ما تشتريش سمك في مية

أنا آنسة عندي 20 سنة وفي تانية صيدلة، أنا الحمد لله متربية على خلق حسن وكنت دايما في حالي بس مشكلتي إني مش اجتماعية وما عنديش غير صاحبة واحدة وده بسبب إني خجولة جداااااااا بس الموضوع ده مخليني دايما كنت باحس بالوحدة؛ لأن صاحبتي مش معايا على طول وخصوصا في الإجازة.
المهم أنا كان دايما رأيي في الشات إنه حرام وكانت أختي بتكلم ولاد على النت، وكنت دايما بازعق لها وأقول لها حرام. بعد ما خلصت الامتحانات السنة دي كنت دايما مخنوقة وحاسة بملل، ولقيت نفسي بادخل على النت وأكلم ولاد مع إني كنت رافضة ده تماما، بس الكلام في حدود الاحترام ومش مع أي حد.
المهم جات عليّ فترة رحنا نصيّف فما بقيتش بادخل ولما رجعنا رجعت تاني أدخل واتعرفت على شاب خريج هندسة أكبر مني ب3 سنين، وكنا بنتكلم كل يوم تقريبا ومن يوم ما كلمته وأنا مش باكلم غيره، وقلت له كده وفرح جدا وحسيت إني بدأت أتعلق بيه؛ لأني بجد لقيت فيه حاجات كتير بحبها، هو محترم وابن ناس والحمد لله بيصلي وعارف ربنا وكمان مهندس، بس أنا خفت وبدأت أبعد بس ما قدرتش رجعت تاني وساعتها هو حس بيّ وصارحني بحبه وإنه ما بقاش يقدر يستغنى عني، وقال لي إنه عايز نكمّل مع بعض حياتنا، ونرتبط رسمي.
أنا فرحت جداااااا بس قلت له إني لازم أخلص دراستي الأول وإني لسه فاضل لي 3 سنين فقال لي هاستناكي، المهم كان كل يوم بيعدي علينا بنتعلق ببعض أكتر، وخد رقم موبايلي بس ما كلمنيش خالص؛ لأنه كان شايف إن ده مش من حقه، وإنه خايف عليّ.. أنا باثق فيه جداااااا مش عارفة ليه ومصدقاه جدااااااا..
المهم من أسبوع كده إحنا ما اتكلمناش علشان كنت مسافرة ولما رجعت حسيته زعلان ومتضايق وما كانش راضي يقول لي السبب خالص بس ألحيت عليه لحد ما قال لي إنه حكى لأهله عليّ وإنهم رفضوا، وقعد يقول لي أنا هاتكلم تاني مرة واتنين وعشرة لحد ما أقنعهم وما رضيش يقول لي سبب الرفض، بس أنا طبعا فاهمة إنه النت، وعندهم حق.. وبصراحة اتضايقت لأننا كنا متفقين إن أهلنا ما ينفعش يعرفوا دلوقتي على الأقل كمان سنة، بس اللي حصل.
المهم قلت له يصالح أهله وما يفتحش الموضوع تاني خالص دلوقتي، ويحسسهم إنهم أهم عنده مني، وإنه مستحيل يعمل حاجة من وراهم؛ لأن ده الصح، وقلت له إن لو أهله فضلوا رافضين لحد ما أخلص دراستي أنا اللي هابعد وأسيبه؛ لأن مستحيل أرتبط بيه غصب عن أهله بس طبعا هو قعد يقول لي مستحيل أسيبك أبدا وهافضل متمسك بيكي.
أنا مشكلتي دلوقتي إني حاسة بالذنب إن السبب في المشاكل عنده، كمان خايفة جداااااااا أفضل معلقة نفسي 3 سنين وبعدين أهله يفضلوا رافضين وكمان خايفة من رد فعل أهلي أنا لما يعرفوا.. بجد مش عارفة إيه الصح من الغلط إحنا دلوقتي بنكلم بعض بالرسايل على الموبايل مجرد نطمن على بعض بس، وهنفضل كده؛ لأن دراستي خلاص هتبدأ وهو عايزني أركز في دراستي وبس، وما أشغلش نفسي بيه خالص..
إحنا بجد مش بنعمل حاجة غلط خااااااااالص والحمد لله إحنا الاتنين محترمين جداااااا وبنخاف على بعض جداااااا أرجوكم انصحوني أعمل إيه علشان أنا بقيت بحبه أوي ومش متخيلة حياتي من غيره.. أرجو الرد.

a.h


لو عايز تفضفض لنا دوووووس هنا