مساء الخير في رمضان وقبل الفطار بساعه وهي دي الساعه لي ممكن تحصل فيها اي حاجه وكل حاجه من غير اي اسباب منطقيه . بصراحه انا كنت قولت اني مش هكتب تاني في ورقه بيضا وكنت بفضل انها تكون تجربه واحده وخلاص .. دا لو كان حد فاكر اصلا .. لكن زي ما كلكم عارفين ان الساعه لي قبل الفطار بتكون ساعه غريبه وعجيبه .. وانا متعود في رمضان انزل اتمشي علي النيل في الساعه الاخيره من الصيام وكالعاده نزلت علي كورنيش المعادي بس انهارده معايا اللاب توب قولت اكتب السطور دي وانا علي النيل .. المنظر جميل جدا والاجمل منظر الونش ونازل منه العسكري يركب الكلابش في العربيه وانا سايبه لان كدا كدا هدفع الغرامه 26 جنيه فلما اخلص كتابه وهو ياخد لفه ويرجع تاني هخليه يفك الكلابش .. جميل جدا الوقت اللي ممكن تقضيه علي النيل قبل الفطار.. بتشوف الدنيا هاديه جدا .. والناس ماشيه كل واحد سارح في ملكوت ربنا ولا هو داري باي حاجه .. ولو حد حاول يرجع لارض الواقع بيروح متخانق مع اقرب واحد ماشي جنبه .. بس انا مش بركز مع اي حاجه غير النيل .. رغم التلوث والصرف الصحي وصرف المصانع .. بس اد ايه النيل عظيم .. زمان ايام الفراعنه كانوا بيقدموا اجمل البنات ويرموها في النيل علي اعتبار ان النيل هو اله الخير .. مكانوش وقتها يعرفوا انهم هيسيبولنا دلوقت احفاد اللي مترموش : كل حاجه هنا جميله ماعدا الجو .. في الوقت دا انا بحلم بكل انواع العصير اللي اعرفها واللي حتي ما اعرفهاش .. بصراحه في الوقت دا بالذات نفسي اكون في فندق خمس نجوم عاوز احس بشويه رفاهيه واللي اطلبه يجيلي لحد عندي .. ممكن سميراميس .. انا بحب الفندق دا جدا .. رغم انه مش الاحسن في مصر وفي فنادق احسن منه كتير .. بس انا بحبه جدا.. ورغم انها مجرد فكره .. بس الاحسن ارجع البيت .. مش عارف دايما برتاح في البيت اكتر .. مش عارف ليه رغم ان كل الفنادق بيكون فيها خدمه وراحه اكتر من البيت بكتير .. بس انا بحب اكون في البيت .. وبما انها الساعه لي قبل الفطار .. فاكيد بيكون في افكار غريبه بتفكر فيها .. فقولت لنفسي بس البيت مش اجمل من سميراميس ليه انا بحب البيت وبرتاح فيه اكتر من سميراميس .. قولت لنفسي اكيد انت مجنون .. ايه جاب سميراميس بكل الفخامه والاهتمام والجمال اللي فيه لبيتك اللي مهما كان كويس اكيد مش هيكون احسن من سميراميس .. وبعدين قعدت اقول لنفسي اسبابي لي بتخليني بحب البيت اكتر .. قولت اني مهما لفيت وخرجت وبعدت برجع تاني لبيتي .. في باب مقفول .. في اكل نضيف من ايد امي .. في سرير مريح انام عليه .. في البيت انا كبرت واتربيت في امان .. البيت وفرلي كل احتياجاتي من يوم لما اتولدت .. بتعلم .. بتعالج .. باكل .. باشرب .. هو النقطه لي لازم ارجعلها كل يوم مهما بعدت عنه .. لكن في سميراميس انا عايش باللي في جيبي .. لو كان معايا فلوس هيكون كل الناس تحت امري ..وبفلوسي اقول كن فيكون ولو مش معايا فلوس هكون انا وشنطة هدومي علي رصيف الفندق . لما وصلت للنقطه دي فكرت .. وقولت ايه لو اللي بيحصل في الفندق يحصل في البيت .. لو امي جت وقالتلي كل يوم الصبح تدفع تمن الفطار والغدا والعشا .. وتحاسب علي غسيل هدومك .. واعمل حسابك لوحبيت تتعالج انت لي هتدفع حساب المستشفي والعلاج .. واول السنه مصاريف دراستك عليك انت لي هتدفعها .. ولو قولتلها يا امي يا ام الدنيا انا مش معايا فلوس انا محتاج لمساعدتك .. دا انتي امي .. تبصلي بنظره غريبه وتقولي الاكل هدفعلك جزء من تمنه والميه موجوده في الحنفيه وياعم ولا تزعل نفسك .. العلاج والتعليم مجانا .. قولت لنفسي كويس .. امي هتقدملي ابسط حاجه تخليني حاسس اني عايش .. لكن حسيت بتعب شديد بسبب الاكل .. لان الاكل لي امي وفرته ودفعتلي جزء من تمنه مش نضيف .. سمعت في التليفزيون انه ملوث .. والخضار اللي امي بتقدمه خضار ملوث .. مروي علي مية الصرف الصحي .. والعيش اللي امي بتقدمه ملوث .. فيه حشرات ومسامير .. واحيانا كل فتره لما كنت بجمع فلوس اقولها تعملي نوع لحوم .. وبعدها كالعاده تعبت .. وسمعت في التليفزيون ان امي قدمتلي لحمه فيها دود .. ولما تعبت وقولت لامي انا تعبان عالجيني .. خدتني لمستشفي مكتوب علي باب غرفة العناية المركزه كلمة ( إن عاش) .. ولما خدت روشته العلاج معرفتش اقراها كويس .. لان التعليم اللي امي قدمته ليا كان تعليم فاسد .. اسمه تعليم مجاني .. وانا مكانش معايا فلوس اخد دروس خصوصيه .. او ادخل مدارس خاصه بفلوس علشان اتعلم كويس .. اعتمدت علي المدرسه اللي امي وفرتها ليا وقالتلي طالما مش هتقدر تدفع ادرس هنا في المدرسه المجانيه دي .. وقتها قولت لنفسي ليه يا امي تعملي فيا كدا .. ليه يا امي تخليني بستني الفرصه علشان اهرب منك .. ليه يا ام الدنيا تخليني عيني علي الباب .. مستني فرصه للخروج .. وعدم العوده .. ليه يا ام الدنيا .. - يا استاذ - افندم - عربيتك دي - ايوه - هتدفع الغرامه ولا نسحب الرخص - لا هدفع .. هات الايصال - اتفضل فاضل ربع ساعه علي المغرب .. سلام علشان عطشان جدا ..وسوري علي الرغي
