قواعد لبس البنات.. الفسفوري عماني ورب العرش نجاني

لبس البنات الايام دى بقى حاجة كده زى الست اللى مبتعرفش تطبخ وبتدخل المطبخ تُعك وف الاخر تطلع باكلة جديدة وتبقى عاملة زي طبق اليوم المهم قواعد اللبس:
- لازم تكونى بتنورى ف الضلمة ولابسة فسفورى.
- الطرحة تبقى كذا دور ويعنى لو اتزنقتنى هنأجر دور منهم واهو تحلى أزمة الإسكان.
- لازم تكونى عارفة كل الالوان ومش الالوان الصايصة الأبيض وأسود وأحمر بتاعة البنى ادميين لا خليكى مودرن واعرفى الفحلوقى والقحفولى.
- البسى فسفورى الفسفور ممكن يجيب عريس على فكرة بيحبوا الحاجات دى.
- البسى أي لون على أي لون مالهوش علاقة بيه وتانى يوم هتطلع موضة.
- حاولى تخسى شوية علشان الكارينا والفيزون يكونوا احلى عليكى.
- لو عايزة تخلعى من حبيبك خديه معاكى مرة وانتى بتشترى هدوم هي مرة واحدة بس.
- عليكى بقى وعلى ايشاربات ست الحاجة اللى هي كانت موضة ايام ما ستك كانت بتقعد على الحصيرة وتدلدل رجليها !!
- اتفرجى على أمينة شلباية.
- طرحتك ثم طرحتك ثم طرحتك.. عارفة التوكة الكبيرة بتاعة الشعر اللى هي مفروض بنلبسها ف البيت دى.. لاء البسيها انتى تحت الطرحة واطلعى ب ادوار اعلى واعلى.
- البسى فسفورى.
- ممكن عادى تشترى هدومك كلها من التوحيد والنور وتقولى أن خالو جايبهالك وهو جاى من شرم الشيخ وخالك اصلا كان ف صفط اللبن بيخلص حق جاموسة.
- افورى ف الماكياج افورى ودخلى الوان ف بعضها واعملى تاتو على ايدك.
- شمرى كم الشميز أو التيشرت لحد نص دراعك.. اه امال التاتو يستخبى.
- البسى كعب بتاع 10 ولا 15 سم حتى لو كنت طويلة عادى موضة وانتى مش متخلفة عن الموضة يعنى طبعا.
- طلعى نص شعرك برا الطرحة عادى حلالن حلالن حلالن.
- البسى فسفورى.
- اكسسوارتك عنوان حياتك.. اه يعنى على اد ما تقدر البسى شاخاليل واهى برضو تُعلن عن قدومك من على بُعد
- دايما مع الوقت الموضة القديمة بترجع يعنى دلوقتى الدانيتلا رجع موضة.. من فترة برضو قماش الستاير القديمة دى كان موضة.. حلو جيبيه.
- خليكى معفنة ف بيتكم عادى العريس مش هيعدى عليكى ف الصالة وانتى قاعدة وفارشة على الارض ومعصبة راسك تعصيبة المطلقين ولابسة فانلة ابوكى وبنطلون اخوكى.
- تناسق الالوان مش هيفرق اوى برضو وانتى قاعدة ف البيت أهم حاجة تكونى عارفة اسم اللون اللى انت لابسها ايه بلاش جهل بقى.
- بلاش تلبسى فسفورى ف البيت دول اهلك برضو وليهم حق عليكى.
- البسى فسفورى.
- البودرة.. عليكى بالبودرة لو انتى سمرا بس متحطيش ايدك جمب وشك كتير.
- البودرة..عليكى بالبودره وبرضك لو انتى بيضا فيه ناس بتحب تقتنى الفيران البيض وتربيها.
- وانتى رايحة فرح ده موال تانى لوحده ده.. حاولى على اد ما تقدرى تلبسى برُبرق كتييييير وكده بحيث تنفعى لو الكهربا قطعت ولا حاجة مصدر متجدد للطاقة.
- وفي النهاية البسى فسفورى تانى