حاسس إني جمل جربان!

أنا باكتب لكم وأنا حزين حزن ربنا وحده هو اللي عالم بيه، أنا مشكلتي إني عايش لوحدي مفيش حد في الدنيا بيحبني ومهما أقول مش ممكن تتصوروا أنا اتأذيت قد إيه واتعرضت لكرب وضيق كتير، أصحابي اللي معايا في الكلية اللي طول عمري بحبهم وباقول عليهم كويسين بقوا كل ما أكلم حد فيهم يتجاهلني وجت عليّ فترة بقيت عامل زي الجمل الجربان اللي الكل بيبعد عنه مع إني عمري ما غلطت فيهم.
تخيل لما تلاقي كل الناس حتى اللي ماتعرفكش مجرد ما تشوفك تبص لك باحتقار، أنا عارف إنكم هتقولوا بتتوهم لكن ربنا يعلم إني كل كلمة باكتبها لا هي وهم ولا هي كدب، حتى أهلي ودي كانت الضربة اللي قسمتني وخاصة أختي اللي بحبها بقت تتجنبني وماترضاش تقعد معايا وفي بنت كنت بحبها وكنت دايماً باتكسف أتكلم معاها وهي دايماً اللي كانت بتحاول تكلمني وكانت بتفرح أوي لما تلاقيني مهتم بيها، مرة ربنا رزقني بشيء من الجرأة وقدرت أبص لها من غير ما اتكسف وابتسمت لها ابتسامة ماتجيش إلا من واحد بيحب.. عارفين عملت إيه؟! راحت مكلمة ولد زميلها، وفيه كلام كتير وهموم كتير الواحد لو كتبها مش هيكفيه كتاب بحاله.
وعموماً لو إنتم كمان تجاهلتوني فمش جديد عليّ ضربات الغدر من كل مكان، وفي الأول وفي الآخر أنا راضي وباقول الحمد لله وصابر، والشكوى لغير الله مذلة، وياريت تدعوا لي إني أموت؛ لأن واضح إن دي الحاجة الوحيدة اللي هتريحني لأني نسيت طعم الراحة حتى وأنا نايم باحلم أحلام مفزعة، أنا باصلي وبادعي ربنا ومش يائس ماتفتكروش علشان قلت ادعوا لي بالموت إني يائس، أنا قلت كده لأني مش عايز حاجة من الدنيا كلها، ولا في حاجة بتسعدني.. أعمل إيه؟
A