احترس.. مصر ترجع إلى الخلف – شارل فؤاد المصرى – المصرى اليوم

وانهارت البنية التحتية.. وحياتك كمان والفوقية واللى بينهم واللى عند الجيران وأنا وإنت ورقصنى يا جدع.
دى مش تخاريف صيام ولا فطار وحياتك، هى الناس لاقيه تاكل أصلا ولكنها هرتلة.. أيوه هرتلة وأنا لو معملتش كده ممكن يجرالى حاجة لا سمح الله بسبب اللى بيحصل فينا فى عز أغسطس.
الدنيا نار والأسعار نار والرطوبة برضك نار- أنا نفسى مش عارف إزاى تبقى الرطوبة نار.. يمكن علشان جايه فى أغسطس، وأغسطس ده شهر 8 ولو ضغطنا عليه ممكن يوافق وييجى فى تسعة.. وتسعوا فى الخير قولوا إن شاء الله.
خلاص عاوزين نتكلم جد.. حاول أدينى بحاول.. ما البلد مفيهاش حاجة جد لأن كل اللى بيحصل ده أكيد هزار.. وهزار سخيف كمان.. مصر بتتقدم بينا. اهتفوا معايا «يعيش الحزب الوطنى يعيش يعيش يعيش».. عاوز صوت عالى يوصل لكل أفراد وأعضاء الحزب الوطنى المنتشرين فى كل أنحاء الجمهورية.. تمام يا فندم.
يا ناس يا هووو اللى بيحصل فينا ده حرام.. البلد القمح فيها انضرب وطوابير العيش رجعت تانى والناس بتقع قتلى وشهداء– شهداء طوابير العيش فى عهد حكومة الدكتور أحمد نظيف أكتر من شهداء الأسفلت.. شوف المفارقة العجيبة.. وخناقة بين البترول والكهربا والريس بيصالحهم علشان خاطر المواطن الغلبان.
والانتخابات جايه ببلاويها والسماك اتقتل فى بورسعيد من أجل مصر، من أجل الانتخابات، من أجلك أنت، من أجل الحصانة– هو كيلو الحصانة بكام.. بتقول إيه مش بالكيلو بالقطعة، شوفلنا دستة وحياة أبوك.. متغلطش أنا أبويا متوفى شهيد من شهداء طوابير العيش السنة اللى فاتت.. متأسف الله يرحمه.. كنت عاوز أسألك متعرفش مخبز يكون فيه الطابور خفيف شوية.. انتو بتجيبوا عيش منين؟!
والإخوان بيهاجموا مسلسل «الجماعة» وبيدعوا الناس تنزل للشارع.. هو فيه حد أصلا موجود فى البيوت؟ الناس كلها فى الشارع اللى بيجيب لِبْس العيد، واللى بيدوّر على شقة، واللى واقف من أول رمضان قدام المخبز علشان يجيب خمس ترغفة، واللى عامل خيمة قدام مخزن الأنابيب من السنة اللى قبل اللى فاتت، والشارع أصلا زحمة والمرور واقف وأنا مش عارف المرور هيقعد إمتى، ومن يوم ما عرفناه اخترناه اخترناه.
وشفتوا اللى حصل فى العتبة.. مش بيحفروا لمترو الأنفاق للخط التالت عقبال عندكو، والأرض هبطت والبيوت وقعت والأهالى خرجوا من بيوتهم، وكل واحد خد 60 جنيه فى اليوم، وده شىء لزوم الشىء وكتّر خير الحكومة والمترو اللى مستحملينا، أصل إحنا رزلنا عليهم شوف الحكومة مستحملانا قد إيه.. واحترس مصر ترجع إلى الخلف.. وربنا يطول فى عمر الحكومة، دعوة وِلِيّة ساعة عصرية.