أحمد عبد العليم يكتب: رسالة "خالد" إلى وزير الداخلية

أتمنى تكون بخير يا سيادة الوزير (حبيب) (العادل ) ى، أنا حد حضرتك متعرفهوش، وكمان مقابلتوش ولا حتقابلوا بس أكيد حنتقابل قريب جدا فى دار "العدل"، أنا شاب اسكندرانى عندى 28 سنة، يعنى تقريبا فى سن أولادك، بحب مصر اوى، بحلم وأحلامى بسيطة جدا، بحلم بالستر، وعلى فكرة يا سيادة الوزير أنا مش عاطل ولا مجرم ولا بتعاطى مخدرات وكمان مش إرهابى.
أنا شاب زيه زى ملايين من شباب مصر بيغمس لقمة العيش بالفول الصبح، وبيقول الحمد لله، اتعلمت إنى أرضى بقليله، والبحر علمنى إن الخير دايما جاى وأنى ميأسش أبدا.
على فكرة.. أنا عمرى ما مشيت فى مظاهرة ولا عمرى كنت بلطجى أو بشرب مخدرات أو حشيش .. لأنهم حرام .
أنا بحب عيلتى جدا وبحب أمى وأبويا، بحبهم وهما بيحبونى جدا هما بالنسبة لى أحلى حاجة فى الدنيا، ومعتقدش إنهم يقدروا يعيشوا من غيرى يوم، لأنى أنا النور اللى بيشوفوا بيه، وأكيد برده أنا عارف إن حضرتك متقدرش تعيش من غير ولادك ولا يوم ولا ترضى إن حد يمس شعرية منهم.. ربنا يخليهوملك يا رب. المهم يا سيادة الوزير..
أنا بطلب من حضرتك توقف جنبى، عشان أنا معايا دليل على تورط اتنين مخبرين وظابط فى قضية مخدرات، بعدما مسكوا كمية مخدرات بدل ما يسلموها عشان تتعدم، فكروا يتاجروا فيها ...
أنا ببعت لحضرتك الرسالة دى عشان حضرتك تتحرك عشان اللى بيحصل ده إهانة لمصر كلها مش لحضرتك ووزارتك بس، وأنا بجد بخاف على مصر وسمعتها جدا والله .
أنا مامتى حذرتنى كتير إنى اتكلم، ما حضرتك عارف قلب الأم بقى، بس أنا رفضت إنى أشوف الحق واسكت، لأن الساكت عن الحق شيطان أخرس .
وخايف أنى أتسأل يوم القيامة عنهم ومعرفش أرد، وعشان متأكد أن ربنا حيسألك انت كمان عن المصيبة دى قولت أبلغك عشان خايف عليك من عقاب من يمهل ولا يهمل .
أتمنى حضرتك مترميش رسالتى على الأرض، أو تقرأها وتنسى لأن مشكلة بلدنا إننا بننسى بسرعة "ثقافة التناسى"، الرسالة عشان نتحرك ونحاول نتخلص من المجرمين، الرسالة عشان كلمة الحق والعدل لازم يسودوا فى النهاية .
بعد ما كتبت رسالتى وبعتها كده أنا مرتاح جدا، وحتى لو موتونى، لأن الموت عشان كلمة حق.. بداية حياة.