مناوشات قراء اليوم السابع مع مصطفى شعبان.. هدى سألته: أنت ليه مغرور؟ فأجاب: أنا غلبان.. وnona قالت له: هل أنت من أنصار الزواج ولا مقضيها؟ فقال: أنا من أنصاره جداً

حرص الفنان مصطفى شعبان على الإجابة على جميع أسئلة قراء اليوم السابع دون حرج، وأجاب عن كل الأسئلة التى وصلت إلى الموقع الإلكترونى للجريدة، لينفى شائعات وجود خلافات بينه وبين الفنانة منى زكى، وأيضا فيلمه السينمائى الجديد "الوتر"، والأعمال التليفزيونية التى يشارك فيها فى الفترة المقبلة، وأسباب عدم تكرار لتجربة مسلسل "العميل 1001"، وكذلك شائعات الزواج والطلاق التى تطارده.
واليوم السابع تنشر أسئلة القراء بأسمائهم وإجابات مصطفى بأسلوبه الخاص..
** مى: هل يمكن أن تفيدك الشائعات فى الانتشار؟
مصطفى شعبان: فيه ناس بتشوف أن الشائعات ممكن تفيدها، لكن عن نفسى بتجنبها تماما، وبحاول أبعد عنها، وأركز فقط فى عملى وشغلى، لأن الفن يحتاج إلى تركيز، ومن يحقق شهرته على أساس الشائعات سيخسر كثيرا.
** نور: ليه اتجهت لتقديم برامج تليفزيونية مؤخرا، وكمان مسابقات.. مش بعيدة عليك شوية؟
مصطفى: برامج المسابقات ليست عيبا، وتحمست لتقديم برنامج "واحد ضد 100" لأنه نسخة عربية من برنامج عالمى حقق نجاحا كبيرا فى الدول التى عرض بها وهى أمريكا واليابان واليونان وروسيا، وتنتجه شركة عالمية وتكلفته 12 مليون دولار، وسيعرض على قناتى الحياة وأبو ظبى.
وبرامج المسابقات شئ مهم جدا، واعتبر تلك التجربة بمثابة الوقوف على خشبة المسرح الذى اشتاق إليه كثيرا، حيث يوجد جمهور كبير فى البرنامج 100 أمامى و100 خلفى، وذلك يعطينى إحساسا بأننى على المسرح، وهو خروج عن الشكل التقليدى للبرامج، كما يعطينى الفرصة للقاء شخصيات أخرى من ثقافات مختلفة، وكل ذلك يفيدنى كفنان أيضا.
** سهى: ليه متجوزتش لحد دلوقتى؟ سعيد بالعزوبية ولا محتار تختار فتاة الأحلام؟
مصطفى: النصيب يا سهى، عندما يأتى لن يستطيع أحد أن يقول له "لا".
** هدى: ليه أنت مغرور؟
مصطفى: حرام عليكي.. ده أنا غلبان، وعمرى ما كنت ولا هكون مغرور، وأعوذ بالله من الغرور.
** عادل: أخبار فيلمك الجديد إيه؟ ويا ترى هتقدم مسلسل فى رمضان 2010؟
مصطفى: يتبقى على الانتهاء من تصويرى لفيلمى "الوتر" حوالى 10 أيام، وأجسد فيه شخصية مختلفة تماما، ليس رومانسى أو أكشن، بل تركيبة فنية جديد،ة تأليف محمد ناير، وإخراج مجدى الهوارى، ويشاركنى بطولته غادة عادل وسوسن بدر وأروى جودة.
أما المسلسل فمازلت أفكر ولم أحسم القرار حتى الآن، وهناك عدة مشروعات أدرسها.
** هنا: مصطفى بجد انت وحشتنا أوى، عايزة أعرف أنت مختفى ليه كل ده، وإيه الجديد اللى هتقدمه لنا الفترة اللى جاية، ومتى سنراك على الشاشة من جديد.
شكرا يا هنا، بس أنا مش مختفى ولا حاجة، لكنى أصور فيلم "الوتر" من شهر مارس الماضى وانشغلت فيه كثيرا، وإن شاء الله سأكون موجودا فى الموسم المقبل وبعد المقبل، وأحرص دائما على أن أكون عند حسن ظنكم.
** سمر: مصطفى إزيك، أنا كنت عايزة أعرف أنت هتعمل بجد دور مصطفى مشرفة زى ما سمعنا ولا إيه الموضوع؟
مصطفى: شكرا أوى على اهتمامك، أنا اتعرض على السيناريو فعلا، لكن لسة لم اتخذ أى قرار.
** remo هل عرض عليك عروض عالمية؟
مصطفى: أتعرض عليا عدة عروض عالمية لكنى لم أتخذ فيها أى قرار نهائى.
** nonaسمعت انك مرتبط بفنانة شابة ليها أدوار قليلة .. هل هذا صحيح؟ وليه مش بتجوزها ولا أنت من أنصار عدم الجواز ومقضيها؟
مصطفى: من هذه الممثلة؟ لا توجد صحة لكل تلك الشائعات، وعموما أنا من أنصار الجواز جدا.
** إبراهيم: مختفى ليه؟
مصطفى: لأن تصوير فيلم "الوتر" أخذ وقتا طويلا، وكنت شديد التركيز فى هذا العمل، لحرصى على أن يظهر بشكل جيد ومميز، وأتمنى نجاحه عند عرضه.
** شيما: هل اتهامك بتقليد السقا والحديث على الصراع بينكما لسه بيضايقك؟ وكمان هل هواياتك الغريبة صيد بط وحمام نوع من محاولة لفت الانتباه والتأكيد على أنك مختلف؟
مصطفى: بحب السقا جدا، ويشرفنى أن يقال إننى أقلده، ولا يوجد لدى أى مانع فى أننى أقلد حد ناجح، والسقا فنان مميز ونجح فى عمل أفلام مختلفة.
أما فيما يتعلق بهواياتى صيد الحمام والبط، أحبها جدا، والجمهور عرفها عنى بالصدفة، وهى نوع من أنواع الرياضة، وأعمل بمقولة سيدنا عمر بن الخطاب " علموا أولادكم السباحة والرماية وركوب الخيل"، ومش قصدى أن أكون مختلفا، ولكن فقط أمارس شيئا مفيدا وأحبه.
** أحمد: فى كل القضايا السياسية والأحداث الماضية ومنها أحداث الجزائر لم نسمع لك رأى ولا أى تعليق؟ لماذا؟ وهل أنت بتحب تكون بعيد؟
مصطفى: أنا قلبى دايما مع منتخب مصر، وكنت أتمنى فرحتنا تكمل بالوصول إلى كأس العالم، ورغم غضبى الشديد من اللى عمله بعض المشجعين الجزائريين حاسس إن مش كل الشعب الجزائرى كده، فيه ناس كتير بيحبونا ومايرضوش باللى حصل بس عاوزين نترك الأصوات العاقلة تطلع للنور شوية.
** أفندى: أفلامك كلها مش بتجيب إيرادات .. يا ترى ليه بالظبط.. أرجو انك تجاوب بصراحة وبعيدا عن الكلام المتذوق؟
مصطفى: بصراحة يا أفندى، أفلامى كلها بتجيب إيرادات ففيلم "أحلام عمرنا" حقق 9 ملايين جنيه، وفيلم "فتح عينيك" حقق حوالى 10 ملايين جنيه، كما أن فيلم "كود36" لم يعرض فى توقيت مناسب، وظلم كثيرا وقت عرضه، أما فيلم "جوبا" فقد حقق إيرادات مرتفعة فى السوق العربية، والحمد لله لم يخسر أى منتج أتعامل معه.
وأحرص دائما على تقديم أعمال تبقى فى ذاكرة الجمهور، ولها قيمة مثل "جوبا" الذى تناول قضية هامة، وأفتخر بأننى قمت ببطولته.
**حسين: بصراحة منى زكى قالت إنه فيه تجربة فى حياتها مع فنان مش ممكن تشتغل معاه تاتى وكتير فهموا أن أنت خصوصا انها قالت هى تجربة واحدة ولن تتكررها.. أنت شايف أنها ليه واخدة الموقف ده منك بعد فيلم أحلام عمرنا؟ ويا ترى أنت معندكش شعبية بين زميلاتك. ومين أقرب الناس؟
مصطفى: أنا لم أسمع منى تصرح بهذا الكلام بأذنى، ولا توجد أى مشاكل بيننا، ومستعد للتعاون معها مرة أخرى لأننى أحترمها وأقدرها، وعموما لدى صداقات كثيرة فى الوسط الفنى، وعلاقتى بزملائى جيدة جدا، ولى أصحاب كتير ونتقابل كثيرا.
** سحر: سمعت انك كان عندك مشروع عن أسامة ين لادن والقاعدة هو المشروع راح فين؟ ولا كان من باب الدعاية وخلاص؟
مصطفى: عمرى ما صرحت بأن لدى مشروع فنى عن أسامة بن لادن، والكلام ده غلط.
** جورج نجار: ما رأيك فى الاحداث الأخيرة بين مصر والجزائر وعدم دخول منتخبنا الوطنى المصرى كأس العالم يا أمير الشباب مصطفى شعبان؟ يا مصطفى يا مصطفى أنا بحبك يا مصطفى.
مصطفى: أنا جاوبت من شوية.. اقرا ردى على الأستاذ أحمد.
** شوكت: من المخرج الذى تحب العمل معه لكنك لم تعمل معه حتى الآن؟
مصطفى: المبدع الفنان عاطف الطيب الله يرحمه، وأحب أن أتعاون مع المخرجين خالد يوسف وأحمد نادر جلال وطارق العريان، لأنهم مخرجون متميزون ولديهم رؤى فنية واضحة.
** إيمى الأهلاوية: ليه من بعد مسلسل العميل 1001 معملتش مسلسل آخر عن الجاسوسية؟
مصطفى: مسلسل "العميل 1001" استغرق منى سنتين فى التحضير والتصوير، والأعمال الدرامية تحتاج إلى مجهود كبير، لأننى أركز جيدا فيما أقدمه، ولم يأتينى حتى الآن عمل آخر عن الجاسوسية أتحمس له.
** آلاء: ما هى الأمنية التى تمنيت تحقيقها ولم تتحقق بعد؟
مصطفى بعد تفكير طويل: لسه، لم أتمنها حتى الآن.
** إسكندرانى: شفتك فى البرنامج الناجح "دارك" كنت ظريف أوى وعلى طبيعتك ليه مش بتحاول تمثل كوميدى ... أعتقد حتكون ناجحا جدا ... إحنا بنحبك أوى؟
مصطفى: شكرا بجد لكلامك الجميل جدا، وأنا كمان بحبكم جدا، وأوعدك بأن الفيلم بعد المقبل سيكون كوميدياً.
** شريف شيكو: إزيك الأول يا نجم؟ أنا عاوز أقولك إنى شايفك أكتر فى أدوار الرومانسية والدراما الحزينة .. مش شايفك فى أدوار الأكشن أوى .. ممكن تعمل دور ظابط زى فيلم "مافيا" كنت هايل فيه بصراحة .. سؤالى : أنت بصراحة حابب الأكشن وشايف نفسك فيه ولا بتحب المنافسة على أدوار الأكشن ولا علشان دور اتعرض عليك وخلاص فبتعمله؟
مصطفى: أنا الحمد لله يا شيكو.. وعايز أقولك أننى أنا بحب تجسيد كل أنواع الشخصيات، والعمل فى تجارب سينمائية مختلفة، سواء كوميدى أو دراما أو أكشن، ولا أفضل حصر نفسى فى منطقة إبداعية واحدة، لأن الفنان مهمته أن يقدم كل الأدوار بنفس درجة الإتقان.
** محمد عصام نفسى أشوفك بتعمل أفلام وطنية فى السينما ونتمنى الكتير من أعمالك وشكرا؟
مصطفى: وأنا كمان بينى وبينك بحب الأفلام الوطنية، وإيدى على كتفك، وأكيد لو وجدت سيناريو وإنتاج قوى سأقوم ببطولة فيلم من هذه النوعية.
** محمود شاهين: بجد أنت ممثل كويس بس أنا بدأت أحس أن أفلامك الأخيرة زى كود 36 يؤسفنى أنى أقول إنه تافه بكل المقاييس أنت محتاج تكون فى الفيلم مع حد يعنى متكونش البطل المطلق، فى الحالة دى بتبقى بجد تحفة أو تختار أفلامك بإتقان اكتر من كده وأكتر دور أنا بجد بحبه مووت سعيد متولى سعيد . وربنا يوفقك.
مصطفى: شكرا على رأيك، وأنا أعتز بكل أفلامى، وإذا لم يكن أعجبك الكود 36 فهو أعجب أشخاصا آخرين.
** طاش وحيد: فى الأول أرحب بيك، وكل عام وأنت بخير
الأسئلة بقى:
1- ليه مش بتطلع كتير عبر البرامج الحوارية واللقاءات وكده يعنى ؟
2- هل خلافك مع منى زكى لسه قائم؟
3- بم أن أنا من موقع المطرب مصطفى كامل، قوله كلمة، تعليقك على ألبومه الأخير؟
وأتمنى ليك كل خير يا مصطفى شعبان " فتح عينيك "
مصطفى: أنا كمان برحب بيك، وبحبك جدا
الأجوبة بقى:
1- مش بحب أطلع فى البرامج التليفزيونية إلا إذا كان لدى جديد أقوله، وطالما لا يوجد جديد أو حدث فلا أظهر فى التليفزيون.
2- مفيش أى خلافات مع منى زكى بجد
3- مصطفى كامل فنان محترم وموهوب، وأحب أقول له ولجمهوره ومحبيه كل سنة وأنتوا طيبين.
** البلجيهى: هل ترضى أن تكون زوجتك ممثلة وتمثل مشاهد فيها قبلات مع ممثلين أصدقائك؟ وشكرا.. أخوك البلجيهى من بلجاى مركز المنصورة.
مصطفى: مش لما أتجوز الأول!
** مصطفى عيد: سمعت من أكتر من حد إن مصطفى شعبان جذوره تعود لقرية البتانون بلد المشير محمد عبد الغنى الجمسى، هل الكلام ده صحيح؟
مصطفى: هذا الكلام صحيح ويشرفنى أن أكون من البتانون.
Jako* نشر على بعض المواقع القبطية موضوع تنصر أختك وأنك تفكر أيضاً بقبول المسيح مخلصاً لك .. فهل هذا حقيقة؟
مصطفى: أختى المحجبة ستتضايق جدا إذا سمعتك تقول ذلك الكلام، فهذا الكلام يضايقها جدا لأنه غير صحيح، ونحن عائلة مسلمة وملتزمون ومتدينون، ونكن كل احترام والحب للمسيحيين.
** محمد: مصطفى أنت فنان جميل ورائع وبتمثل سينما نظيفه وأنا أتمنى أنك تفضل على الخط ده دايما لأنك بتمثل الوسط المحترم من الشباب الفنانين وأتمنى أنى دايما أشوفك مع أسرتى فى أعمال جيدة كعادتك ولا نشعر بالإحراج فى مشاهدتها، ونرجو منك تقديم وعد بأنك هتلتزم بنفس النهج المحترم اللى بتحترم فيه جمهورك.
مصطفى: متشكر جدا جدا لكلامك الجميل ويشرفنى رأيك، وأتمنى دائما تقديم أعمال تعجبك.
** محمود: هو أنت ليه دايما تصر على أن تظهر فى أفلامك "تنك" و"ثقيل كدا"، دا غرور ومش على أساس نجوميتك.
مصطفى: أنا يا عم غلبان، ومش مغرور ولا حاجة خالص.
**متابع جيد: مين مصطفى شعبان دا؟
مصطفى: عبد لله يؤدى عمله ويحلم بأن يقدم شيئاً، مفيدا وعملا فنيا يرضى الناس والجمهور.
**محسن: هل تريد أن تختم حياتك كممثل أم ترى أن التمثيل به بعد عن تعاليم الله؟
مصطفى: طبعا أنا مؤمن بدور الفن الأخلاقى فى تقدم البشرية كلها، ومحدش عارف هيختم حياته إزاى.
** محمد عباس: أولاً أنت ليك قبول لدى الجماهير ولكن أعذرنى حيث أرى أن الأفلام مثل كود 36 أو جوبا تستخف بعقل المشاهد أو أن قصة فيلم كود 36 ليست لها أى عمق حاول اختيار الأفضل وحاول ألا تعمل على طريقة "الصنايعية اللى موجود يمشى الأحوال".
مصطفى: أشكرك على اهتمامك يا أستاذ محمد، لكنى اختلف معك، فمثلا فيلم "جوبا" كان به عمق كبير، ويعد أول عمل سينمائى تنبأ بالانشقاق الحاصل فى فلسطين.
** منال: بصراحة كنت بحبك، بس شوفت لك مشهد مش كويس للأسف، يا ريت تبتعد عن أى مشاهد مش كويسة عشان ربنا يوفقك، وصدقنى الناس بتحب الممثل الذى يراعى الله، يا ريت ماتزعل من كلامى، لأننا أحببناك جدا فى مسلسل "عائلة الحاج متولى".
مصطفى: بجد مش فاهم قصدك مشهد أية.. كنت أتمنى أنك توضحى.. وشكرا على رأيك، ومقدرش أزعل من جمهورى، لأنى فى النهاية أقدم أعمالى لهم، ويهمنى رأيهم.
** walid ليه أنت مذبذب يعنى عملت أعمال تكفى تدخلك العالمية وأعمال أخرى لا تستحق مجرد المشاهدة .. أنت فنان جميل ومتميز بس عندك مشكلة كبيرة فى اختيارك لأعمالك .. واعتقد انك فى البطل الثانى بتكون كويس وبتحقق نجومية مثل فيلم "مافيا".
مصطفى: أشكرك على رأيك، بس أنا مش مذبذب زى ما بتقولى، فقط أحب أن أقدم أدوارا مختلفة، ونوعيات متعددة من الأعمال، ولا أفكر فى الموضوع من ناحية الدور الأول أو الثانى، بل أفكر فيه من ناحية الإضافة التى سيضيفها إلى رصيدى الفنى، ومدى ملاءمة الدور لى، واختلافه عن باقى الأعمال التى قدمتها من قبل.
** جيهان: تعالوا نضحك نخفف عن روحنا ونخلى الدنيا ربيع، حرام الدنيا تظلمنا واحنا نظلم نفسنا تعالوا نستغفر الله 10 مرات ونحمد ربنا 10 مرات، ونكبر 10 مرات ادعوا لى أرجوكم.
مصطفى: ربنا معك.. ودعوتك لحب الحياة جميلة جدا.
Rim** : أنا مش هسألك كم مره حبيت، بس هسألك كم مرة قلت كلمه بحبك لبنت، وكم مرة قلت كلمة بحبك ومكنتش بتحبها بجد؟
مصطفى: بخصوص السؤال الأول.. فأنا قولتها مرتين، أما السؤال الثانى فعمرى ما قولت لبنت كلمة بحبك وأنا مكنتش بحبها، لأننى أقدر تلك المشاعر واحترمها، ولا أخدع أحدا بكلام خاطئ.
Mody** : مصطفى شعبان فعلا انت من شبين الكوم وتحديدا من البتانون؟
مصطفى: فعلا..
** محمد إبراهيم: أنا مقتنع وفى رأى أن مصطفى شعبان معملش غير فليم "مافيا" ومسلسل الحاج متولى، بس أنت من جيل كريم عبد العزيز وأحمد السقا بس أنت اتأخرت كتير ليه! وليه أنت غير متواجد فى البرامج؟
مصطفى: أقدر رأيك واحترمه، وأنا اتكلمت عن أفلامى فى أسئلة سابقة وكمان اتكلمت عن عدم ظهورى كثيرا فى البرامج..
** نادية نصر: ليه الفن المصرى تدنى، ليه لما نشوف أفلام أميتاب باتشان وشاروخان وبريتى زانيتا والهنود كلهم ننسجم ونقتنع رغم المبالغات حتى الشباب رائعون، ولما نشوف فيلم مصرى نحس بالمبالغه وننام جانبه حتى لو مفهوش مبالغة وكل واحدة همها المال والشهرة ليس حبا للفن مثل زمان.
مصطفى: أنا بحب الجمهور الواعى زيك، وفيه برضوا فنانين بيقدموا حاجات حلوة دلوقتي، ومهمة، وأتمنى أن أقدم أعمالا تكون عند حسن ظنى جمهورى دائما.
** البلجيهى: قل هل ننبؤكم بالأخسرين أعمالا الذين ضل سعيهم فى الحياة الدنيا وهم يحسبون أنهم يحسنون صنعا.. السؤال: تعرف معنى الآية دى؟
مصطفى: طبعا عارف لأنى مسلم جدا ومؤمن جدا، ودى على فكرة نزلت للمشركين فقط مش للمؤمنين أبدا.. ربنا يهدينا كلنا إلى الصح يا رب.
** محمد سعيد: ما سبب الخلاف بينك وبين منى زكى
مصطفى: لا توجد أى خلافات بيننا، وأحب منى زكى وأحترمها جدا.
** كريم بكر:
1- لو واحد من محبيك قالك لو سمحت رقم موبايلك تعطيه له؟
2- ممكن لو شوفت حد فى الشارع قالك لو سمحت يا أستاذ مصطفى أنا مثلا بكتب أفلام ومش مشهور وعايز أعرض عليك فكرة الفيلم ده تكون بطلة، هو قالك فكرة الفيلم وعجبتك هتوافق تبقى بطل الفيلم؟
مصطفى:
1 - طبعا هديهله.
2- أكيد وطبعا ومفيش أى مشكلة، لأن السينما دائما تحتاج إلى إبداعات شابة.
** منة: أوضحت الفنانة منى زكى من قبل فى أكثر من برنامج ومجلة أن هناك خلافا بينها وبين مصطفى شعبان خاصا بعد فيلم أحلام عمرنا .. ما حقيقة هذا الخلاف ؟ وهل سيؤثر هذا على عملك مع منى زكى مرة أخرى بعد أحلام عمرنا ؟
مصطفى: جاوبت على السؤال ده كتير أوى.. بس أؤكد على أن مفيش خلافات.
** محمد السعيد أنت أهلاوى ولا أيه؟
مصطفى: أنا أهلاوى أنت إيه؟
** نونا: كان نفسك تمثل إيه من الأفلام القديمة لكبار الفنانين لكل واحد منهم نور الشريف وأحمد زكى وعادل إمام ومحمود عبد العزيز وأحمد مظهر وممدوح عبد العليم وفاروق الفيشاوى ويحيى الفخرانى ومحسن محى الدين ومحمود مرسى وصلاح ذو الفقار ورشدى أباظة أذكر فيلم لكل واحد منهم كان نفسك تمثل فيلمه.
مصطفى: ده امتحان بقه
عموما نور الشريف فى فيلم ضربة شمس، وأحمد زكى فى "الهروب"، وعادل إمام "الحب فى الزنزانة" و"محمود عبد العزيز فى "رأفت الهجان" وأحمد مظهر" الناصر صلاح الدين، و"ممدوح عبدالعليم "طارق بن زياد"، وفاروق الفيشاوى فى "الجراج"، ويحيى الفخرانى" ليالى الحلمية" ومحسن محى الدين"اليوم السادس" ومحمود مرسي" شئ من الخوف" وصلاح ذو الفقار" "الأيدى الناعمة" ورشدى أباظة" الزوجة ال13"... أى خدمة يا باشا.
** واحد بيحب مصطفى شعبان:
النجم الكبير مصطفى شعبان عندى شوية أسئلة أتمنى يتسع صدرك ليها
1. الناس بتقول إن دمك تقيل فى الرومانسية ليه مصمم تعمل حبّيب فى أفلامك؟
2. من ساعة فيلم مافيا والدور الجميل اللى أنت عملته ماشوفنكش فى دور عدل؟
3. ليه مش بتشارك نجوم تانية فى أفلامها زى خالد النبوى ما عمل فيلم الديلر مع السقا؟
4. ليه ما اتجوزتش وأنت سنك عدى 40 سنة لغاية دلوقت؟
5. صحيح أنت اتجوزت وطلقت بسرعة وليه؟
6. وليه دايما حواليك إشاعات أنك بتاع بنات؟
7. ودايما بيقولوا إنك مغرور وبتاخد نجاح أفلامك لنفسك على حساب النجوم اللى معاك؟
وأتمنى لك النجاح
مصطفى: صدرى يتسع لكل الأسئلة
1- غريبة سؤالك لأن فيه ناس تانية شايفين أنى بعمل أدوار رومانسية كويس أوى، وأنا عملت بس دور رومانسى واحد فى "أحلام عمرنا".
2- أعتقد أننى عملت أدوار تانية برضوا مهمة واعتز جدا بنجاح مافيا.
3- مستعد أنى أشارك فى أفلام مع ممثلين نجوم آخرين، وفيه مشروع فيلم مع أحمد السقا بس مؤجل.
4- اللى قالك عمرى غلطان.
5- أنا عملت كتب كتاب ومحصلش نصيب.
6- الصيت ولا الغنى.. أنا زى زيك بسمع بالظبط.
7- عمرى ما كنت مغرور.
** دودى: أنت فيك شبه كبير يا مصطفى بالفنان شوقى شامخ وهو شاب.
مصطفى: الله يرحمه
** JWTBAK: نفسى أشوفك فى السينما العالمية لأنك محترف فن.
مصطفى: أشكرك جدا.
** مصطفى حمدى:
1. يا ترى إيه أكتر حاجة اتعلمتها من يوسف شعبان؟
2. عملت إيه يوم ماتش مصر والجزائر فى السودان؟
3. ما موقفك من الجزائر اليوم؟
4. هتعمل إيه الفترة الجاية؟
5. إيه الجايزة اللى بيتمناها مصطفى شعبان فى الفترة القادمة؟
مصطفى شعبان
- إشمعنا يوسف شعبان .. عموما أنا بحبه جدا وهو ممثل أكثر من رائع.
- السؤال الثانى والتالت جاوبت عليهم قبل كده.
- هخلص الفيلم وأحضر لفيلم جديد.
- جائزتى أن الناس تثق فى أعمالى.
** نعمان :
1. ليه متجوزتش لحد دلوقتى؟
2. أنت ليك مواصفات معينة فى البنت اللى بتتمناها؟
3. إيه أكتر حاجة دايما الفنان يوسف شعبان يقولهالك؟
4. تحب تاكل إيه؟
مصطفى
1. نصيب.
2. تكون متدينة وقريبة من ربنا.
3. حاسس أنكم معتقدين أن يوسف شعبان والدى.. بس ده مش صحيح والله.
4. العنب.