هى فعلا حرب
* حرب مع إخواتنا، مش الجزائريين دول إخواتنا.
- ما هم بيقولوا إخواتنا، هم قالوا غير كده. بس بيقولوا أننا الأخت الكبيرة، ولازم الصغير يحترم الكبير.
* يعنى هم عاوزينهم يتغلبوا بس عشان إحنا أختهم الكبيرة. باقولك أنا لو مسئول فى البلد ديه كنت وقفت البرامج دى
- أنا بس عاوزة أقولك أنهم بيردوا على إللى الجزائريين بيقولوه فى جرايدهم وتليفزيوناتهم، وعلى الإنترنت كمان.
* مش إحنا برضه بنعمل نفس الشىء ، يعنى برامج وجرايد وإنترنت، مش قلتى فيس بوك.
- آه ده أنا شفت فيلم على الفيس بوك جميل
* إنتى دخلتى على الإنترنت، إيه الشطارة ديه.
- لأ مادخلتش، ده فيه برنامج، جابه من النت وعرضه، اسمه «ويلكم تو هيل»، يعنى مرحبا بكم إلى الجحيم.
* يا خبر، جحيم مرة واحدة ! فين الجحيم ده ؟
- فى الاستاد.. الفيلم يبين أن الاستاد يوم الماتش حيبقى أحمر
* بالأعلام يعنى
-لأ، ناااار
* نااار.. واتعرض فى برنامج.. تصدقى بقى أن كل إللى بيعملوا كده فى البرامج بتاعتهم حيروحوا النار
- يا ساتر عليك لما تبالغ، جنة ونار إيه.. ده مجرد ماتش.
* عليكى نور. بس هى كلمة واحدة، لا أنا ولا البنت ولا حتى الولد هنروح الماتش، ماله التليفزيون.